Եվրասիական տնտեսական միության երկրների կառավարությունների ղեկավարները հաստատել են Էլեկտրական էներգիայի փոխադարձ առևտրի կանոնները, ինչպես նաև Միջպետական հատումների թողունակության որոշման և բաշխման կանոնները։ Դրանք չորս հիմնական կանոններից երկուսն են, որոնք պետք է ընդունվեն Միությունում՝ էլեկտրաէներգիայի ընդհանուր շուկայի հաջող գործունեության համար։
Այս փաստաթղթերի ընդունմամբ ավարտվել է Միության ընդհանուր էլեկտրաէներգետիկ շուկայի գործունեության իրավական բազայի ձևավորման հերթական փուլը։ Եվրասիական տնտեսական հանձնաժողովի էներգետիկայի և ենթակառուցվածքի նախարար Արզիբեկ Կոժոշևի խոսքով՝ կանոնների այս փաթեթի ընդունումը լուրջ քայլ է նման շուկա ստեղծելու ճանապարհին։ Կանոնները թույլ կտան արագացնել կենտրոնացված առևտրի օպերատորների և գրանցողի պատրաստումը շուկայի գործունեությունն ապահովող անհրաժեշտ ենթակառուցվածքի ստեղծմանը:
Հանձնաժողովը և Միության երկրները դեռևս պետք է իրականացնեն ընդհանուր էլեկտրաէներգետիկ շուկայի գործունեության մնացած կանոնների և դրա պատշաճ աշխատանքն ապահովող նորմատիվ իրավական ակտերի նախապատրաստումն ավարտելուն ուղղված բազմատիվ միջոցառումներ:
Տեղեկանք
Էլեկտրաէներգիայի փոխադարձ առևտրի կանոնները նախատեսում են մասնակիցների ընդհանուր շուկա մուտք գործելու կարգը և ընթացակարգերը, անդամակցության համաձայնագրի կնքումը, ապագա շուկայի ենթակառուցվածքի հետ առևտրի մասնակիցների փոխգործակցության մեխանիզմները: Բացի այդ, կանոնները սահմանում են առուվաճառքի պայմանագրերի կնքման, գրանցման, հաշվառման, լուծման կարգը, պարունակում են միջպետական հատումների ցանկը, որոնցում իրականացվելու է առևտուրը:
Թողունակության որոշման և բաշխման կանոններն անհրաժեշտ պայմաններ են ապահովում ընդհանուր էլեկտրաէներգետիկ շուկայի գործունեության և դրա մասնակիցների կողմից էլեկտրահաղորդման միջպետական գծերի թողունակության ոչ խտրական օգտագործման համար: Կանոնների ընդունումն անհրաժեշտ է էլեկտրաէներգիա վաճառողների և գնորդների տնտեսական ռիսկերը նվազեցնելու համար, որոնք հնարավոր են Միության ընդհանուր շուկայում կնքված գործարքների տեխնիկական անիրագործելիության պատճառով։
