Жаңылыктар

11.05.2023 (Обновлено: 15.05.2023 09:39)

ЕАЭБдин электрондук соодасында керектөөчүлөрдүн укуктарын коргоонун жалпы ыкмалары бекитилди

Евразия экономикалык комиссиясынын Коллегиясы Евразия экономикалык бирлигиндеги мамлекеттердин мыйзамдарында кароого сунушталган электрондук соодада керектөөчүлөрдүн укуктарын коргоонун жалпы ыкмаларын жактырды.


Сунуштаманын жоболору Комиссия тарабынан жүргүзүлгөн Бирлик өлкөлөрүнүн жарандарын кеңири масштабдуу сурамжылоонун натыйжаларына негизделген жана бул чөйрөдө керектөөчүлөрдүн укуктарын коргоонун өзгөчөлүктөрүн аныктоочу негизги факторлорду эске алуу менен түзүлөт.

Документ керектөөчүгө берилүүгө тийиш болгон товарларды сатып алуунун жана кайтаруу шарттарын жана баасын камтыган маалыматтардын тизмегин, ошондой эле адилетсиз аракеттердин мүнөздөмөлөрүн жана электрондук соодада керектөөчүлөрдүн укуктарын бузгандыгы үчүн жоопкерчиликти белгилөөнүн өзгөчөлүктөрүн камтыйт.

Жалпы ыкмалардын катарында электрондук соодада керектөөчүлөрдүн укуктарын коргоо стационардык соода үчүн ЕАЭБ өлкөлөрүндө каралгандан төмөн эмес деңгээлде камсыз кылынышы керек деген жобо бекитилген. Ошондой эле, керектөөчүлөрдүн укуктарын коргоого электрондук соода аянтчасы жана Интернетте товар саткан сатуучу жоопкерчиликтүү экени жазылган. Керектөөчүлөрдүн укуктарын бузгандыгы үчүн жоопкерчилик интернет-дүкөндүн ишмердигине багытталган керектөөчү жашаган өлкөнүн мыйзамдарына ылайык белгилениши керек. Электрондук соода аянтчалары интернет-дүкөндөрдүн керектөөчүлөрдүн укуктарын урматтоосу жана алар менен керектөөчүлөрдүн ортосундагы талаш-тартыштарды чечүүгө көмөктөшүүсү үчүн чараларды көрүшү керек.

Мындан тышкары, документ электрондук соодада талаш-тартыштарды чечүүнүн сунушталган негизги ыкмаларын камтыйт. Ошентип, керектөөчүгө электрондук соода аркылуу сатып алынган товардан аны өткөрүп бергенге чейин каалаган убакта, ал эми товарды өткөрүп бергенден кийин — кеминде он төрт календардык күндүн ичинде баш тартуу мүмкүнчүлүгү берилүүгө тийиш. Керектөөчү төлөгөн акчанын суммасын кайтарып берүүнүн мөөнөтү керектөөчү тиешелүү талапты берген күндөн тартып жети календардык күндөн ашпашы керек. Интернет-дүкөн керектөөчүнүн дооматын ал берилген күндөн тартып он календардык күндүн ичинде кароого тийиш.

Комиссиянын сунуштамасы Евразиялык экономикалык интеграцияны өнүктүрүүнүн 2025-жылга чейинки стратегиялык багыттарын, ошондой эле Бирликке мүчө мамлекеттердин керектөөчүлөрдүн укугун коргоо жаатындагы биргелешкен аракеттеринин программасын аткаруу максатында иштелип чыккан жана жарандардын керектөөчү укуктарын коргоого болгон кепилдиктерди жогорулатуу жана мүчө мамлекеттердин мыйзамдарын бул чөйрөдө жакындатууга багытталган.