Հունվարի 17-18-ը Եվրասիական տնտեսական հանձնաժողովի մաքսային օրենսդրության և իրավակիրառ պրակտիկայի վարչության տնօրեն Սերգեյ Վլադիմիրովի նախագահությամբ կայացել է Մաքսային կարգավորման խորհրդատվական կոմիտեին կից երկու աշխատանքային խմբի համատեղ նիստը։
Միջոցառմանը մասնակցել են պետական մարմինների և բիզնեսի ներկայացուցիչներ, այդ թվում՝ փոստի օպերատորներ և էքսպրես փոխադրողներ:
Քննարկվել են ԵՏՀ որոշումների նախագծերը, որոնք մշակվում են Եվրասիական տնտեսական միության մաքսային օրենսգրքում արտաքին էլեկտրոնային առևտրի կարգավորման մասով փոփոխություններ կատարելու մասին արձանագրության զարգացման նպատակով:
«Հանձնաժողովի մի շարք որոշումներ, այդ թվում՝ էլեկտրոնային առևտրի ապրանքների հայտարարագրի, մաքսատուրքի միասնական դրույքաչափի առնչությամբ, պետք է սկսեն կիրառվել Արձանագրության ուժի մեջ մտնելու պահից։ Առանց այդ որոշումների հնարավոր չի լինի նոր դրույթների կիրառումը, և մեր խնդիրն է արագ ավարտին հասցնել նորմատիվ բազայի ձևավորումը, որպեսզի թե՛ բիզնեսը, թե՛ մաքսային մարմինները ժամանակին պատրաստ լինեն նոր իրողություններին», — նշել է Սերգեյ Վլադիմիրովը։
Վարչության տնօրենը նաև շեշտել է, որ Հանձնաժողովը նշված Արձանագրության զարգացման նպատակով պատրաստել է ակտերի մշակման համապատասխան ժամանակացույց՝ այս ուղղությամբ պլանային և կանխատեսելի աշխատանք ապահովելու համար:
Քննարկվել է էլեկտրոնային առևտրի ապրանքների հայտարարագրի ձևը և լրացման կարգը սահմանող ԵՏՀ կոլեգիայի որոշման նախագիծը, որը ձևավորվել է փորձագետների կողմից նախկինում արդեն հաստատված մոտեցումների քննարկման արդյունքում։
Բացի այդ, տեղի է ունեցել Հանձնաժողովի խորհրդի՝ ֆիզիկական անձանց կողմից ձեռք բերված էլեկտրոնային առևտրի ապրանքների մաքսատուրքի միասնական դրույքաչափը և էլեկտրոնային առևտրի օպերատորի համար ապահովման չափը սահմանող որոշման նախագծի քննարկումը, որի արդյունքում փորձագետները ստանձնել են այս հարցի մշակումը:
Տեղեկանք
2023 թվականի դեկտեմբերի 25-ին Եվրասիական տնտեսական բարձրագույն խորհրդում ստորագրվել է Միության մաքսային օրենսգրքում արտաքին էլեկտրոնային առևտրի կարգավորման մասով փոփոխություններ կատարելու մասին արձանագրությունը։
Եվրասիական միջկառավարական խորհրդի 2021 թվականի նոյեմբերի 19-ի N 10 որոշմամբ հաստատվել է Եվրասիական տնտեսական միության շրջանակներում էլեկտրոնային առևտրի զարգացման համար բարենպաստ պայմանների ստեղծման միջոցառումների պլանը (ճանապարհային քարտեզը):
Ճանապարհային քարտեզի 2-րդ կետին համապատասխան՝ Եվրասիական տնտեսական հանձնաժողովը ԵԱՏՄ պետությունների հետ միասին պետք է պատրաստի Հանձնաժողովի համապատասխան ակտեր, այդ թվում՝ էլեկտրոնային առևտրի ապրանքների հայտարարագրի ձևը և լրացման կարգը սահմանող ԵՏՀ ակտը:
