Տառատեսակի չափը. A A A

Կայքի գույները. C C C

Գրանցում կայքը Մորացել

Ընտրեք ամսաթվերը

Ընտրեք ուղղությունը

Որոնման արդյունքները 1008

27 հունիսի 2025 Եվրասիական տնտեսական բարձրագույն խորհուրդը հավանություն է տվել ԵԱՏՄ-ում ծառայությունների առանձին հատվածների ազատականացման մասին զեկույցին Եվրասիական տնտեսական բարձրագույն խորհրդի նիստում ընդունվել է ԵԱՏՄ շրջանակներում ծառայությունների առանձին հատվածների ազատականացման պլանների իրագործման մասին զեկույցը: Զեկույցում ներկայացված են 2024 թվականի մշտադիտարկման արդյունքները հետևյալ ուղղություններով՝ զբոսաշրջություն, օդերևութաբանություն, մարքշեյդերական աշխատանքներ, գնահատման գործունեություն, շինարարություն և կինեմատոգրաֆիա: Նշվել են վարչական համագործակցության մասին համաձայնագրերի մշակումը, ինչպես նաև այդ հատվածներում կարգավորման ներդաշնակեցման համար մեթոդական հանձնարարականների մշակումն ավարտին հասցնելու հարցեր: «Զեկույցի ընդունումը վերահաստատում է առանց արգելքների ծառայությունների միասնական շուկայի ստեղծման մեր ընդհանուր մտադրությունը: Առանցքային հատվածների ազատականացումը նոր հնարավորություններ կբացահայտի բիզնեսի համար և կամրապնդի տնտեսական փոխգործակցությունը Միության երկրների միջև: Այժմ հատկապես կարևոր է կենտրոնանալ մեթոդական մոտեցումների համաձայնեցման վրա, որպեսզի հավասար պայմաններ ապահովենք շուկայի բոլոր մասնակիցների համար», — մեկնաբանել է Եվրասիական տնտեսական հանձնաժողովի տնտեսության և ֆինանսական քաղաքականության նախարար Բախիթ Սուլթանովը:  

27 հունիսի 2025 ԵԱՏՄ-ում ամփոփել են Ծառայությունների առևտրի կարգավորման կանոնների պահպանման 2023-2024 թվականների արդյունքները Եվրասիական տնտեսական բարձրագույն խորհուրդը քննարկել է Եվրասիական տնտեսական միության պետությունների կողմից Ծառայությունների առևտրի, հիմնադրման և գործունեության կարգավորման կանոնների կատարման 2023-2024 թվականների մշտադիտարկման արդյունքների մասին զեկույցը, որը նախապատրաստել են երկրների կառավարությունները Եվրասիական տնտեսական հանձնաժողովի հետ համատեղ: Զեկույցում ներկայացված են Կանոնների պահպանման առանցքային ասպեկտները, մասնավորապես՝ պետություններում ձեռնարկատերերի համար բարենպաստ ընթացակարգերի կիրառումը: Դրանց թվում են բիզնեսի ստուգման ժամանակ կարգավորող ազդեցության գնահատումը (ԿԱԳ), «լռությունը համաձայնության նշան է» սկզբունքի կիրառումը և ռիսկին կողմնորոշված մոտեցման ներդրումը: «Մենք դրական դինամիկա ենք տեսնում մասնակից երկրների կողմից Կանոններն իրենց օրենսդրությունում կիրարկելու գործում: Զեկույցը հաստատում է, որ փաստաթղթով նախատեսված պայմանների իրագործումը հասնում է 100 տոկոսի: Սա կարևոր քայլ է Միության շրջանակներում բիզնեսի համար թափանցիկ և հարմարավետ պայմանների ստեղծման ուղղությամբ», — նշել է ԵՏՀ տնտեսության և ֆինանսական քաղաքականության նախարար Բախիթ Սուլթանովը: ԵՏՀ նախարարը կարևորել է «լռությունը համաձայնության նշան է» սկզբունքի ներդրումը, համաձայն որի՝ պետության իրավասու մարմինը սահմանված ժամկետում դիմողին պետք է տրամադրի համապատասխան թույլատվություն կամ ներկայացնի պատճառաբանված մերժում, հակառակ դեպքում դիմողը ինքնաբերաբար ստանում այն գործունեության թույլտվություն, որի իրականացման համար ներկայացվել էր դիմումը: 2023-2024 թվականների, ինչպես նաև նախորդ ժամանակահատվածների զեկույցին կարող եք ծանոթանալ Հանձնաժողովի կայքում:

27 հունիսի 2025 ԵԱՏՄ-ում սահմանվել են սպորտի ոլորտում տնտեսական համագործակցության հիմնական ուղղությունները: Այսօր Եվրասիական տնտեսական միության հինգ պետությունների ղեկավարները հաստատել են Սպորտի ոլորտում տնտեսական համագործակցության հիմնական ուղղությունները: Մինչև 2025 թվականը եվրասիական տնտեսական ինտեգրման զարգացման ռազմավարությամբ նախատեսված փաստաթուղթը սահմանում է համագործակցության հիմնական ուղղությունները՝ սպորտային ենթակառուցվածքի զարգացումը, սպորտային ապրանքների արտադրության ավելացումը և դրանց փոխանակումը, սպորտային արդյունաբերության ծառայությունների զարգացումը՝ ներառյալ սպորտային զբոսաշրջությունը, ինչպես նաև սպորտային համաժողովների ու ցուցահանդեսների կազմակերպումը: Որպես տնտեսական համագործակցության հիմնական գործոններ առանձնացվել են «հնգյակի» երկրների աշխարհագրական մոտիկությունը և զարգացած սպորտային ենթակառուցվածքը: «Միասնաբար այս գործոնները բարենպաստ հիմք են ստեղծում սիներգետիկ արդյունքի և կոոպերացիոն գործընթացների խորացման համար: Համատեղ ջանքերով մենք Միության երկրների քաղաքացիներին կարող ենք ապահովել որակյալ սպորտային արտադրանքով, զարգացնել սպորտային ենթակառուցվածքը և սպորտի ոլորտում տնտեսական փոխգործակցությունը նոր մակարդակ բերել», — փաստաթուղթը մեկնաբանել է Եվրասիական տնտեսական հանձնաժողովի տնտեսության և ֆինանսական քաղաքականության նախարար Բախիթ Սուլթանովը:  

26 հունիսի 2025 ԵՏՀ-2025-ում քննարկել են Եվրասիական տնտեսական միությունում աշխատանքային միգրացիայի ապագան ԵԱՏՄ միասնական աշխատաշուկայի գործունեությունը, ընթացիկ դժվարությունները և զարգացման ռազմավարական ուղղությունները քննարկել են Մինսկում Եվրասիական տնտեսական համաժողով 2025-ի շրջանակներում անցկացված «Միասնական աշխատաշուկա/ մարտահրավերներ և հեռանկարներ» թեմատիկ նստաշրջանի մասնակիցները: Մոդերատորն էր Եվրասիական տնտեսական հանձնաժողովի էկոնոմիկայի և ֆինանսական քաղաքականության նախարար Բախիթ Սուլթանովը։  Բացելով քննարկումը՝ ԵՏՀ նախարարը նշել է. «ԵԱՏՄ-ի համար միասնական աշխատաշուկան եվրասիական ինտեգրման գործընթացների արդյունավետության յուրօրինակ ցուցիչ է, քանի որ գրա գործունեության որակը մեծապես որոշում է, թե որքանով են քաղաքացիներն ըմբռնում ինտեգրման իրական առավելությունները և վստահում դրանց»: Ըստ Բախիթ Սուլթանովի՝ Միության գործունեության 10 տարվա ընթացքում ապահովվել է աշխատանքային միգրացիայի հավասար հասանելիությունը ԵԱՏՄ երկրների քաղաքացիների համար, աշխատանքի տեղավորման ժամանակ կրթության փաստաթղթերի ուղղակի ճանաչումը, լուծվել են աշխատավոր միգրանտների սոցիալական և կենսաթոշակային ապահովության հարցերը:  «Այս միջոցների արդյունքում զգալիորեն աճել է շարժունակությունը. աշխատավոր միգրանտների ամենամյա հոսքը 2016 թվականի 770 հազարից 2024 թվականին աճել է մինչև ավելի քան 1 մլն», - հայտնել է Բախիթ Սուլթանովը: Նստաշրջանի շրջանակներում քննարկվել են միասնական աշխատաշուկայի հետագա զարգացման ուղղությունները՝ ներառյալ իրավական դաշտի կատարելագործումը: Հանձնաժողովը մշտապես մշտադիտարկում է ԵԱՏՄ երկրների ազգային օրենսդրությունների փոփոխությունների համապատասխանությունը Միության աշխատանքային միգրացիայի ոլորտի իրավունքին: Զարգացման կարևոր ուղենիշ է համարվել աշխատանքային միգրացիայի ոլորտի գործընթացների թվայնացումը: Մասնակիցները համակարծիք էին, որ անհրաժեշտ է թվային լուծումների համատեղ առաջմղում և ներդրում: Նշվել է, որ թվայնացումը թույլ կտա ոչ միայն օպտիմալացնել գործընթացները, այլև ԵԱՏՄ քաղաքացիներին ապահովել աշխատանքի տեղավորման հնարավորությունների և կեցության պայմանների մասին ավելի լիարժեք և օպերատիվ տեղեկատվությամբ՝ նվազագույնի հասցնելով արգելքները և ապօրինի միգրացիայի ռիսկերը: Նստաշրջանում հատուկ անդրադարձել են «հարթակային զբաղվածությանը», որն ակտիվորեն զարգանում է, բայց դեռևս չունի վերազգային կարգավորում ԵԱՏՄ-ում, իսկ Միության անդամ պետություններում զբաղվածության այս ձևի կարգավորումը զարգացման փուլում է: «Մեր հետագա հաջողությունը կախված է փոփոխություններին օպերատիվորեն արձագանքելու, գործուն միջոցներ առաջարկելու և Միության երկրների քաղաքացիների պահանջները հաշվի առնելու կարողությունից: Միևնույն ժամանակ, կարևոր է այս աշխատանքներին ներգրավել հետաքրքրված կողմերի առավելագույնս լայն շրջանակ», - ընդգծել է ԵՏՀ նախարարը: Քննարկմանը մասնակցել են պետական մարմինների, բիզնեսի, արհմիությունների և միջազգային կազմակերպությունների ներկայացուցիչներ: ԵՏՀ-ն ԵԱՏՄ երկրների հետ համատեղ կմշակի նստաշրջանում ներկայացված բազմաթիվ նախաձեռնություններ միասնական աշխատաշուկայի հետագա զարգացման և դրա արդյունավետության բարձրացման համար:

24 հունիսի 2025 ԵԱՏՄ երկրները քննարկել են Միության ընդհանուր ֆինանսական շուկայի ձևավորման մոտեցումները Եվրասիական տնտեսական հանձնաժողովի Կոլեգիային կից Ֆինանսական շուկաների հարցերով խորհրդատվական կոմիտեում քննարկել են Եվրասիական տնտեսական միության ընդհանուր ֆինանսական շուկայի հետագա ձևավորման, օրենսդրության ներդաշնակեցման ու կատարելագործման մոտեցումները: Նիստը կայացել է ԵՏՀ կենտրոնակայանում Հանձնաժողովի տնտեսության և ֆինանսական քաղաքականության նախարար Բախիթ Սուլթանովի նախագահությամբ։ Հավանության է արժանացել ԵԱՏՄ պետությունների ֆինանսական շուկայի ոլորտի օրենսդրության ներդաշնակեցման միջոցառումների 2024 թվականի պլանի իրականացման ընթացքի մասին հաշվետվությունը: «Հաշվետվությունում արտացոլված է բանկային և ապահովագրական հատվածներին և արժեթղթերի շուկային առնչվող օրենսդրության ներդաշնակեցման աշխատանքը, որն իրականացվել է Հանձնաժողովի կողմից ֆինանսական կարգավորիչների հետ համատեղ, — նշել է Բախիթ Սուլթանովը: — Ֆինանսական շուկաների ոլորտի կարգավորմանը և հսկողությանը ներկայացվող ներդաշնակեցված պահանջների ձևավորումը ԵԱՏՄ ընդհանուր ֆինանսական շուկայի ստեղծման անհրաժեշտ պայմաններից է»: Նիստի մասնակիցները քննարկել են Միության ընդհանուր ֆինանսական շուկայի ձևավորման հետագա քայլերը: Եվրասիական տնտեսական բարձրագույն խորհրդի հանձնարարության կատարման շրջանակներում քննարկվել է ԵԱՏՄ կարգադրության նախագծի նոր խմբագրությունը, որում ներառվել են ֆինանսական կազմակերպությունների գործունեության կարգավորման տարամակարդակ մոտեցում կիրառելու հնարավորությանը և ներդաշնակեցման ժամկետների արդիականացմանը վերաբերող դրույթներ: Խորհրդատվական կոմիտեի անդամները հավանություն են տվել Միության պետությունների օրենսդրության ներդաշնակեցման համաձայնեցված առաջարկների մասին ԵՏՀ խորհրդի հանձնարարականները՝ գլոսարիումի մասով և արժեթղթերի շուկայում բրոքերներին ներկայացվող պահանջների և ԵԱՏՄ ընդհանուր ֆինանսական շուկա ապահովագրական կազմակերպությունների մուտքի թույլտվության ոլորտի մասով: Քննարկվել է նաև Միության պետությունների վարկանիշային ոլորտի հարցերի մշակման մասին զեկույցի նախագիծը, որը նախապատրաստել է Հանձնաժողովը ԵԱՏՄ երկրների լիազոր մարմինների հետ համատեղ Ռազմավարություն-2025-ի իրականացման միջոցառումների պլանի կատարման շրջանակներում:

24 հունիսի 2025 ԵՏՀ-ն նախապատրաստել է շինարարական մասնագիտություններին ներկայացվող որակավորման պահանջներին առնչվող հանձնարարականներ Եվրասիական տնտեսական հանձնաժողովի Կոլեգիան ընդունել է «Շինարարության ոլորտում առավել պահանջված մասնագիտությունների որակավորման պահանջների մասին» հանձնարարականը: Փաստաթուղթն ուղղված է ԵԱՏՄ երկրներում մասնագիտական ստանդարտների միասնականացմանը և շինարարական աշխատանքների որակի բարձրացմանը: Հանձնարարականը մշակվել է ի կատարումն Ռազմավարություն-2025-ի իրականացման միջոցառումների պլանի և սահմանում է տարբեր մակարդակի որակավորում ունեցող բանվորների գիտելիքների և հմտությունների նվազագույն ցանկ՝ հաշվի առնելով շինարարական ոլորտի առանձնահատկությունները: «Հանձնարարականի ընդունումը կարևոր քայլ է ԵԱՏՄ շրջանակներում միասնական աշխատաշուկայի զարգացման ուղղությամբ: Միասնական ստանդարտները կօգնեն Միության բոլոր երկրներում ապահովել շինարարների նախապատրաստման հավասարազչաձ մակարդակ, ինչն ի վերջո դրականորեն կանդրադառնա ենթակառուցվածքային նախագծերի որակի և օբյեկտների անվտանգության վրա», — փաստաթուղթը մեկնաբանել է ԵՏՀ տնտեսության և ֆինանսական քաղաքականության նախարար Բախիթ Սուլթանովը: Որակավորման ստանդարտները նմուշ կդառնան ազգային պահանջների մշակման համար և կարող են օգտագործվել երկրներում մասնագիտական ուսուցման ծրագրեր նախապատրաստելիս: Ավելի վաղ ԵՏՀ Կոլեգիան ընդունել էր կրթության, առողջապահության, ավտոմոբիլային տրանսպորտի և ԲԿՏ ոլորտներում առավել պահանջված մասնագիտություններին ներկայացվող որակավորման պահանջներին առնչվող հանձնարարականներ:

17 հունիսի 2025 ԵՏՀ-ն ամրապնդում է միջազգային համագործակցությունը աշխատանքային միգրացիայի և առողջապահության ոլորտում Եվրասիական տնտեսական հանձնաժողովի տնտեսության և ֆինանսական քաղաքականության նախարար Բախիթ Սուլթանովը մասնակցել է Գլոբալ դաշինքի Հանուն սոցիալական արդարության թեմայով համաժողովին, որն անցկացվել է Աշխատանքի միջազգային խորհրդաժողովի նստաշրջանի շրջանակներում: Աշխատանքի միջազգային կազմակերպության (ԱՄԿ) կողմից կազմակերպված միջոցառմանը մասնակցել են պետմարմինների, բիզնեսի, արհմիությունների և գիտական համայնքի ներկայացուցիչներ: Նախարարի խոսքով՝ Եվրասիական տնտեսական միության առավել հիմնարար ազատություններից է աշխատուժի ազատ տեղաշարժը: «Միության երկրների քաղաքացիները կարող են ազատորեն տեղաշարժվել և աշխատել «հնգյակի» որևէ երկրում, վերացվել են քվոտաները, փոխադարձաբար ճանաչվում են ԵԱՏՄ բոլոր երկրների դիպլոմները և գիտական աստիճանների մասին փաստաթղթերը, աշխատանքային միգրանտները պաշտպանված են սոցիալական և կենսաթոշակային երաշխիքներով», — նշել է Բախիթ Սուլթանովը: Այսօր ԵԱՏՄ միասնական աշխատաշուկան բաղկացած է 100 միլիոն միգրանտներից, որոնց հասանելի է պարտադիր բժշկական ապահովագրությունը (այն երկրներում, որտեղ գործում է ՊԲԱ համակարգը՝ Ղազախստան, Ղրղզստան և Ռուսաստան)՝ գտնվելու երկրի քաղաքացիների հետ հավասար պայմաններով: Միգրանտներն ապահովվում են նաև պարտադիր ապահովագրությամբ ժամանակավոր անաշխատունակության դեպքում, մայրության կապակցությամբ, արտադրությունում դժբախտ պատահարներից և մասնագիտական հիվանդություններից պարտադիր ապահովագրությամբ: Աշխատաշուկայի զարգացման համար կարևոր դեր է կատարում աշխատավորների կենսաթոշակային ապահովությունը, որը 2021 թվականից ի վեր կարգավորվում է առանձին կենսաթոշակային Համաձայնագրով: Փաստաթուղթը աշխատանքային միգրանտներին թույլ է տալիս ձևավորել, պահպանել և իրագործել իրենց կենսաթոշակային իրավունքները Միության բոլոր երկրներում: «Կենսաթոշակների վճարումը կատարվում է՝ անկախ այն հանգամանքից, թե ԵԱՏՄ որ երկրում է բնակվում կենսաթոշակառուն, ինչպես նաև հաշվի է առնվում Միության բոլոր երկրներում նրա ունեցած աշխատանքային ստաժը: Սա էապես բարձրացնում է միգրանտների սոցիալական պաշտպանվածությունը կենսաթոշակի անցնելիս», — պարզաբանել է ԵՏՀ նախարարը: Համաժողովի շրջանակներում Բախիթ Սուլթանովը հանդիպել է ԱՀԿ առողջության և միգրացիայի գլոբալ ծրագրի տնօրեն Սանտինո Սևերոնիի և ԱՀԿ կենտրոնակայանի միգրացիայի ծրագրի ղեկավարի տեղակալ, դոկտոր Դանիել Միչի հետ: Կողմերն ամփոփել են համատեղ աշխատանքի արդյունքները, սահմանել փոխգործակցության նոր ուղղությունները: Քննարկման թեմաներից մեկն էր ԱՀԿ վերլուծական զեկույցը ԵԱՏՄ երկրներում աշխատանքային միգրանտների առողջության մասին: Փաստաթուղթը թույլ կտա համակարգել լավագույն պրակտիկաները և մշակել անդամ պետությունների միջև տեղաշարժվող աշխատողների բժշկական սպասարկման կատարելագործման հանձնարարականներ: Կողմերը նաև քննարկել են թվային բժշկության զարգացումը, ներառյալ Միության երկրների առողջապահության համակարգերում հեռաբժշկական տեխնոլոգիաների, արհեստական բանականության և այլ նորարարական լուծումների ներդրումը: «Ուրախալի է, որ ԱՀԿ-ի հետ մեր գործընկերությունը նոր մակարդակ է դուրս գալիս՝ փորձի փոխանակումից՝ մինչև ապագայի բժշկության ոլորտի կոնկրետ նախագծերի իրագործումը և աշխատավոր միգրանտների իրավունքների պաշտպանությունը», — ամփոփել է ԵՏՀ նախարարը: 

05 հունիսի 2025 ԵՏՀ-ն և ՅՈՒՆՍԻՏՐԱԼ-ը շարունակել են երկխոսությունը միջազգային առևտրային իրավունքի շուրջ Եվրասիական տնտեսական հանձնաժողովը ՅՈՒՆՍԻՏՐԱԼ-ի հետ համատեղ երկրորդ վեբինարն է անցկացրել, որը նվիրված էր միջազգային առևտրային իրավունքի արդիական հարցերին. սեմինարին մասնակցել են Եվրասիական տնտեսական միության երկրների լիազոր մարմինների ներկայացուցիչներ: ՅՈՒՆՍԻՏՐԱԼ-ի փորձագետները ներկայացրել են մի շարք ուղղություններով կատարված առանցքային մշակումներ: Դրանց թվում են անվճարունակության (սնանկության) մասին օրենսդրությունը, միջազգային միջնորդությունն ու արբիտրաժը, ինչպես նաև ներդրողների և պետությունների միջև վեճերի կարգավորման համակարգի բարեփոխումը: ԵՏՀ ձեռնարկատիրական գործունեության զարգացման վարչության փոխտնօրեն Լուսինե Թումյանը նշել է, որ համաշխարհային տնտեսության սրընթաց փոխակերպման պայմաններում միջազգային իրավունքը էլ ավելի կարևոր դեր է կատարում: «ԵՏՀ-ի և ՅՈՒՆՍԻՏՐԱԼ-ի միջև երկխոսությունն ուղղված է փոխգործակցության զարգացմանը, թույլ է տալիս ծանոթանալ այս ոլորտում առաջատար միջազգային փորձին: Մենք շատ արժեքավոր ենք համարում միջազգային առևտրային իրավունքի նորմերի կատարելագործման շուրջ համատեղ աշխատանքներում փորձի փոխանակումը», — նշել է Լուսինե Թումյանը: Հանձնաժողովի ներկայացուցիչը կարևորել է ՅՈՒՆՍԻՏՐԱԼ-ի հետ ԵԱՏՄ պետությունների ակտիվ երկխոսությունը, որը, նրա կարծիքով, երկրներին թույլ է տալիս ոչ միայն տեղեկացված լինել արդիական միտումների և գլոբալ նախաձեռնությունների մասին, այլև մասնակցել միջազգային իրավական ստանդարտների ձևավորմանը: Կայացած քննարկումը մասնակիցներին թույլ տվեց ընդլայնել գիտելիքները ՅՈՒՆՍԻՏՐԱԼ-ի մեխանիզմների և գործիքների մասին, քննարկել ԵԱՏՄ շրջանակներում միջազգային առևտրային իրավունքի կիրառման պրակտիկաները: ՅՈՒՆՍԻՏՐԱԼ-ը (UNCITRAL) ՄԱԿ-ի Միջազգային առևտրային իրավունքի հանձնաժողովն է: Ստեղծվել է 1966 թվականին միջազգային առևտրի իրավունքի միասնականացմանը և ներդաշնակեցմանն աջակցելու համար: ՄԱԿ-ի միջազգային առևտրի իրավունքի ոլորտի հիմնական իրավաբանական մարմինն է: Այս տարվա մայիսի 26-ին կայացել է ԵՏՀ-ի և ՅՈՒՆՍԻՏՐԱԼ-ի առաջին համատեղ վեբինարը:

Ցուցադրել ավելին