Евразия экономикалык бирлигинин айыл чарбасын санариптештирүү глобалдык рынокторго жеткиликтүүлүктү камсыз кылат, азык-түлүк ресурстарынын коопсуздугун жогорулатат жана каржылык кызмат көрсөтүүлөргө жеткиликтүүлүктү жөнөкөйлөтөт. Бул артыкчылыктар Алматыда Digital Almaty 2025 форумунун алкагында "Санариптештирүү ЕАЭБдин агрардык секторунун атаандаштыкка жөндөмдүүлүгүн жогорулатуу боюнча ийгиликтин фактору катары" панелдик сессиясында талкууланды.
ЕАЭБдин агроөнөр жай комплексинин санариптик экономикасын өнүктүрүү жөнүндө айтып жатып, Евразия экономикалык комиссиясынын өнөр жай жана агроөнөр жай комплекси боюнча министри Гоар Барсегян белгилеп өткөндөй, жалпысынан мүчө мамлекеттер тарабынан кабыл алынган системалуу чаралар он жылдын ичинде айыл чарба продукциясын өндүрүүнүн көлөмүн 25,4%га жогорулатууга мүмкүндүк берген. Бирликти азык-түлүк менен камсыз кылууда өз ара соода маанилүү ролду ойнойт, анын көлөмү 1,6 эсеге өскөн, анын натыйжасында ЕАЭБдин айыл чарба продукциясынын жана азык-түлүктүн негизги түрлөрү менен камсыз болуу деңгээли 93%га жеткен.
"Бул оң тенденцияны сактап калуу гана эмес, аны көбөйтүү да маанилүү", – деп баса белгиледи ЕЭК министри.
Гоар Барсегяндын айтымында, технологиялык инновацияларды киргизүү бул глобалдык милдетти чечүүгө жардам берет.
"Айыл чарба өндүрүшүнүн тездетилген өсүшүнүн инструменттеринин бири болуп агрардык рынокту санариптик моделге трансформациялоо саналат. Комиссиянын жана улуттук өкмөттөрдүн күч- аракеттери дал ушул багытта топтолгон", – деп белгиледи ал.
ЕЭК министри маалымдагандай, Комиссия тарабынан маалыматтык ресурс – Агроиндустрияны өнүктүрүү картасы ишке киргизилди, анда ЕАЭБде 18 млрд доллардан ашык суммага ишке ашырылып жаткан 260тан ашык ири инвестициялык долбоорлор жөнүндө маалымат интерактивдүү режимде чагылдырылган. Бул маалымат инвесторлорго буга чейин ишке ашырылып жаткан долбоорлорду эске алуу менен жаңы айыл чарба долбоорлору боюнча салмактуу чечимдерди кабыл алууга мүмкүнчүлүк берет.
Айыл чарба продукциясына кампа күбөлүктөрүн чыгаруу, жүгүртүү жана тындыруу эрежелери жөнүндө макулдашууга кол коюу айыл чарба продукциясынын электрондук соодасын өнүктүрүүдөгү дагы бир маанилүү кадам болду. Аны практикалык ишке ашыруу 2026-жылдын июнь айынан башталат.
Сессияга ЕАЭБ өлкөлөрүнүн кызыкдар органдарынын өкүлдөрү, ошондой эле эл аралык эксперттер катышышты. Талкуунун алкагында дискуссиянын катышуучулары технологиялар жана тажрыйба алмашууга басым жасап, кызматташтыкты тереңдетүү үчүн инновациялык чечимдерди сунушташты.
