Жаңалықтар

28 May 2024 Сергей Глазьев: «ЕАЭО мен Қытай өңірлік экономикалық дамудың жаңа контурын қалыптастырады» Сауда-экономикалық ынтымақтастықтың, технологиялық инновациялар мен "жасыл" дамудың мәселелері 27-28 мамырда Бейжіңде өткен Қытайдың шетелдік инвестициялар жөніндегі жәрмеңкесінің ортақ назарында болды. Іс-шараға Еуразиялық экономикалық комиссияның Интеграция және макроэкономика жөніндегі министрі Сергей Глазьев қатысты. Министр әлемнің ең серпінді дамып келе жатқан интеграциялық бірлестіктерінің бірі болып табылатын ЕАЭО-ның жетістіктері туралы айтып берді. 2023 жылдың қорытындысы бойынша ЕАЭО-ның жиынтық ЖІӨ өсімі 3,7%-ға жетті, бұл орташа әлемдік мәннен жоғары. "Әлемдік экономика архитектурасының бұрын-соңды болмаған трансформациясы әрі жаңа технологиялық және әлемдік шаруашылық салтының қалыптасуы жағдайында Еуразиялық экономикалық одақ елдері мен Қытайдың ынтымақтастығы стратегиялық сипат алып, үлкен перспективаға ие болып отыр. Шын мәнінде, ЕАЭО мен Қытай өңірлік экономикалық дамудың жаңа контурын қалыптастырады", -деп мәлімдеді Сергей Глазьев. "Еуразиялық өңір жаңа экономикалық мүмкіндіктер ұсынады" тақырыптық дөңгелек үстелі барысында Еуразиялық интеграциялық жоба мен Қытайдың «Бір белдеу, бір жол» бастамасын ұштастыру мәселесі жан-жақты талқыланды. ЕЭК министрінің сөзінше, ЕАЭО мен ҚХР арасындағы тауар айналымының жылдам өсуі орнықты сипат алды, бірақ оны ұстап тұру үшін кооперация мен бірлескен инвестицияларды дамыту қажет. ЕАЭО-ның экономикалық өсу әлеуеті 25%-дан асады және ол әсіресе отын-энергетика кешенінде, агроөнеркәсіп және ағаш өнеркәсібі кешендерінде, жоғары технологиялық өнеркәсіпте жоғары. Дөңгелек үстелге дипломатиялық корпустың, ғылыми және сарапшылық топтардың, сондай-ақ ЕАЭО елдері мен ҚХР іскерлік қоғамдастықтарының өкілдері қатысты. ЕЭК пен ҚХР Үкіметінің ынтымақтастығы Бір жағынан Еуразиялық экономикалық одақ пен оған мүше мемлекеттер және екінші жағынан Қытай Халық Республикасы арасындағы сауда-экономикалық ынтымақтастық туралы келісім шеңберінде жүзеге асырылады. Қытайдың шетелдік инвестициялар және ынтымақтастық жәрмеңкесін ҚХР Даму және реформалар жөніндегі мемлекеттік комитеті бекіткен. Жәрмеңке сессияларына дәстүрлі түрде 100-ден астам елдің өкілдері мен мыңдаған кәсіпкерлер қатысады, іс-шара алаңдарында көрмелер ұйымдастырылып, шарттық құжаттарға қол қойылады. Қытай жәрмеңкесі қатысушылар үшін халықаралық инвестициялық және сауда-экономикалық жобалар туралы ақпарат алудың тиімді тәсілі, "Белдеу және жол" бірлескен құрылысында халықаралық ынтымақтастықты дамыту үшін маңызды алаң болды.
28 May 2024 ЕАЭО мен Коста-Рика экономикалық ынтымақтастықты дамытуға мүдделі ЕЭК Интеграцияны дамыту департаменті директорының орынбасары Валентина Янутёнок пен Коста-Рика Республикасының Ресей Федерациясындағы Уақытша сенімді өкілі Рандольф Кото Эчеверрия өзара іс-қимылды жандандыру перспективаларын талқылады. Жұмыс кездесуі 28 мамырда ЕЭК-тің штаб-пәтерінде болып өтті. "Бүгін біз Коста-Рика Республикасымен екіжақты деңгейде бірінші жұмыс кездесуін өткізіп отырмыз және Орталық Американың экономикалық дамуда айтарлықтай табысқа жеткен жетекші елінің бірімен байланыс орнату біз үшін маңызды болып көрінеді", — деп атап көрсетті ЕЭК өкілі. Өз кезегінде Рандольф Кото Эчеверрия Коста-Риканың ЕАЭО-ның барлық елімен экономикалық байланысын дамыту қажеттігін атап өтті және осыған байланысты кедендік реттеу және СФС-шаралар сияқты салаларға баса назар аудара отырып, Одақтың  реттеушілігі туралы кешенді ақпарат алуға қызығушылық білдірді. Сондай-ақ ынтымақтастықты бұдан да кең тұрғыда дамыту – ЕЭК пен Коста-Рика мүшесі болып табылатын Орталық Америкадағы Экономикалық интеграция жөніндегі хатшылық (СИЕКА) арасындағы Өзара түсіністік туралы меморандумды іске асыру шеңберінде талқыланды. "Екі өңірлік құрылымның ынтымақтастығын тереңдету бойынша бұдан арғы қадам ретінде интеграциялық тәжірибе алмасу мақсатында ЕЭК пен СИЕКА арасында бірлескен семинар өткізуді ұсынамыз, бұл бізге бір-біріміздің экономикалық мүмкіндігіміз туралы жақсырақ білуге жол ашады", — деді Валентина Янутёнок. Коста-Рика Республикасы Елшілігінің өкілі мұндай іс-шара өткізу бастамасын құптады және 2025 жылдың бірінші жарты жылдығында СИЕКА-да төрағалық етуші Коста-Рика екі интеграциялық құрылым арасындағы диалогты тереңдетуге барынша жәрдемдеседі деп мәлімдеді. Кездесуге қатысушылар Коста-Рика Республикасы өкілдерінің ЕАЭО елдерінде өтетін түйінді конгрестік-көрмелік іс-шараларға қатысу мүмкіндігін де талқылады. Кездесу қорытындысы бойынша ЕЭК пен Коста-Рика өкілдері жүйелі байланысуды қолдау және өзара қызығушылық тудыратын мәселелер бойынша салалық сипаттағы іс-шаралар ұйымдастыру жайында уағдаласты.
27 May 2024 ЕАЭО-ның Моңғолиямен сауда-экономикалық өзара қарым-қатынасы дамуда Моңғолияның Еуразиялық экономикалық одақтың мүшесі Ресеймен де, жалпы ЕАЭО-мен де диалогты дамытуы Мәскеудегі Еуразиялық экономикалық комиссия өкілдерінің қатысуымен өткен «Ресей-Моңғол ынтымақтастығының өзекті мәселелері» атты халықаралық ғылыми-практикалық конференцияда талқыланды. ЕЭК интеграцияны дамыту департаментінің халықаралық өзара іс-қимыл бөлімінің бастығы Дмитрий Ежов 2015 жылдан бері ЕЭК пен Моңғолия Үкіметі өзара қызығушылықты білдіретін, Комиссияның бұған құзыреті бар барлық негізгі салалық бағыттар бойынша меморандум форматында белсенді өзара қарым-қатынас жасап келе жатқанын атап өтті. ЕАЭО мен Моңғолиядағы ағымдағы экономикалық жағдай өзара тауар жеткізілімдерін әртараптандыруға жаңа мүмкіндіктер ашатыны атап өтілді. Бұл тауарлар үйлесімділігінің бұзылуын жою үшін пайдаланылуы керек, мұнда Одақ, оның мүше мемлекеттері және Моңғолия арасында преференциялық сауда келісімін жасау болашақта шешуші рөл атқаруы мүмкін. ЕАЭО нарығына моңғол өнімдерінің қолжетімділігін жеңілдету үшін ЕАЭО құқығымен ұлттық реттеудің жекелеген нормаларын үйлестіру белгілі бір әсер етуі мүмкін. Моңғолия 2015 жылы тиісті меморандум жасасу арқылы ЕЭК-пен өзара іс-қимылды ресімдеген алғашқы мемлекет болды.  
22 May 2024 ЕАЭО Моңғолиямен сауда-экономикалық өзара іс-қимылды нығайтады және ынтымақтастықты кеңейтеді 21 мамырда Ұланбатырда "Моңғолия мен ЕАЭО елдерінің сауда-экономикалық және инвестициялық ынтымақтастығын дамыту перспективалары" ғылыми конференциясында ЕАЭО елдері мен Моңғолияның сауда-экономикалық ынтымақтастығын жандандыру мәселелері талқыланды. Жалпы пікірсайыс барысында Интеграция және макроэкономика жөніндегі министр Сергей Глазьев сөз сөйледі. "Моңғолия 2015 жылы Еуразиялық экономикалық комиссиямен байланысты рәсімилеуге шығып, тиісті Меморандум жасасқан үшінші елдер арасындағы бірінші мемлекет болды. Келесі жылы ЕЭК пен Моңғолия Үкіметінің жүйелі жұмысы басталғанына 10 жыл болады, оның мақсаты — Одақ елдері мен Моңғолия арасындағы жан-жақты ынтымақтастықты дамытуға жәрдемдесу, сондай-ақ өзара сауданың тиімділігін арттыру және оның дамуына кедергі келтіретін тосқауылдарды жоюға бағытталған шараларды іске асыру", — деді Сергей Глазьев. ЕЭК министрі сондай-ақ Меморандумды іске асыру ЕЭК пен Моңғолияның мемлекеттік басқару органдары арасындағы, бірінші кезекте техникалық реттеу және СФС-шаралар бағытында салалық өзара іс-қимылды дамытуды ынталандырғанын әрі Моңғолия, Одақ және ЕАЭО-ға мүше мемлекеттер арасындағы уақытша сауда келісімін дайындау жөніндегі жұмысты бастау негізін қамтамасыз еткенін атап өтті. ЕЭК министрі таяу болашақтағы түйінді міндеттердің бірі деп ЕАЭО мен Моңғолияның сауда-экономикалық ынтымақтастығын дамыту үшін тосқауылдарды жою жөніндегі жұмысты жандандыруды атады. Ол төлемдерді жүзеге асыру кезінде ұлттық валютаға көшудің, өзіндік төлем-есеп айырысу платформаларын пайдаланудың, кооперациялық байланысты қайта өрлетудің және геологиялық барлау, пайдалы қазбаларды өндіру, шикізатты қайта өңдеу саласында бірлескен кәсіпорындар құру арқылы бірлескен инвестицияларды ұлғайтудың, сондай-ақ инфрақұрылымдық және көлік-логистикалық жобаларды іске асырудың маңыздылығын атап көрсетті. "Саудадағы теңгерімсіздік проблемасы кооперациялық байланыстарды ұлғайту, Моңғолияда бірлескен кәсіпорындар құру және ЕАЭО корпорацияларының инвестициялары арқылы өтелуі мүмкін", — деп түйіндеді Сергей Глазьев. Осы және басқа да мәселелер жоғарыда аталған меморандумға сәйкес құрылған, ЕЭК пен Моңғолия Үкімет арасындағы өзара іс-қимыл жөніндегі бірлескен жұмыс тобының ортақ назарында болады. Жұмыс тобының қызметіне ЕЭК пен Моңғолия мемлекеттік басқару органдарының өкілдері ғана емес, сонымен қатар мүдделі министрліктер мен ведомстволардың, сондай-ақ ЕАЭО мемлекеттері іскер топтарының өкілдері белсене қатысады. Іс-шараны Ресей Федерациясының Президенті жанындағы Ресей халық шаруашылығы және мемлекеттік қызмет академиясы ұйымдастырды. Конференцияға ЕАЭО-ға мүше мемлекеттердің дипломатиялық корпусының, ЕАЭО мемлекеттері мен Моңғолияның мемлекеттік органдарының, іскер және ғылыми топтарының өкілдері қатысты.
17 May 2024 Интеграциялық жобалар ЕАЭО елдерінде үлкен қызығушылық тудыруда Стратегиялық бастамалар агенттігінің Еуразиялық экономикалық комиссияның ұйымдастырушылық-ақпараттық қолдауымен Еуразиялық экономикалық одақтың даму институттары консорциумының мүшелерімен бірлесіп ұйымдастырған «Еуразиялық интеграцияның рәміздері» атты бірлескен ауқымды жоғары технологиялық және гуманитарлық жобалар конкурсына өтінімдерді жинау аяқталды. Конкурс бірнеше мүше мемлекеттердің өкілдерінің қатысуымен жүзеге асырылатын технологиялық, бәсекеге қабілетті жобаларды анықтауға бағытталған. Қарастыруға 257 жоба келіп түсті (Армениядан – 3, Беларуссиядан – 24, Қазақстаннан – 6, Қырғызстаннан – 14, Ресейден – 210). Оның ішінде 137 – технологиялық, 120 – гуманитарлық. «Өтінімдерді жинау қорытындысы бойынша қатысушылардың Еуразиялық экономикалық одақ аясындағы интеграциялық жобаларға айтарлықтай қызығушылық танытып отырғанын айта аламыз», — деп атап өтті ЕЭК интеграция және макроэкономика министрі Сергей Глазьев. Технологиялық жобалар бойынша өтінімдердің көпшілігі «Транзиттік әлеует», «Технологиялық тәуелсіздік» және «Цифрлық платформалық шешімдер» номинацияларында берілді. Сондай-ақ, жобалар «Базалық салалардың технологиялары», «Жаңа технологиялық тәртіп», «Адами капитал», «Еуразиялық туризм», «Қаржылық инклюзивтілік» номинациялары бойынша қабылданды. Олардың ішінде лазерлік және ақпараттық – телекоммуникациялық, зияткерлік және басқару жүйелерін, ғылыми-өндірістік кешендерді, құзыреттілік орталықтарын, сондай-ақ биологиялық дәрмектерді, тағамдық қоспалар мен түрлі материалдарды өндіруді қоса алғанда, өнеркәсіптің әртүрлі салаларына арналған технологияларды әзірлеу және енгізу жөніндегі бастамалар бар. «Біз кәсіпкерлік қоғамдастықтың, мемлекеттік билік органдарының, ЕАЭО елдері азаматтарының үлкен қызығушылық танытқанын байқадық. Бұл «Еуразиялық интеграцияның рәміздері» байқауы шын мәнінде өзекті және қажет екенін білдіреді», — деп атап өтті СБА басшысы Светлана Чупшева. Осы жылдың маусым айының соңына дейін конкурстың сарапшылары мен төралқасы финалистерді бағалап, әрбір номинация бойынша конкурс жеңімпаздарын анықтауы тиіс. Жеңімпаздарды марапаттау 2024 жылдың екінші жартыжылдығында ЕАЭО мемлекеттерінің интеграциялық күн тәртібіндегі маңызды оқиғалардың біріне орайластырылатын болады.
17 May 2024 ЕЭК статистика саласында Еуразиялық интеграцияның жаңа бағдарламасын әзірлеуге кіріседі Мәскеуде Еуразиялық экономикалық комиссия алаңында ЕЭК Интеграция және макроэкономика жөніндегі министрі Сергей Глазьевтің төрағалық етуімен өткен семинарда Еуразиялық экономикалық одақ елдерінің уәкілетті органдарының, халықаралық ұйымдардың және ғылыми қоғамдастықтың сарапшылары Статистика саласында Еуразиялық интеграцияны дамытудың 2030 жылға дейінгі негізгі бағыттарын талқылады. Семинарды Комиссия Г.В. Плеханов атындағы Ресей экономика университетімен бірлесіп ұйымдастырды. Сергей Глазьев атап өткендей, келесі жылы ЕАЭО статистикасы саласындағы интеграцияны дамытудың қолданыстағы бағдарламасын іске асыру аяқталады, соған орай, іскер және сарапшылық қоғамдастықпен бірлесе отырып, бүгіннен бастап осы саладағы іс-қимылдың жаңа стратегиялық жоспарын әзірлеу қажет. Пайдаланушыларды қазіргі заманғы шақырыстарға жауап бере алатын өзекті деректермен қамтамасыз ету үшін бәрін жасаған жөн. Іс-шарада ЕАЭО-дағы экономикалық процестерді одан әрі дамыту туралы "Еуразиялық экономикалық жол" декларациясының ережелерін ескере отырып, жаһандық цифрландыру жағдайында деректерді жинау үшін жаңа мүмкіндіктерді пайдалану және шын мәнінде Одақ шеңберінде статистиканы дамытудың 2030 жылға дейінгі жол картасын қалыптастыру туралы сөз болды. Талқылаудың негізгі тақырыптары — деректер эволюциясы дәуіріндегі статистикалық әдіснаманы үндестіру, цифрлық инфрақұрылымды жаңғырту, статистикалық және геокеңістіктіктегі ақпаратты интеграциялау, ақпаратты жинау, көзбен шолып көру және талдау үшін балама ақпарат көздері мен жасанды интеллект құралдарын пайдалану мәселелері болды. Нақ осы аспектілер Комиссия Одақ елдерімен бірлесіп әзірлей бастаған ЕАЭО статистикасы саласындағы интеграцияны дамытудың 2026-2030 жылдарға арналған бағдарламасы тұжырымдамасының басым бағыттарының негізіне алынды.
Тағы да көрсету