10-сентябрда ЕЭКтин энергетика жана инфраструктура боюнча министри Арзыбек Кожошевдин Минскиге болгон жумушчу сапарынын алкагында ЕЭК Кеңешинин мүчөсү, Беларусь Республикасынын Премьер-министринин орун басары Игорь Петришенко менен жумушчу жолугушуу болуп өттү.
Тараптар газдын жалпы рыногун жана Евразия экономикалык бирлигинин мунай жана мунай өнүмдөрүнүн жалпы рыногун түзүүнүн жүрүшүн, анын ичинде газ жана мунай боюнча эл аралык келишимдердин долбоорлорун макулдашууну талкуулашты.
"Келишимдерди кабыл алуу аталган багыттар боюнча жалпы рыноктордун иштөө механизмдерин андан ары өркүндөтүү процессин баштоого, жалпы рыноктордо ийкемдүү экономикалык саясатты жүргүзүү үчүн шарттарды түзүүгө мүмкүндүк берет", — деп баса белгиледи Арзыбек Кожошев.
ЕЭК министри жолугушуунун катышуучуларына газ, мунай жана мунай өнүмдөрүнүн жалпы рынокторун түзүү боюнча аткарылган иштер жөнүндө маалымдап, макулдашылбаган маселелер боюнча чечимдерди кабыл алуу үчүн күч-аракеттерди мындан ары концентрациялоо зарылдыгын белгиледи.
Комиссия 2023-жыл үчүн ЕАЭБдин жалпы энергетикалык рынокторун: газ рыногу жана мунай жана мунай өнүмдөрү рыноктору боюнча түзүүнүн жүрүшү жөнүндө эки баяндама даярдап, тараптар менен макулдашты. Маалымат ЕЭК Кеңешинин кезектеги отурумунда кароо үчүн берилет, деп белгиледи Арзыбек Кожошев.
Мындан тышкары, 2024-2026-жылдарга транспорт саясатын ишке ашыруу боюнча жол картасынын долбоорунун макулдашылган редакциясы талкууланды, бул документ ЕЭК Кеңешинин 24-сентябрдагы отурумунда каралат. ЕЭК министри белгилегендей, аны кыска мөөнөттө кабыл алуу зарыл. Принципиалдуу пикир келишпестиктер болгон иш-чаралар боюнча сүйлөшүүлөрдүн кошумча раунду өткөрүлөт жана өз ара алгылыктуу чечимдер иштелип чыгат.
