Жаңылыктар
Бакытжан Сагинтаев ШКУнун Башкы катчысы Чжан Мин менен сүйлөшүүлөрдү жүргүздү
Евразия экономикалык комиссиясынын Коллегиясынын Төрагасы Бакытжан Сагинтаев жана Шанхай кызматташтык уюмунун (ШКУ) Башкы катчысы Чжан Мин 3-июлда Астанада сүйлөшүүлөрдүн жүрүшүндө мындан аркы өз ара аракеттенүү маселелери боюнча кеңири пикир алмашышты.
Атап айтканда, тараптар ЕЭК жана ШКУ Катчылыгынын ортосунда Өз ара түшүнүшүү жөнүндө меморандумдун алкагында Евразия экономикалык бирлигинин жана ШКУ өлкөлөрүнүн кызматташтыгынын перспективаларын талкуулашты.
Жолугушуунун жүрүшүндө Бакытжан Сагинтаев белгилегендей, учурда Меморандумду ишке ашыруу боюнча иш-чаралар планын даярдоо аяктап жатат. Буга байланыштуу ЕЭК Коллегиясынын Төрагасы ушул жылдын күзүндө Арменияда өтө турган Евразия экономикалык форумунун талааларында документке кол коюуну уюштурууну сунуштады.
"ЕАЭБ - ШКУ" форматында мындан аркы өз ара иштешүүнүн мүмкүнчүлүктөрү жөнүндө айтып жатып, ЕЭК Коллегиясынын башчысы Евразия экономикалык бирлигинин мамлекеттеринин эл аралык транспорттук коридорлорду, мультимодалдык жана контейнердик ташууларды өнүктүрүүгө, региондо жүк ташууларды санариптештирүүгө кызыкдарлыгын баса белгиледи.
Буга байланыштуу, биргелешкен мамилелерди иштеп чыгууну тездетүү үчүн Бакытжан Сагинтаев жакын арада ШКУнун катышуучу өлкөлөрүнүн транспорт министрлеринин жана ЕАЭБ мамлекеттеринин транспорт жаатындагы ыйгарым укуктуу органдарынын жетекчилеринин кеңешинин биргелешкен кеңешмесин өткөрүүнү сунуштады.
Тараптар ошондой эле ШКУнун штаб-квартирасында "ЕАЭБ күндөрүн" өткөрүү жөнүндө ЕЭКтин демилгесин карашты.
"Бул иш-чара, сөзсүз түрдө, бизнес-коомдоштугунун өкүлдөрүнүн көңүлүн бурат. Тажрыйба жана мыкты практикалар менен алмашуу биздин өлкөлөрдүн ортосундагы соода-экономикалык кызматташтыкты өнүктүрүүгө өбөлгө болот деп ишенем", – деп белгиледи Бакытжан Сагинтаев.Өз кезегинде Чжан Мин белгилегендей, ШКУ менен ЕАЭБдин өз ара аракеттенүү фактору заманбап дүйнөлүк архитектурада барган сайын маанилүү болуп баратат. Интеграциялардын экономикалык маселелер боюнча практикалык тажрыйба алмашууга басым жасоо менен диалогу Чоң Евразияны өнүктүрүү үчүн ыңгайлуу жана ишенимдүү шарттарды камсыз кылууга багытталган.
