Жаңалықтар
Мемлекеттік сатып алу үшін тауарлардың шығарылған елін айқындау қағидалары жаңа тауар позицияларымен және өндіріс жағдайларымен толықтырылды
Еуразиялық экономикалық комиссия кеңесі 21 сәуірде 38 тауар позициясына қатысты қойылатын өндіріс талаптарын мақұлдады және Еуразиялық экономикалық одақ елдерінде мемлекеттік сатып алуға қатысу үшін СТ-1 үлгісіндегі сертификатпен 174 тауар үшін шығарылған елін растау келісілді.
Комиссияның бәсекелестік блогы «бестік» елдерінің уәкілетті мемлекеттік органдарымен, бизнес-қауымдастықтармен және кәсіпкерлермен бірлесіп, өндіріс талаптарын келісімге алды, оны орындау кезінде пульсоксиметрлер, эндоскоптар, қан құюға арналған аспап, сыртқы дефибрилляторлар, тұқымдарды тазартуға, сұрыптауға немесе калибрлеуге арналған машиналар, мұнай-газ саласына арналған компрессорлар мен ауа сорғыларының жекелеген түрлері және басқа да тауарлар ЕАЭО елдерінің аумақтарында өндірілген болып есептеледі.
ЕЭК-тің Бәсекелестік және монополияға қарсы реттеу министрі Бақыт Сұлтановтың айтуы бойынша Кеңес қабылдаған шешім айқын алға жылжуды білдіреді.
«Одақ елдері үшін мемлекеттік сатып алу мәселелері аса сезімтал, мұнда позицияларды келісімге алу процесі ұзақ уақытты алады. Бүгінгі шешіммен бірқатар тауарлар үшін өндіріс талаптары қабылданды, оларды орындау кезінде өндіруші ел өз тауарларын «еуразиялық» деп атай алады. Сондай-ақ, шешімде бұрын тыйым салынған және сатып алуға қатыса алмайтын 174 тауар бар. Енді бұл «сұр аймақ» деп аталатын мәселе жойылды. ЕАЭО елдерінің азаматтары үшін әлеуметтік маңызы бар байланыс құралдарын, медициналық жабдықтарды, кеңсе тауарларын, дене шынықтыру және спортпен шұғылдануға арналған мүкәммал мен жабдықтарды және т. б. тауарларды өндірушілер мен жеткізушілер СТ-1 сертификаты негізінде өздері туралы мәліметтерді Еуразиялық тізілімге қосып, сатып алулардың толыққанды қатысушылары бола алады», — деп түйіндеді ЕЭК министрі.
Анықтама
Қабылданған шешімді ескере отырып, ЕЭК Кеңесінің 2020 жылғы 23 қарашадағы № 105 шешімімен бекітілген Мемлекеттік сатып алу мақсаты үшін өнеркәсіп тауарларының жекелеген түрлерінің шығарылған елін айқындау қағидалары өнеркәсіптің 14 саласындағы 407 тауар атауы бойынша өндіріс талаптарын қамтиды. Бұдан басқа, Қағидалар СТ-1 сертификаты негізінде мемлекеттік сатып алуға қатысуға рұқсат етілген 276 тауар позициясын қамтиды.
