Տառատեսակի չափը. A A A

Կայքի գույները. C C C

Գրանցում կայքը Մորացել

Ընտրեք ամսաթվերը

Ընտրեք ուղղությունը

Որոնման արդյունքները 1012

15 հուլիսի 2025 ԵՏՀ-ն իրականացրել է Միության երկրներում աշխատանքային միգրացիայի ոլորտի օրենսդրական նախաձեռնությունների մշտադիտարկում Եվրասիական տնտեսական հանձնաժողովի կոլեգիան համաձայնեցրել է Եվրասիական տնտեսական միության պետությունների աշխատանքային միգրացիայի ոլորտի 2023-2024 թվականների ազգային օրենսդրական ակտերի մշտադիտարկման արդյունքները: Համաձայն հետազոտության՝ 2024 թվականին ԵԱՏՄ շրջանակներում աշխատանքային միգրանտների թիվը 2023 թվականի համեմատ ավելացել է 2.98%-ով: Նաև նշվել է, որ Միության երկրները շարունակում են կատարելագործել միգրացիոն կարգավորումը՝ հատուկ ուշադրություն դարձնելով ԵԱՏՄ քաղաքացիների իրավունքներին և ապօրինի միգրացիայի դեմ պայքարի միջոցներին:

11 հուլիսի 2025 ԵԱՏՄ երկրները քննարկում են քաղաքացիական ավիացիայում անօդաչու ավիացիոն համակարգերի օգտագործման և կարգավորման հեռանկարները «Անօդաչու ավիացիոն համակարգերը քաղաքացիական ավիացիայում. հեռանկարներ, մարտահրավերներ և կարգավորում» թեմայով կլոր սեղանի մասնակիցները քննարկել են քաղաքացիական նպատակների համար անօդաչու ավիացիոն համակարգերի (ԱԱՀ) շահագործման վիճակն ու հեռանկարները, անվտանգությունը անօդաչու թռչող սարքերի (ԱԹՍ) օգտագործման ընթացքում: Միջոցառումն անցկացվել է հուլիսի 10-ին և 11-ին Եվրասիական տնտեսական հանձնաժողովի կենտրոնակայանում ԵՏՀ էներգետիկայի և ենթակառուցվածքների նախարար Արզիբեկ Կոժոշևի նախագահությամբ: «Գլոբալ թվայնացման և արդյունավետ լոգիստիկ լուծումների պահանջարկի պայմաններում անօդաչու տեխնոլոգիաները նոր հնարավորություններ են առաջարկում տրանսպորտի անվտանգության բարձրացման, ծախսերի նվազեցման և ֆունկցիոնալության ընդլայնման համար», — նշել է Արզիբեկ Կոժոշևը: Միջոցառման շրջանակներում նաև կարծիքներ և միջազգային փորձ են փոխանակել ժամանակակից պայմաններում ԱԱՀ ոլորտի գործունեության կարգավորման հարցերով: Արդիական թեմաները և թեմային առնչվող միջազգային հարցերը ներկայացրել են քաղաքացիական ավիացիայի միջազգային կազմակերպությունների՝ Քաղաքացիական ավիացիայի միջազգային կազմակերպության (ՔԱՄԿ), Միջպետական ավիացիոն կոմիտեի (ՄԱԿ) և Օդային տրանսպորտի միջազգային ընկերակցության (ՕՏՄԸ) ներկայացուցիչները: Միջոցառման արդյունքների հիման վրա նախապատրաստվել է Բանաձև՝ թռիչքների անվտանգության մասին նորմատիվ ակտերի ներդաշնակեցման, թվային տեխնոլոգիաների, այդ թվում՝ արհեստական բանականության դերի և այլնի վերաբերյալ եզրահանգումներով ու հանձնարարականներով:

10 հուլիսի 2025 Բախիթ Սուլթանովը բանակցություններ է վարել արհեստական բանականության և հեղինակային իրավունքի հարցերի շուրջ Եվրասիական տնտեսական հանձնաժողովի տնտեսության և ֆինանսական քաղաքականության նախարար Բախիթ Սուլթանովը մասնակցել է Ժնևում Մտավոր սեփականության համաշխարհային կազմակերպության (ՄՍՀԿ) կենտրոնակայանում կայացած ՄՍՀԿ անդամ պետությունների ասամբլեաների նիստերի շարքին: Քննարկվել են մտավոր բանականության զարգացմանը և հեղինակային իրավունքի, ապրանքային նշանների, աշխարհագրական նշումների և արհեստական բանականության այլ օբյեկտների պահպանության ոլորտի իրավական կարգավորման կատարելագործմանն առնչվող հարցեր: Ասամբլեաների շրջանակներում կայացել է ԵՏՀ նախարարի հանդիպումը ՄՍՀԿ անցումային և զարգացած տնտեսություն ունեցող երկրների վարչության տնօրեն Հաբիբ Ասանի հետ: Կողմերը քննարկել են նախկինում ձեռք բերված պայմանավորվածությունների շրջանակներում Հանձնաժողովի և ՄՍՀԿ-ի փոխգործակցության արդյունքները: Այդ թվում՝ վերահաստատվել է 2025 թվականի հոկտեմբերին կայանալիք «Անտիկոնտրաֆակտ» միջազգային համաժողովին ՄՍՀԿ-ի ներկայացուցիչների և ՄՍՀԿ-ի մշտական հանձնաժողովների և աշխատանքային խմբի աշխատանքներին՝ Հանձնաժողովի ներկայացուցիչների մասնակցության հնարավորությունը: ԵԱՏՄ երկրներում մտավոր սեփականության արդյունավետ համակարգի ձևավորման աշխատանքներում Հանձնաժողովը հիմք է ընդունում ՄՍՀԿ-ի՝ որպես ամբողջ աշխարհում մտավոր սեփականության իրավունքների պահպանման գործում աջակցություն ցուցաբերող միջազգային կազմակերպության հսկայական փորձը», — նշել է Բախիթ Սուլթանովը: Բացի այդ, կայացել են ԵՏՀ նախարարի հանդիպումները Բելառուսի Հանրապետության մտավոր սեփականության ազգային կենտրոնի գլխավոր տնօրեն Ալեքսեյ Կուրմանի և Ղազախստանի Հանրապետության արդարադատության նախարարության մտավոր սեփականության իրավունքների կոմիտեի նախագահ Շոլպան Աբդրեեվը: Կողմերը քննարկել են մտավոր սեփականության ոլորտում համակարգային փոխգործակցության կառուցման, ինչպես նաև ԵԱՏՄ երկրների առջև դրված նպատակներին համապատասխան ինտեգրման ներուժի առաջմղման հարցեր, այդ թվում՝ «Եվրասիական տնտեսական ուղի» հռչակագրի իրականացման շրջանակներում: ՄՍՀԿ-ն ՄԱԿ համակարգի մասնագիտացված հաստատություն է, որին անդամակցում է 194 պետություն։ ՄՍՀԿ գործունեությունը նվիրված է մտավոր սեփականության հավասարակշռված և արդյունավետ միջազգային համակարգի զարգացմանը: Ասամբլեաների նիստերն անցկացվում են տարեկան կտրվածքով մտավոր սեփականության ոլորտում առկա ընթացիկ գլոբալ իրավիճակն ուսումնասիրելու նպատակով: 2019 թվականին ԵՏՀ-ի և ՄՍՀԿ-ի միջև կնքվել է Փոխըմբռնման հուշագիր:

02 հուլիսի 2025 Բախիթ Սոիլթանովը բանակցել է Ռուսաստանի Կենտրոնական բանկի նախագահ Էլվիրա Նաբիուլինայի հետ Եվրասիական տնտեսական հանձնաժողովի տնտեսության և ֆինանսական քաղաքականության նախարար Բախիթ Սուլթանովը հուլիսի 2-ին Սանկտ Պետերբուրգում՝ Ռուսաստանի Բանկի ֆինանսական կոնգրեսի շրջանակներում աշխատանքային հանդիպում է ունեցել Ռուսաստանի Դաշնության Կենտրոնական բանկի նախագահ Էլվիրա Նաբիուլինայի հետ: Կողմերը քննարկել են Եվրասիական տնտեսական միության ընդհանուր ֆինանսական շուկայի ներդաշնակեցման և հետագա ձևավորման մոտեցումները, «Եվրասիական տնտեսական ուղի» մինչև 2030 թվականը և մինչև 2045 թվականն ընկած ժամանակահատվածում ԵԱՏՄ շրջանակներում տնտեսական գործընթացների հետագա զարգացման մասին հռչակագրի իրականացման միջոցառումների պլանի նախագծի խնդրահարույց հարցերը: Այցի ընթացքում նաև կայացել է Բախիթ Սուլթանովի աշխատանքային հանդիպումը Ռուսաստանի Դաշնության Կենտրոնական բանկի փոխնախագահ Օլգա Պոլյակովայի հետ, որի ընթացքում քննարկել են ընդհանուր ֆինանսական դաշտի ձևավորման և ներդաշնակեցման հարցեր: «Ընդհանուր ֆինանսական շուկայի ձևավորումը ԵԱՏՄ ռազմավարական խնդիրներից մեկն է: Այս ոլորտում մոտեցումների ներդաշնակեցումը մեզ թույլ կտա ստեղծել միասնական, թափանցիկ և հուսալի ֆինանսական տարածք, ինչը, անշուշտ, հզոր խթան կդառնա ներդրումների համար, կայունություն կապահովի Միության բոլոր մասնակից երկրների տնտեսական զարգացման համար», — ընդգծել է ԵՏՀ նախարարը: Կոնգրեսը ավանդաբար Ռուսաստանի Բանկի ղեկավարության, Ռուսաստանի առաջատար ֆինանսական կազմակերպությունների, պետական իշխանության մարմինների և փորձագիտական համայնքի ներկայացուցիչների միջև բիզնես երկխոսությունների առաջավոր հարթակն է:  Մասնակիցները քննարկում են ֆինանսական շուկայի կարգավորման, դրա թվային ենթակառուցվածքների զարգացման հարցեր, բորսայական տարածքի և վճարային համակարգերի վիճակը և հեռանկարները: «Այնպիսի հարթակներ, ինչպիսին է Ռուսաստանի Բանկի ֆինանսական կոնգրեսը, կարևոր են կառուցողական երկխոսության զարգացման և ժամանակակից ֆինանսական միջավայրի առանցքային միտումների և մարտահրավերների քննարկման համար, մասնակիցներին թույլ են տալիս մշակել ԵԱՏՄ բոլոր երկրների ֆինանսական հատվածի կայունությանը և կայուն զարգացմանն ուղղված արդյունավետ միջոցներ», — նշել է Բախիթ Սուլթանովը:  

27 հունիսի 2025 Եվրասիական տնտեսական բարձրագույն խորհուրդը հավանություն է տվել ԵԱՏՄ-ում ծառայությունների առանձին հատվածների ազատականացման մասին զեկույցին Եվրասիական տնտեսական բարձրագույն խորհրդի նիստում ընդունվել է ԵԱՏՄ շրջանակներում ծառայությունների առանձին հատվածների ազատականացման պլանների իրագործման մասին զեկույցը: Զեկույցում ներկայացված են 2024 թվականի մշտադիտարկման արդյունքները հետևյալ ուղղություններով՝ զբոսաշրջություն, օդերևութաբանություն, մարքշեյդերական աշխատանքներ, գնահատման գործունեություն, շինարարություն և կինեմատոգրաֆիա: Նշվել են վարչական համագործակցության մասին համաձայնագրերի մշակումը, ինչպես նաև այդ հատվածներում կարգավորման ներդաշնակեցման համար մեթոդական հանձնարարականների մշակումն ավարտին հասցնելու հարցեր: «Զեկույցի ընդունումը վերահաստատում է առանց արգելքների ծառայությունների միասնական շուկայի ստեղծման մեր ընդհանուր մտադրությունը: Առանցքային հատվածների ազատականացումը նոր հնարավորություններ կբացահայտի բիզնեսի համար և կամրապնդի տնտեսական փոխգործակցությունը Միության երկրների միջև: Այժմ հատկապես կարևոր է կենտրոնանալ մեթոդական մոտեցումների համաձայնեցման վրա, որպեսզի հավասար պայմաններ ապահովենք շուկայի բոլոր մասնակիցների համար», — մեկնաբանել է Եվրասիական տնտեսական հանձնաժողովի տնտեսության և ֆինանսական քաղաքականության նախարար Բախիթ Սուլթանովը:  

27 հունիսի 2025 ԵԱՏՄ-ում ամփոփել են Ծառայությունների առևտրի կարգավորման կանոնների պահպանման 2023-2024 թվականների արդյունքները Եվրասիական տնտեսական բարձրագույն խորհուրդը քննարկել է Եվրասիական տնտեսական միության պետությունների կողմից Ծառայությունների առևտրի, հիմնադրման և գործունեության կարգավորման կանոնների կատարման 2023-2024 թվականների մշտադիտարկման արդյունքների մասին զեկույցը, որը նախապատրաստել են երկրների կառավարությունները Եվրասիական տնտեսական հանձնաժողովի հետ համատեղ: Զեկույցում ներկայացված են Կանոնների պահպանման առանցքային ասպեկտները, մասնավորապես՝ պետություններում ձեռնարկատերերի համար բարենպաստ ընթացակարգերի կիրառումը: Դրանց թվում են բիզնեսի ստուգման ժամանակ կարգավորող ազդեցության գնահատումը (ԿԱԳ), «լռությունը համաձայնության նշան է» սկզբունքի կիրառումը և ռիսկին կողմնորոշված մոտեցման ներդրումը: «Մենք դրական դինամիկա ենք տեսնում մասնակից երկրների կողմից Կանոններն իրենց օրենսդրությունում կիրարկելու գործում: Զեկույցը հաստատում է, որ փաստաթղթով նախատեսված պայմանների իրագործումը հասնում է 100 տոկոսի: Սա կարևոր քայլ է Միության շրջանակներում բիզնեսի համար թափանցիկ և հարմարավետ պայմանների ստեղծման ուղղությամբ», — նշել է ԵՏՀ տնտեսության և ֆինանսական քաղաքականության նախարար Բախիթ Սուլթանովը: ԵՏՀ նախարարը կարևորել է «լռությունը համաձայնության նշան է» սկզբունքի ներդրումը, համաձայն որի՝ պետության իրավասու մարմինը սահմանված ժամկետում դիմողին պետք է տրամադրի համապատասխան թույլատվություն կամ ներկայացնի պատճառաբանված մերժում, հակառակ դեպքում դիմողը ինքնաբերաբար ստանում այն գործունեության թույլտվություն, որի իրականացման համար ներկայացվել էր դիմումը: 2023-2024 թվականների, ինչպես նաև նախորդ ժամանակահատվածների զեկույցին կարող եք ծանոթանալ Հանձնաժողովի կայքում:

27 հունիսի 2025 ԵԱՏՄ-ում սահմանվել են սպորտի ոլորտում տնտեսական համագործակցության հիմնական ուղղությունները: Այսօր Եվրասիական տնտեսական միության հինգ պետությունների ղեկավարները հաստատել են Սպորտի ոլորտում տնտեսական համագործակցության հիմնական ուղղությունները: Մինչև 2025 թվականը եվրասիական տնտեսական ինտեգրման զարգացման ռազմավարությամբ նախատեսված փաստաթուղթը սահմանում է համագործակցության հիմնական ուղղությունները՝ սպորտային ենթակառուցվածքի զարգացումը, սպորտային ապրանքների արտադրության ավելացումը և դրանց փոխանակումը, սպորտային արդյունաբերության ծառայությունների զարգացումը՝ ներառյալ սպորտային զբոսաշրջությունը, ինչպես նաև սպորտային համաժողովների ու ցուցահանդեսների կազմակերպումը: Որպես տնտեսական համագործակցության հիմնական գործոններ առանձնացվել են «հնգյակի» երկրների աշխարհագրական մոտիկությունը և զարգացած սպորտային ենթակառուցվածքը: «Միասնաբար այս գործոնները բարենպաստ հիմք են ստեղծում սիներգետիկ արդյունքի և կոոպերացիոն գործընթացների խորացման համար: Համատեղ ջանքերով մենք Միության երկրների քաղաքացիներին կարող ենք ապահովել որակյալ սպորտային արտադրանքով, զարգացնել սպորտային ենթակառուցվածքը և սպորտի ոլորտում տնտեսական փոխգործակցությունը նոր մակարդակ բերել», — փաստաթուղթը մեկնաբանել է Եվրասիական տնտեսական հանձնաժողովի տնտեսության և ֆինանսական քաղաքականության նախարար Բախիթ Սուլթանովը:  

26 հունիսի 2025 ԵՏՀ-2025-ում քննարկել են Եվրասիական տնտեսական միությունում աշխատանքային միգրացիայի ապագան ԵԱՏՄ միասնական աշխատաշուկայի գործունեությունը, ընթացիկ դժվարությունները և զարգացման ռազմավարական ուղղությունները քննարկել են Մինսկում Եվրասիական տնտեսական համաժողով 2025-ի շրջանակներում անցկացված «Միասնական աշխատաշուկա/ մարտահրավերներ և հեռանկարներ» թեմատիկ նստաշրջանի մասնակիցները: Մոդերատորն էր Եվրասիական տնտեսական հանձնաժողովի էկոնոմիկայի և ֆինանսական քաղաքականության նախարար Բախիթ Սուլթանովը։  Բացելով քննարկումը՝ ԵՏՀ նախարարը նշել է. «ԵԱՏՄ-ի համար միասնական աշխատաշուկան եվրասիական ինտեգրման գործընթացների արդյունավետության յուրօրինակ ցուցիչ է, քանի որ գրա գործունեության որակը մեծապես որոշում է, թե որքանով են քաղաքացիներն ըմբռնում ինտեգրման իրական առավելությունները և վստահում դրանց»: Ըստ Բախիթ Սուլթանովի՝ Միության գործունեության 10 տարվա ընթացքում ապահովվել է աշխատանքային միգրացիայի հավասար հասանելիությունը ԵԱՏՄ երկրների քաղաքացիների համար, աշխատանքի տեղավորման ժամանակ կրթության փաստաթղթերի ուղղակի ճանաչումը, լուծվել են աշխատավոր միգրանտների սոցիալական և կենսաթոշակային ապահովության հարցերը:  «Այս միջոցների արդյունքում զգալիորեն աճել է շարժունակությունը. աշխատավոր միգրանտների ամենամյա հոսքը 2016 թվականի 770 հազարից 2024 թվականին աճել է մինչև ավելի քան 1 մլն», - հայտնել է Բախիթ Սուլթանովը: Նստաշրջանի շրջանակներում քննարկվել են միասնական աշխատաշուկայի հետագա զարգացման ուղղությունները՝ ներառյալ իրավական դաշտի կատարելագործումը: Հանձնաժողովը մշտապես մշտադիտարկում է ԵԱՏՄ երկրների ազգային օրենսդրությունների փոփոխությունների համապատասխանությունը Միության աշխատանքային միգրացիայի ոլորտի իրավունքին: Զարգացման կարևոր ուղենիշ է համարվել աշխատանքային միգրացիայի ոլորտի գործընթացների թվայնացումը: Մասնակիցները համակարծիք էին, որ անհրաժեշտ է թվային լուծումների համատեղ առաջմղում և ներդրում: Նշվել է, որ թվայնացումը թույլ կտա ոչ միայն օպտիմալացնել գործընթացները, այլև ԵԱՏՄ քաղաքացիներին ապահովել աշխատանքի տեղավորման հնարավորությունների և կեցության պայմանների մասին ավելի լիարժեք և օպերատիվ տեղեկատվությամբ՝ նվազագույնի հասցնելով արգելքները և ապօրինի միգրացիայի ռիսկերը: Նստաշրջանում հատուկ անդրադարձել են «հարթակային զբաղվածությանը», որն ակտիվորեն զարգանում է, բայց դեռևս չունի վերազգային կարգավորում ԵԱՏՄ-ում, իսկ Միության անդամ պետություններում զբաղվածության այս ձևի կարգավորումը զարգացման փուլում է: «Մեր հետագա հաջողությունը կախված է փոփոխություններին օպերատիվորեն արձագանքելու, գործուն միջոցներ առաջարկելու և Միության երկրների քաղաքացիների պահանջները հաշվի առնելու կարողությունից: Միևնույն ժամանակ, կարևոր է այս աշխատանքներին ներգրավել հետաքրքրված կողմերի առավելագույնս լայն շրջանակ», - ընդգծել է ԵՏՀ նախարարը: Քննարկմանը մասնակցել են պետական մարմինների, բիզնեսի, արհմիությունների և միջազգային կազմակերպությունների ներկայացուցիչներ: ԵՏՀ-ն ԵԱՏՄ երկրների հետ համատեղ կմշակի նստաշրջանում ներկայացված բազմաթիվ նախաձեռնություններ միասնական աշխատաշուկայի հետագա զարգացման և դրա արդյունավետության բարձրացման համար:

Ցուցադրել ավելին