ЕАЭБде интеллектуалдык менчик чөйрөсүндө заманбап маалыматтык тутумдарды колдонуу өркүндөтүлөт

Интеллектуалдык менчик чөйрөсүндөгү мамлекеттик кызмат көрсөтүүлөрдү санариптештирүүнүн келечеги, товарлардын жүгүртүлүшүн көзөмөлдөөнүн автоматташтырылган процесстерин камсыздоо жана контрафактылык продукцияларды аныктоо боюнча пилоттук долбоорлор, Интернет тармагында интеллектуалдык менчик укуктарын бузууларды издөө куралдары, ошондой эле сот акыйкаттыгын ишке ашыруу процессин автоматташтыруу маселелери Бишкек шаарында "Антиконтрафакт-2022" X эл аралык форумунун алкагында Евразия экономикалык комиссиясы тарабынан уюштурулган талкуу сессиясынын жүрүшүндө талкууланды.

ЕЭКтин ишкердик ишмердикти өнүктүрүү департаментинин директору Ермек Куантыровдун айтымында, инновациялык бизнес үчүн ыңгайлуу шарттарды түзүүдөгү негизги аспект болуп интеллектуалдык менчик объектилеринин жашоо циклинин бардык этаптарында санариптик технологияларды киргизүү саналат. 

"Евразия экономикалык комиссиясы дүйнөлүк тажрыйбага жана ЕАЭБ мамлекеттеринин тажрыйбасына таянып, интеллектуалдык менчик жаатында евразиялык жол-жоболорду интеллектуалдык менчик объектилерине укуктарды коргоо жана сактоо жол-жоболорунун жогорку натыйжалуулугун камсыз кылууга мүмкүндүк берген заманбап санариптик технологияларды колдонуу мүмкүнчүлүгүн эске алуу менен түзүүдө", – деп белгиледи Ермек Куантыров.

Талкуунун катышуучуларына Евразия экономикалык бирлигинин интеграцияланган маалыматтык тутуму аркылуу ишке ашырылып жаткан интеллектуалдык менчик чөйрөсүндөгү ЕЭКтин долбоорлору жөнүндө маалымат берилди.

"Жалпы евразиялык жол-жоболорду ишке ашырууда Комиссия жана биздин өлкөлөрдүн ыйгарым укуктуу органдары менен бизнестин өз ара аракеттенүүсүнүн жол-жоболорун маалыматташтыруу боюнча мүчө мамлекеттердин мыкты тажрыйбаларын максималдуу эсепке алуу милдети коюлат", – деп баса белгиледи ЕЭК департаментинин директору.