19-апрелде Пекинде Евразия экономикалык комиссиясынын соода боюнча министри Андрей Слепневдун жана Кытай Эл Республикасынын коммерция боюнча вице-министри Ли Фэйдин биргелешкен төрагалыгы астында Евразия экономикалык бирлиги менен КЭРдин ортосундагы Соода-экономикалык кызматташтык жөнүндө макулдашууну ишке ашыруу боюнча Биргелешкен комиссиянын отуруму болуп өттү.
Тараптар Макулдашууну имплементациялоо боюнча 2023-жылы жүргүзүлгөн иштерди жогору баалашты.
Өткөн отурумда бекитилген, ЕАЭБ менен КЭРдин ортосундагы соода-экономикалык кызматташтыкты өнүктүрүү боюнча жол картасын ишке ашыруунун жүрүшү тыкыр каралды. Россиянын жана Кытайдын темир жол ташуучулары менен алардын сертификациялык борборлорунун ортосунда эл аралык ташууларды кагазсыз технологияны колдонуу менен уюштуруу жөнүндө макулдашууларга кол коюу боюнча ишти тез арада аяктоо жөнүндө макулдашууга жетишилди, бул ЕАЭБ өлкөлөрү менен КЭРдин ортосунда транспорттук коридорлорду санариптештирүүнү өнүктүрүүгө өбөлгө түзөт.
Тараптар климаттык күн тартиби, Бирликти жана Кытайды өнүктүрүү стратегиялары, жол картасынын жоболорунда каралган рынокту жана электрондук сооданы коргоо чаралары жаатында консультацияларды улантуунун маанилүүлүгүн баса белгилешти. Мамлекеттик сатып алуулар жана биржалар аралык кызматташуу жаатында үзгүлтүксүз диалогду жолго коюу белгиленген.
Мындан тышкары, Биргелешкен комиссия техникалык жөнгө салуу, СФС-чараларын колдонуу, бажы жана тармактык кызматташуу чөйрөлөрүндө өз ара аракеттенүүнү кеңейтүү боюнча жыйынтыктарды жана мындан аркы кадамдарды талкуулады. ЕАЭБден Кытайга темир жол транспорту менен азык-түлүк продукциясын тездетилген ташууну жүзөгө ашырууга багытталган "Евразия агроэкспресс" долбоорун өнүктүрүүгө көмөктөшүү ниети өзүнчө белгиленген.
"Азыркы учурда биздин Бирлик өлкөлөрү менен КЭР ортосундагы мамилелер болуп көрбөгөндөй жогорку деңгээлде турат, бул товар жүгүртүүнүн өсүшүнүн дайындары менен тастыкталат. 2023-жылы бул көрсөткүч 2022-жылга салыштырмалуу дээрлик төрттөн бирине көбөйгөн. Кийинки жылы соода жол-жоболорун жөнөкөйлөтүү боюнча салттуу маселелерден, ошондой эле климат жана электрондук соода боюнча жаңы багыттардан тышкары, биз ЕАЭБ жана КЭРдин илимий чөйрөлөрү тарабынан соода-экономикалык кызматташтыкты өнүктүрүүнүн келечеги жөнүндө өткөрүлгөн биргелешкен изилдөөнүн жыйынтыктары боюнча аныкталган өз ара иштешүүнү тереңдетүүнүн башка багыттарын да талкуулайбыз деп ишенем", — деди Андрей Слепнев сөз жыйынтыгында.
Сапардын жүрүшүндө ЕЭК министри "Кытай темир жолдору" мамлекеттик компаниясынын штаб-квартирасына барып, анда анын башкы директору Гуо Чжусе менен консультацияларды, ошондой эле ЕАЭБ мүчө мамлекеттеринин дипломатиялык өкүлчүлүктөрүнүн башчылары менен жумушчу жолугушуу өткөрдү.
