Նորություններ

Եվրասիական տնտեսական հանձնաժողովը, Ղազախստանի Հանրապետության արդարադատության նախարարությունը և «Հակակեղծարարություն» միջազգային ընկերակցությունը դեկտեմբերի 5-ից 6-ը Աստանայում կանցկացնեն «Հակակեղծարարություն» XII միջազգային համաժողովը։

Մտավոր սեփականության օբյեկտների նկատմամբ իրավունքների պահպանության և պաշտպանության արդիական հարցերին նվիրված համաժողովը հարթակ կդառնա առանցքային մարտահրավերները քննարկելու և կեղծ արտադրանքի տարածման դեմ պայքարում արդյունավետ լուծումներ գտնելու համար։

2019-2023 թվականներին Եվրասիական տնտեսական միության երկրներում բացահայտվել է մտավոր սեփականության ոլորտում ավելի քան 46 հազար խախտում և առգրավվել է ավելի քան 60 միլիոն միավոր կեղծ ապրանք։

ԵՏՀ էկոնոմիկայի և ֆինանսական քաղաքականության նախարար Բախիթ Սուլթանովի խոսքով, «իրավապահ» գործիքների և ԵԱՏՄ երկրներում արտաքին առևտրային գործունեության և օրինական արտադրության զարգացման համար տնտեսական խթանների համակցումն ուղղված է շուկայից կեղծ և կեղծված արտադրանքը դուրս մղելուն։

«Համոզված եմ, որ «Հակակեղծարարություն» համաժողովի շրջանակներում տեղի կունենա նշված հարցերի մասնագիտական քննարկում, ինչը, անկասկած, կնպաստի Եվրասիական տնտեսական միության շուկայում կեղծ արտադրանքի շրջանառության դեմ պայքարի արդյունավետության բարձրացմանը», - նշել է ԵՏՀ նախարարը։

Համաժողովի ծրագիրը ներառում է լիագումար նիստ՝ մտավոր սեփականության ոլորտի առաջատար փորձագետների մասնակցությամբ, 10 նստաշրջան-քննարկում, որոնք նվիրված կլինեն իրավական կարգավորմանը, մաքսային հսկողությանը, սպառողների իրավունքների պաշտպանությանը, էլեկտրոնային առևտրի զարգացմանը, ինչպես նաև մտավոր սեփականության ոլորտում ՏՏ տեխնոլոգիաների կիրառմանը։

Միջոցառմանը կմասնակցեն ԵԱՏՄ երկրների նախարարությունների և գերատեսչությունների ներկայացուցիչներ, իրավատերեր, ապրանք արտադրողներ, սպառողների ընկերակցություններ, փորձագետներ, մասնագիտական համայնքների և ԶԼՄ-ների ներկայացուցիչներ։