Жаңылыктар

12.02.2024 (Обновлено: 13.02.2024 13:22)

Бакытжан Сагинтаев Армения Республикасынын Премьер-министри Никол Пашинян менен сүйлөшүүлөрдү өткөрдү

Евразия экономикалык комиссиясынын Коллегиясынын Төрагасы Бакытжан Сагинтаев 12-февралда Ереванда Армения Республикасынын Премьер-министри, Жогорку Евразия экономикалык кеңешинин Төрагасы Никол Пашинян менен сүйлөшүүлөрдү өткөрдү.

Жолугушуунун жүрүшүндө Никол Пашиняндын жакында Евразия экономикалык бирлигинин мүчө мамлекеттеринин башчыларына 2024-жылы ЕАЭБ органдарында Армениянын төрагалыгына байланыштуу кайрылуусунда белгиленген багыттар талкууланды.

Бакытжан Сагинтаев Армения Республикасынын Премьер-министрине армян төрагалыгынын артыкчылыктарын ишке ашыруу боюнча Евразия экономикалык комиссиясынын иш-аракеттер планы жөнүндө маалымдады.

Пландын долбоору Комиссиянын түзүмдүк бөлүмдөрүнүн сунуштарынын негизинде даярдалган жана анда Армениянын Премьер-министринин Кайрылуусунда белгиленген 16 милдетти ишке ашыруу каралган. Аларды аткаруу үчүн ишке ашыруу мөөнөтү 2024-2026-жылдарга чейин, ошондой эле туруктуу негизде жүргүзүлүүчү 57 пункт түзүлгөн.

Атап айтканда, Комиссия мүчө мамлекеттер менен биргеликте ЕАЭБ алкагында 2030-жылга чейин жана 2045-жылга чейинки мезгилде экономикалык процесстерди андан ары өнүктүрүү жөнүндө "Евразия экономикалык жолу" декларациясын ишке ашыруу боюнча жол картасынын долбоорун иштеп чыгууну жана ЕЭК Кеңешине бекитүүгө сунуштоону пландаштырган.

ЕАЭБдин энергетикалык коопсуздугунун негизги ыкмалары жана принциптери, ошондой эле багыттары боюнча сунуштарды иштеп чыгуу белгиленген.

Иш-чаралар планынын долбооруна киргизилгендердин арасында - Комиссиянын мүчө мамлекеттердин айыл чарба продукциясы жана азык-түлүк менен камсыздалышына мониторинг жүргүзүүсү, ЕАЭБ мамлекеттери менен биргеликте тоскоолдуктарды жана тоскоолдуктар белгилери бар кедергилерди толук жоюу боюнча тутумдук ишти улантуусу каралган.

Бакытжан Сагинтаев Ереванда ошондой эле Армения Республикасынын Президенти Ваагн Хачатурян жана Армения Республикасынын Вице-премьер-министри, ЕЭК Кеңешинин төрагасы Мгер Григорян менен жолугушту.