Навіны

Калегія Еўразійскай эканамічнай камісіі 1 лістапада зацвердзіла адзіныя тыпавыя патрабаванні да сістэмы агляду (надгляду) асоб, багажу і ручной паклажы. Гэта дазваляе гарманізаваць падыходы дзяржаў Еўразійскага эканамічнага саюза пры ажыццяўленні мытнага кантролю на ўсёй знешняй саюзнай мяжы.

«Удасканаленне мытнага рэгулявання ў рамках ЕАЭС – адзін з важных напрамкаў нашай Стратэгіі-2025, – адзначыў міністр па мытным супрацоўніцтве ЕЭК Максат Мамытканаў. – У ёй, у прыватнасці, ёсць пункт аб удасканаленні і ўніфікацыі тыпавых патрабаванняў да тэхнічнага абсталявання элементаў мытнай інфраструктуры ў месцах перамяшчэння тавараў праз мытную мяжу Саюза, уключаючы сістэму агляду (надгляду) асоб, багажу і ручной паклажы. Гэту задачу трэба было вырашыць да канца бягучага года, і мы яе паспяхова выканалі». 

Задача мытных органаў – не дапускаць увозу і вывазу тавараў, якія ўяўляюць небяспеку для грамадзян краін ЕАЭС, а таксама тавараў, якія падпадаюць пад забароны і абмежаванні.

У Саюзе ў пунктах пропуску не было адзіных для ўсіх дзяржаў-членаў патрабаванняў да сістэмы агляду (надгляду) асоб, багажу і ручной паклажы. Кожная краіна працавала ў адпаведнасці са сваім заканадаўствам, з прычыны чаго ў аэрапортах, марскіх і рачных партах, чыгуначных вакзалах, аўтамабільных тэрміналах перыядычна ўзнікалі праблемныя для ўдзельнікаў знешнеэканамічнай дзейнасці сітуацыі, звязаныя з адрозненнямі ва ўстаноўленых краінамі патрабаваннях да сістэм кантролю. Камісія і эксперты краін ЕАЭС ліквідавалі гэтыя адрозненні.

Тыпавыя патрабаванні да ўладкавання і тэхнічнага абсталявання элементаў мытнай інфраструктуры, размешчаных у месцах перамяшчэння тавараў праз мытную мяжу Саюза, не толькі знізяць рызыку незаконнага перамяшчэння тавараў з парушэннем мытных патрабаванняў, але і дазволяць скараціць час правядзення мытных аперацый на мяжы.