Жаңылыктар
Арзыбек Кожошев БУУ ЕЭКте ЕАЭБде транспортту декарбонизациялоо боюнча иштер жөнүндө айтып берди
ЕЭКтин энергетика жана инфраструктура боюнча министри Арзыбек Кожошев Женевада өтүп жаткан БУУнун Европа экономикалык комиссиясынын Ички транспорт боюнча комитетинин 87-сессиясына катышты. Иш-чаранын негизги темасы транспортту декарбонизациялоо болду.
"Бүгүнкү күндө биздин жашообузду транспортсуз элестетүү кыйын, ал мамлекеттердин экономикасынын көптөгөн секторлорун жана тармактарын өнүктүрүүнүн негизги фактору болуп саналат. Ошону менен бирге транспортту узак мөөнөттүү өнүктүрүү стратегиясын иштеп чыгууда курчап турган чөйрө үчүн мүмкүн болгон кесепеттерди эске алуу зарыл", — деп белгиледи Арзыбек Кожошев.
ЕЭК министри Евразия экономикалык комиссиясынын климаттык күн тартиби боюнча иши жөнүндө маалымдады жана ЕАЭБ өлкөлөрү тарабынан кабыл алынып жаткан экономикалык саясаттын чаралары туруктуу экономикалык өсүштү колдоого багытталгандыгын белгиледи.
Ошондой эле министр Комиссия тарабынан маалымдоонун жана жолдорго мониторинг жүргүзүүнүн алдыңкы ыкмаларын санариптештирүү жана жайылтуу боюнча жүргүзүлүп жаткан иштерди өзүнчө белгилеп, ЕАЭБде интеллектуалдык транспорттук тутумдардын өз ара иштешүүсүн жакшыртуу концепциясы жактырылгандыгын баса белгиледи.
Арзыбек Кожошев маалымдагандай, 2023-жылдан тарта эң мыкты технологияларды издөө жана илгерилетүү максатында Евразия экономикалык комиссиясы "Жашыл Евразия" эл аралык климаттык конкурсун өткөрүп келет. Анын жүрүшүндө буга чейин 300 өлкөдөн 12ден ашык практикалар катышкан.
"Бардык деңгээлдердеги тыгыз кызматташтык гана транспорт чөйрөсүн жакшыртып гана тим болбостон, курчап турган чөйрөгө жана климатка терс таасирди да азайта алат", — деп белгиледи ЕЭК министри.
