Жаңалықтар
ЕЭК Кеңесі Армения Республикасы мен Ресей Федерациясына сары май әкелуге жарты жылға тарифтік жеңілдік берді
Еуразиялық экономикалық комиссия Кеңесі Армения Республикасына 2 мың тоннадан аспайтын көлемде және Ресей Федерациясына 25 мың тоннадан аспайтын көлемде әкелінетін сары майды кедендік әкелу бажынан босату түрінде тарифтік жеңілдік беру туралы шешім қабылдады. Көрсетілген кедендік-тарифтік реттеу шарасы құжат күшіне енген күннен бастап 2025 жылғы 15 маусымға дейін қолданылады.
"Шараны енгізу бағаның өсуін тежеу және тапшылықты болдырмау мақсатында ішкі нарықта сары майдың қосымша ұсынысын қамтамасыз ету үшін қажет. Жеткізілетін майды тамақ өнімдерін өндіру үшін де, бөлшек саудада сату үшін де пайдалануға болады", – деп атап өтті ЕЭК Сауда жөніндегі министрі Андрей Слепнев.
Ол бұл шешім ресурстық базаның шектеулі екендігін ескере отырып, басқа сүт өнімдерін өндіруге зиян келтірместен қысқа мерзімде сұраныс пен ұсыныстың теңгерімін қамтамасыз етуге мүмкіндік беретінін атап көрсетті. Импорттық жеткізілімдер, атап айтқанда, Иран мен Үндістаннан жүзеге асырылуы мүмкін.
Тарифтік жеңілдік Армения Республикасының немесе Ресей Федерациясының уәкілетті органы берген растау болған кезде беріледі.
Шешім ресми жарияланған күнінен бастап 10 күн өткен соң күшіне енеді.
