Жаңалықтар

24.11.2023 (Обновлено: 06.12.2023 12:19)

ЕЭК Кеңесі дамушы және аз дамыған елдерден әкелінетін тауарлардың шығарылған елін растау бойынша жеңілдетілген рәсім мерзімін ұзартты

Еуразиялық экономикалық комиссия Кеңесі дамушы және аз дамыған елдерден әкелінетін тауарларға қатысты тарифтік преференциялар беру кезінде қолданыстағы оңайлатуларды бір жыл мерзімге ұзарту туралы шешім қабылдады. Тиісті оңайлатулар Комиссия Кеңесінің 2022 жылғы 17 наурыздағы № 33 шешімінде көзделген және 2023 жылғы 31 желтоқсанға дейін қолданылуы тиіс болатын.

Атап айтқанда, тауардың шығарылған елі туралы сертификаттардың көшірмелерін пайдалану мүмкіндігі ұзартылды (мұндай құжаттардың түпнұсқаларын алты ай мерзім ішінде міндетті түрде ұсыну талабымен).

Бұдан басқа, 2024 жылғы 31 желтоқсанға дейін ЕАЭО елінен шаруашылық жүргізуші субъект пен дамушы немесе аз дамыған елден шаруашылық жүргізуші субъект арасында тікелей келісімшарт жасасудан тұратын тауарларды тікелей сатып алу шарты қолданылмайды.

«Қабылданған шешім импорттаушыларға сыртқы саудада сақталып келе жатқан жағымсыз құбылыстарды еңсеру мақсатында тауарлардың шығарылған елін растау бойынша дәлелденген оңайлатылған механизмін пайдалануды жалғастыруға мүмкіндік береді», – деп түсіндірді ЕЭК сауда министрі Андрей Слепнев.

 


Анықтама

Бұған дейін Комиссия Кеңесі еркін сауда туралы келісімдер бойынша ЕАЭО-ның әріптес елдерінен әкелінетін тауарлардың шығарылған елін құжаттамалық растау бойынша оңайлатылған рәсімді ұзартуды көздейтін 2023 жылғы 20 қазанда № 120 шешімді қабылдаған болатын.