Եվրասիական տնտեսական հանձնաժողովի խորհուրդը փոփոխություններ է կատարել Եվրասիական տնտեսական միության սակագնային առանձնաշնորհումների միասնական համակարգի օգտատեր հանդիսացող զարգացող և ամենաքիչ զարգացած երկրների ցանկերում։
Խոսքն այն պետությունների ցանկի արդիականացման մասին է, որոնց ԵԱՏՄ-ն միակողմանի կարգով սակագնային առանձնաշնորհումներ է տրամադրում մի շարք ապրանքների ներմուծման մաքսատուրքերի նվազեցման կամ զրոյացման տեսքով։
Ընդունված որոշումը հիմնված է տնտեսական ցուցանիշների փոփոխությունների վերլուծության վրա և նախատեսում է Հորդանանի, Լիբանանի և Սամոայի ներառումը ԵԱՏՄ սակագնային առանձնաշնորհումների միասնական համակարգի օգտատեր զարգացող երկրների կատեգորիայում (մինչև 2021 թվականը նրանք արդեն միութենական համակարգի շահառուներ էին):
Բացի այդ, հաշվի առնելով ըստ եկամտի մակարդակի երկրների դասակարգման մասին թարմացված տեղեկատվությունը, որը նախապատրաստվել է Համաշխարհային բանկի կողմից, որոշվել է համակարգի օգտատերերի ցանկից հանել Մարշալյան կղզիների Հանրապետությունը և
Էլ Սալվադորի Հանրապետությունը, ինչպես նաև վերանայել Բութանի Թագավորության և Սան Տոմեի և Փրինսիպիի Ժողովրդավարական Հանրապետության առանձնաշնորհային կարգավիճակը՝ ամենաքիչ զարգացածի փոխարեն դասակարգելով որպես զարգացող երկրներ։
«Այսօրվա որոշումը ԵՏՀ-ի կողմից Միության սակագնային առանձնաշնորհումների միասնական համակարգի կառավարման հետևողական աշխատանքի շարունակությունն է և կնպաստի զարգացող և ամենաքիչ զարգացած երկրների տնտեսական աճի համար պայմանների ստեղծմանը, ինչպես նաև ԵԱՏՄ անդամ պետությունների կողմից նրանց հետ առևտրի հետագա զարգացմանը», — նշել է Եվրասիական տնտեսական հանձնաժողովի առևտրի նախարար Անդրեյ Սլեպնևը։
Արտաքին առևտրային գործունեության իրականացման փոփոխվող պայմաններին տնտեսական օպերատորների հարմարեցման նպատակով ԵՏՀ խորհրդի որոշմամբ նախատեսված են համապատասխան անցումային շրջաններ։
ԵԱՏՄ սակագնային առանձնաշնորհումների միասնական համակարգն ուղղված է ամենաքիչ զարգացած և զարգացող երկրների տնտեսական աճը խթանելուն։ Դրա կիրառման պայմանների և կարգի վերաբերյալ հիմնադրույթը հաստատվել է Եվրասիական տնտեսական հանձնաժողովի խորհրդի 2016 թվականի ապրիլի 6-ի N 47 որոշմամբ։
ԵԱՏՄ-ի սակագնային առանձնաշնորհումների միասնական համակարգի օգտատեր երկրների ցանկերը հաստատվել են Մաքսային միության հանձնաժողովի 2009 թվականի նոյեմբերի 27-ի N 130 որոշմամբ։
Զարգացող կամ ամենաքիչ զարգացած երկրներից ծագող ապրանքների ցանկը, որոնց համար ԵԱՏՄ մաքսային տարածք ներմուծելիս տրամադրվում են սակագնային առանձնաշնորհումներ, հաստատվել է Եվրասիական տնտեսական հանձնաժողովի խորհրդի 2017 թվականի հունվարի 13-ի N 8 որոշմամբ:
