Навіны
Савет ЕЭК вызначыў арганізацыю для цэнтралізаванага гандлю электраэнергіяй на суткі наперад на агульным рынку Саюза
|
Савет Еўразійскай эканамічнай камісіі 4 ліпеня вызначыў акцыянернае таварыства «Адміністратар гандлёвай сістэмы аптовага рынку электраэнергіі» (Расійская Федэрацыя) арганізацыяй, якая ажыццяўляе арганізацыю цэнтралізаванага гандлю электрычнай энергіяй на суткі наперад на агульным электраэнергетычным рынку Еўразійскага эканамічнага саюза. Цяпер вызначаны ўсе прадугледжаныя Дагаворам аб Саюзе аператары цэнтралізаванага гандлю на агульным электраэнергетычным рынку. Стварэнне агульных рынкаў энергарэсурсаў ЕАЭС з'яўляецца адной з прыярытэтных задач. Чакаецца, што агульны саюзны рынак электраэнергіі пачне працаваць з 1 студзеня 2025 года. Плануецца, што на агульным электраэнергетычным рынку ЕАЭС краіны «пяцёркі» створаць умовы для ўдзелу ў трансгранічным гандлі ўсіх сваіх «аптавікоў». Добраахвотнасць, канкурэнцыя і празрыстае цэнаўтварэнне – гэта асноўныя прынцыпы, якія закладваюцца ў прававую базу функцыянавання рынку. Таксама Савет ЕЭК узгадніў тэрміны прадстаўлення правілаў функцыянавання агульнага электраэнергетычнага рынку ЕАЭС (узаемнага гандлю, вызначэння і размеркавання прапускных здольнасцяў міждзяржаўных ліній электраперадачы і інфармацыйнага абмену) кіраўнікам урадаў краін Саюза для прыняцця.
Цяпер праводзіцца сістэмная работа па фарміраванні агульнага электраэнергетычнага рынку Саюза. Ужо ўступіў у сілу міжнародны дагавор, зацверджаны правілы доступу да паслуг па міждзяржперадачы (транзіце) электраэнергіі, а таксама вызначаны гандлёвыя пляцоўкі, якія арганізуюць цэнтралізаваны гандаль электраэнергіяй па тэрміновых кантрактах на агульным рынку. Даведка Для цэнтралізаваных таргоў электраэнергіяй па тэрміновых кантрактах на аснове прапаноў краін ЕАЭС у лістападзе 2022 года Савет ЕЭК вызначыў тры гандлёвыя пляцоўкі: Беларускую ўніверсальную гандлёвую біржу (БУГБ), Казахстанскага аператара рынку электраэнергіі і магутнасці (КАРЭМ), Санкт-Пецярбургскую міжнародную таварна-сыравінную біржу (СПбМТСБ). Таргі будуць праходзіць у электроннай сістэме гандлю з выкарыстаннем біржавых механізмаў, а менавіта ананімнага двайнога сустрэчнага аўкцыёну.
|
