Навіны
На міжнароднай выставе «Інапрам» у Екацярынбургу адбылося пасяджэнне Савета па прамысловай палітыцы ЕАЭС
У парадак дня пасяджэння ўвайшлі пытанні аб асноўных напрамках прамысловага супрацоўніцтва ў рамках Еўразійскага эканамічнага саюза да 2030 года, ініцыятыўнай прапанове Расійскай Федэрацыі па распрацоўцы міждзяржаўнай праграмы развіцця робататэхнікі, вытворчасці і ўкаранення прамысловых робатаў у ЕАЭС, аб Еўразійскай сетцы прамысловай кааперацыі, субкантрактацыі і трансферу тэхналогій, а таксама аб ходзе рэалізацыі механізму аказання фінансавага садзейнічання сумесным кааперацыйным праектам у прамысловасці.
Удзельнікі пасяджэння ўхвалілі працу, якая праводзіцца, і праект асноўных напрамкаў прамысловага супрацоўніцтва (АНПС) – 2030 з пакетам дакументаў, неабходных для іх зацвярджэння. Згодна з праектам краіны ЕАЭС сканцэнтруюцца на вырашэнні задач па трох напрамках: выкарыстанне патэнцыялу рынку Саюза, прамыслова-тэхналагічнае ўзаемадзеянне і супрацоўніцтва на экспартных рынках.
«Прынцыпова новым з'яўляецца тое, што ўпершыню канкрэтныя мерапрыемствы па рэалізацыі АНПС аформлены дадаткам да дакумента, адлюстраваны ў выглядзе адпаведных інструментаў з указаннем форм рэалізацыі, тэрмінаў, а таксама адказных за выкананне. Яны будуць зацверджаны адначасова з АНПС, – адзначыла міністр па прамысловасці і аграпрамысловым комплексе Еўразійскай эканамічнай камісіі Гоар Барсегян. – Пасля разгляду ў вызначаным парадку дакумент плануецца вынесці на пасяджэнне Еўразійскага міжурадавага савета ў кастрычніку бягучага года».
Профільныя міністры краін Саюза ўзгаднілі падыходы і далі старт фарміраванню новай Еўразійскай тэхналагічнай платформы па развіцці вытворчасці і ўкараненні прамысловых робатаў.
Удзельнікі пасяджэння абмеркавалі таксама этапы перазапуску праекта «Еўразійская сетка прамысловай кааперацыі, субкантрактацыі і трансферу тэхналогій» і прынялі рашэнне працягнуць далейшую прапрацоўку падыходаў па яго перафармаціраванні.
Адносна рэалізацыі механізму аказання фінансавага садзейнічання сумесным кааперацыйным праектам у галінах прамысловасці Гоар Барсегян адзначыла, што Камісія праводзіць актыўную працу па інфармаванні бізнесу і фінансавых арганізацый аб умовах удзелу ў новым механізме. У прыватнасці, на сістэмнай аснове ажыццяўляецца кансультатыўная падтрымка дзяржаў-членаў пры фарміраванні імі кааперацыйных праектаў.
«У Камісію паступіла першая праектная прапанова, якая знаходзіцца на разглядзе, – паведаміла Гоар Барсегян. – Важна актывізаваць праектную актыўнасць бізнесу, і тут мы бачым сур'ёзны патэнцыял у пашырэнні міжрэгіянальных сувязяў краін «пяцёркі». У гэтым пытанні Камісія разлічвае на садзейнічанне зацікаўленых ведамстваў дзяржаў-членаў».
Бакі прынялі рашэнне актывізаваць працу па пошуку і падрыхтоўцы сумесных кааперацыйных праектаў у галінах прамысловасці.
