Навіны

11.05.2023 (Обновлено: 15.05.2023 09:33)

Зацверджаны агульныя падыходы да абароны правоў спажыўцоў у электронным гандлі ЕАЭС

Калегія Еўразійскай эканамічнай камісіі зацвердзіла агульныя падыходы да абароны правоў спажыўцоў у электронным гандлі, якія рэкамендаваны для ўліку ў заканадаўстве дзяржаў Еўразійскага эканамічнага саюза.


Палажэнні рэкамендацыі заснаваны на выніках маштабнага апытання грамадзян краін Саюза, праведзенага Камісіяй, і сфарміраваны з улікам асноўных фактараў, якія вызначаюць спецыфіку абароны правоў спажыўцоў у гэтай сферы.

Дакумент змяшчае пералік звестак, у тым ліку аб цане і ўмовах набыцця і вяртання тавараў, якія павінны быць прадастаўлены спажыўцу, а таксама характарыстыкі нядобрасумленных дзеянняў і асаблівасці вызначэння адказнасці за парушэнне правоў спажыўцоў у электронным гандлі.

У ліку агульных падыходаў замацавана палажэнне аб тым, што абарона спажывецкіх правоў у электронным гандлі павінна быць забяспечана на ўзроўні не ніжэйшым, чым гэта прадугледжана ў краінах ЕАЭС для стацыянарнага гандлю. Таксама зафіксавана, што захаванне правоў спажыўцоў з'яўляецца абавязкам электроннай гандлёвай пляцоўкі і прадаўца, які рэалізуе тавары ў Інтэрнэце. Адказнасць за парушэнне правоў спажыўцоў павінна вызначацца ў адпаведнасці з заканадаўствам краіны спажыўца, на якую арыентавана дзейнасць інтэрнэт-крамы. Электронным гандлёвым пляцоўкам трэба прымаць меры па выкананні інтэрнэт-крамамі правоў спажыўцоў і садзейнічаць вырашэнню спрэчак паміж імі і спажыўцамі.

Акрамя таго, дакумент змяшчае базавыя падыходы, якія рэкамендуюцца да вырашэння спрэчак у электронным гандлі. Так, спажыўцу павінна быць прадастаўлена магчымасць адмовіцца ад тавару, набытага з дапамогай электроннага гандлю, у любы час да яго перадачы, а пасля перадачы тавару – у тэрмін не менш за чатырнаццаць каляндарных дзён. Тэрміны вяртання грашовай сумы, выплачанай спажыўцом, не павінны перавышаць сямі каляндарных дзён з дня прад'яўлення спажыўцом адпаведнага патрабавання. Інтэрнэт-краме трэба разгледзець прэтэнзію спажыўца на працягу дзесяці каляндарных дзён з дня яе прад'яўлення.

Рэкамендацыя Камісіі распрацавана ў мэтах выканання Стратэгічных напрамкаў развіцця еўразійскай эканамічнай інтэграцыі да 2025 года, а таксама Праграмы сумесных дзеянняў дзяржаў-членаў Саюза ў сферы абароны правоў спажыўцоў і накіравана на павышэнне гарантый абароны спажывецкіх правоў грамадзян і збліжэнне заканадаўства дзяржаў-членаў у гэтай сферы.