Навіны
Краіны ЕАЭС абмеркавалі фарміраванне агульнага фінансавага рынку і ўдасканаленне права Саюза ў фінансавай сферы
На Кансультатыўным камітэце па фінансавых рынках пры Калегіі Еўразійскай эканамічнай камісіі абмеркавалі падыходы да фарміравання агульнага фінансавага рынку і гарманізацыі заканадаўства ў сферы фінансавых паслуг. Пасяджэнне прайшло ў Маскве ў штаб-кватэры ЕЭК пад старшынствам міністра па эканоміцы і фінансавай палітыцы камісіі Бахыта Султанава.
У рамках канцэпцыі фарміравання агульнага фінансавага рынку ЕАЭС прадугледжана ўвядзенне механізму стандартызаванай ліцэнзіі, які забяспечыць узаемны доступ на рынкі пастаўшчыкоў фінансавых паслуг праз даччыныя арганізацыі і іх камерцыйную прысутнасць. Стандартызаваная ліцэнзія ўяўляе сабой спецыяльны дазвол, які выдаецца фінансавым рэгулятарам краіны паходжання мацярынскай арганізацыі.
Па словах Бахіта Султанава, гэты дакумент накіраваны на стварэнне ўмоў для ўзаемнага прызнання ліцэнзій на ажыццяўленне відаў дзейнасці ў банкаўскім і страхавым сектарах. Акрамя гэтага, ён закліканы павысіць даступнасць, якасць і разнастайнасць фінансавых паслуг для юрыдычных і фізічных асоб, а таксама развіць канкурэнцыю на фінансавым рынку.
«Пагадненне вызначае парадак і ўмовы выдачы стандартызаванай ліцэнзіі, патрабаванні да суіскальніка і ліцэнзіята, парадак стварэння або набыцця даччынай арганізацыі», – падкрэсліў міністр ЕЭК.
Праект Пагаднення ўстанаўлівае ўзаемны допуск пастаўшчыкоў фінансавых паслуг, уключаючы банкі і страхавыя арганізацыі, на нацыянальныя фінансавыя рынкі, што дазволіць спрасціць працэс заснавання або набыцця юрыдычнай асобы ў форме даччынай арганізацыі.
Акрамя таго, члены Кансультатыўнага камітэта разгледзелі праект рэкамендацыі Савета ЕЭК аб узгодненых прапановах па гарманізацыі заканадаўства дзяржаў Саюза ў частцы асноўных паняццяў і азначэнняў у сферы рэгулявання рынку каштоўных папер і ўстанаўлення патрабаванняў да рынкавых пасрэднікаў (брокераў).
Удзельнікі пасяджэння праінфармаваны аб рабоце над праектамі рэкамендацый Савета Камісіі, накіраваных на гарманізацыю заканадаўства ў сферы допуску банкаў і страхавых арганізацый на агульны фінансавы рынак, устанаўленне патрабаванняў да рынкавых пасрэднікаў (дылераў), развіццё інфраструктуры біржавога гандлю каштоўнымі паперамі, удасканаленне мер па супрацьдзеянні легалізацыі даходаў, атрыманых злачынным шляхам.
