Андрей Слепнёв: "ЕАЭБдин жана Египеттин соода-экономикалык мамилелери тездетилген темптер менен өнүгүүсүн улантууда"

12.09.2022

Андрей Слепнёв: "ЕАЭБдин жана Египеттин соода-экономикалык мамилелери тездетилген темптер менен өнүгүүсүн улантууда"

Бул тууралуу Евразия экономикалык комиссиясынын соода боюнча министри Андрей Слепнёв Египеттин Россиядагы Атайын жана Ыйгарым укуктуу Эличиси Назих Али Бахаэльдин Эльнаггари менен жолугушуусунун жүрүшүндө билдирди.

"Египет менен мамилелерди өнүктүрүү маселеси биз үчүн абдан маанилүү жана биз ага чоң көңүл бөлөбүз. Соода активдүү өнүгүп жатканын көрүп турабыз: бул жылы товар жүгүртүү өткөн жылга салыштырмалуу дээрлик 40%га өсүүдө, буга чейин да өсүш болуп келген, – деп белгиледи Андрей Слепнёв. – Биздин Египетке жеткирүүлөрүбүз да, Египеттин бизге жеткирүүлөрү да өсүүдө. Биздин экономикалык өз ара аракеттенүүбүздүн масштабдарын чоңойтууну көздөөдөбүз".

ЕЭКтин соода боюнча министринин айтуусу боюнча, бул максатта эркин соода жөнүндө макулдашуунун үстүнөн активдүү иш алып барылууда. Сүйлөшүүлөрдүн кийинки раунду 11-13-октябрда Шарм-эль-Шейхте өткөрүлмөкчү.

"Сүйлөшүүлөрдүн бул раундуна чоң маани беребиз, анткени ал белгилүү бир мааниде аныктоочу раунд болушу мүмкүн. Негизги маселе – импорт алымдарын өз ара төмөндөтүү параметрлери, ошондой эле макулдашуунун долбоорунун аяккы текстин даярдоо боюнча бир кыйла алга жылабыз деген үмүттөбүз", – деп Андрей Слепнёв баса белгиледи.

Анын айтымында, бүгүнкү күндө Евразия экономикалык бирлигинде Египеттеги Россия өнөр жай аймагы долбооруна чоң көңүл бөлүнүүдө. Долбоорго Россия Федерациясынын гана эмес, ЕАЭБдин бакша мамлекеттеринин да компаниялары кызыгуусун билдирүүдө. "Келечекте Беларустун, Казакстандын жана Бирликтин башка өлкөлөрүнүн ишканалары аталган аймактын резиденттери болоруна ишенем", – деди Андрей Слепнёв.

Аягында министр Египеттин кызматка жакында дайындалган соода жана өнөр жай министри Ахмед Самир Салех менен ушул жылдын аягына чейин жеке жолугушуу өткөрүүгө кызыкдарлыгын тастыктады. Тараптар мунун майда-чүйдөсүн сүйлөшүүлөрдүн кийинки раундунун аягына чейин макулдашуу жөнүндө келишишти.