Жаңалықтар

Еуразиялық экономикалық комиссия Кеңесі 2021 жылғы ақпанда күшіне енген ЕАЭО кедендік аумағына әкелінген тауарларды қадағалап отыру механизмі туралы келісімнің жұмыс істей бастауы үшін қажетті шешімдерді қабылдады. Бірінші шешім қадағалап отыру механизмін ендіру жөніндегі пилоттық жобаны іске асырудың тәртібі мен мерзімін айқындайды. Қадағалап отыру механизмі 2022 жылғы 1 шілдеден бастап 2023 жылғы 31 наурызға дейінгі аралықта Одақтың аумағына әкелінген тұрмыстық тоңазытқыштар мен мұздатқыштарға қатысты тестілеуден өткізіледі. Екінші шешім қадағалауға жатқызылған тауарлар туралы мәліметтерді қадағалап отырудың ұлттық жүйелерінде қамту мен сақтаудың тәртібін бекітеді.

Еске сала өтсек, келісім Одақта шетелдік тауарларды қадағалап отыру жүйесін құруға бағытталған, оның басты міндеті – Одақтың бір мүше мемлекетінің аумағынан екіншісінің аумағына орын ауыстыру кезінде олардың айналымының заңдылығын растау, сондай-ақ кедендік және салықтық төлемдерді төлеуден жалтарудың әртүрлі схемаларын пайдалануды болдырмайтын жағдайлар жасау, осындай тауарлардың айналымына байланысты операцияларды мемлекет тарапынан бақылауды қамтамасыз ету болып табылады.

Келісімнің жұмыс істей бастауы үшін ЕЭК Алқасы мен Кеңесінің бірқатар шешімдерін әзірлеу қажет болды. Бүгінгі күнге Комиссия мүше мемлекеттердің сарапшыларымен бірлесіп бүкіл қажетті нормативтік базаны дайындап әрі келісіп үлгерді.