Նորություններ

Եվրասիական տնտեսական հանձնաժողովի խորհրդի նիստում հաստատվել է ԱԱՀ-ով հարկման նպատակով էլեկտրոնային ձևով ծառայությունների ցանկը։ 

Ցանկը բաղկացած է 14 ծառայությունից, որոնց տրամադրումն իրականացվում է տեղեկատվական ցանցերի, այդ թվում՝ համացանցի միջոցով, և անհնար է առանց տեղեկատվական տեխնոլոգիաների օգտագործման։ Նոր կանոնների համաձայն՝ Եվրասիական տնտեսական միության տարածքում հաստատված ցանկից էլեկտրոնային ձևով ծառայություն անդրսահմանային գնման դեպքում ԱԱՀ-ով հարկումն իրականացվելու է նման ծառայության գնորդի գտնվելու վայրում։

ԵՏՀ էկոնոմիկայի և ֆինանսական քաղաքականության նախարար Բակիտժան Սագինտաևի խոսքով՝ ԵՏՀ խորհրդի կողմից էլեկտրոնային ձևով ծառայությունների ցանկի հաստատումը ԵԱՏՄ-ում իրականացվող էլեկտրոնային ձևով ծառայությունների ԱԱՀ-ով հարկման կարգի կարգավորման համալիր աշխատանքի ավարտական փուլն է: Նա հիշեցրել է, որ 2022 թվականի դեկտեմբերի 9-ին Եվրասիական տնտեսական բարձրագույն խորհրդի նիստում պետությունների ղեկավարները ստորագրել են հիմնական Արձանագրությունը, որը կարգավորում է էլեկտրոնային ձևով ծառայություններ մատուցելիս ԱԱՀ-ի վարչարարության կարգը։

«Այսօր հաստատվել է ծառայությունների կոնկրետ ցանկ, որոնց վրա տարածվում է նախկինում ստորագրված Արձանագրության գործողությունը։ Այսպիսով, Միության տարածքում թափանցիկ և կանխատեսելի միջավայր է ապահովվել ծառայությունների համացանցային առևտրի համար,- ընդգծել է Բակիտժան Սագինտաևը։ - Նշեմ, որ էլեկտրոնային առևտրի ոլորտը մշտապես զարգանում է, հայտնվում են նաև էլեկտրոնային ձևով ծառայությունների նոր տեսակներ, ուստի Հանձնաժողովը կշարունակի տվյալ ոլորտի մշտադիտարկումը ԱԱՀ-ով հարկման նպատակների համար էլեկտրոնային ձևով ծառայությունների ցանկն անհրաժեշտության դեպքում ընդլայնելու համար»։