Сербия ЕЭКтин кайрылуусуна жооп катары Бирлик өлкөлөрүнөн күн карама майын жана май камтыган продукцияны ташып келүүгө чектөөлөрдү алып салды

Сербия Евразия экономикалык бирлигинин өлкөлөрүнөн күн карама майын жана май камтыган продукцияны ташып келүүгө сандык чектөөлөрдү алып салуу жөнүндө Евразия экономикалык комиссиясына маалымдады. Чектөөлөрдү алып салуу ЕЭКтин кайрылуусуна жооп иретинде Сербия Республикасынын Өкмөтүнүн ЕАЭБ менен мамилелерди өнүктүрүүгө жооптуу министри Ненад Попович тарабынан демилгеленген.

"Маселе Комиссия тарабынан өткөн жылдын апрелинен тартып Бирлик менен Сербиянын ортосундагы Эркин соода жөнүндө макулдашууну ишке ашыруу боюнча иштердин алкагында иштелип чыккан. Атап айтканда, тема сентябрда Ненад Попович менен менин жолугушуумдун жүрүшүндө талкууланган", – деп белгиледи ЕЭКтин соода боюнча министри Андрей Слепнев.

Ал кошумчалагандай, чектөөлөрдү алып салуу конструктивдүү өз ара аракеттенүүнү чагылдырат жана тараптардын соода-экономикалык кызматташтыгынын позитивдүү өнүгүүсүн баса белгилейт.