Жаңалықтар
ЕЭК шикі глицерин мен феррониобийге қатысты әкелу бажын екі жылға нөлге түсірді
Еуразиялық экономикалық комиссия Алқасы ЕАЭО СЭҚ ТН 1520 00 000 0 позициясын шикі глицеринге, глицерин суына және глицерин сілтісіне қатысты кедендік әкелу баждарының ставкаларын екі жыл мерзімге 5-тен 0%-ға дейін төмендету туралы шешім қабылдады.
"Аталған шикізатқа ставканы нөлге түсіру кейіннен тамақ, косметика және фармацевтика салаларында қолданылатын тазартылған глицерин өндірісінің өзіндік құнын төмендетуге мүмкіндік береді. Бұл өз кезегінде өнеркәсіп және ауыл шаруашылығы өндірісін ұлғайтуға ықпал етеді, сондай-ақ ЕАЭО елдері өнімдерінің бәсекеге қабілеттілігін арттырады", — деп атап өтті ЕЭК Кедендік-тарифтік реттеу және тарифтік емес реттеу департаментінің директоры Ваагн Казарян. Бұл ретте ол шикі глицериннің Еуразиялық экономикалық одақ аумағында өндірілмейтінін атап көрсетті.
Бұдан басқа, арнайы болат: беріктігі жоғары құбырлы болатты, конструкциялық болатты, дәнекерленетін және суыққа төзімді болатты өндіру үшін пайдаланылатын феррониобийге (ЕАЭО СЭҚ ТН 7202 93 000 0 коды ) қатысты ставка екі жыл мерзімге 5-тен 0%-ға дейін төмендетілді. Тиісті қорытпа ыстыққа төзімді және тот баспайтын болаттарға қосылған кезде илемділік пен коррозияға төзімділікті арттырады, ал құрылымдық болаттарға феррониобий енгізу дәнекерлеуді жақсартады, беріктік пен илемділікті арттырады.
"Шараны енгізу ЕАЭО нарығында феррониобий тапшылығын жоюға, арнайы болаттар өндірісінің өзіндік құнын төмендетуге, бәсекеге қабілеттілікті арттыруға және елдеріміздің кәсіпорындарының өндірістік қуаттарын жүктеуді ұлғайтуға жәрдемдесетін болады", — деді Ваагн Казарян.
Шешімдер ресми жарияланған күнінен бастап күнтізбелік 30 күн өткен соң күшіне енеді.
