Жаңалықтар
Андрей Слепнев: «Иранмен еркін сауда туралы толық форматты келісім жөніндегі келіссөздердің кезекті раунды Мәскеуде қыркүйектің аяғында болады»
Еуразиялық экономикалық комиссияның Сауда жөніндегі министрінің Иранның Өнеркәсіп, кеніштер және сауда министрінің орынбасары, Саудаға жәрдемдесу ұйымының басшысы Алиреза Пейманпакпен ЕЭК алаңында өткен кездесуі барысында осындай шешім қабылданды.
Әңгімелесушілер Еуразиялық экономикалық одақтың Ислам Республикасымен сауда-экономикалық ынтымақтастығының қол жеткізілген деңгейін жоғары бағалады.
Алиреза Пейманпак, атап айтқанда, өзара сауда мен «Солтүстік-Оңтүстік» бағытындағы Иран аумағы арқылы тауарлар транзитінің өсуі осы жылы 50% дерлік құрайтынын атап өтті.
Андрей Слепневтің пікірінше, ағымдағы жағдайларда ұлттық валюталарда есеп айырысуға көшудегі айтарлықтай ілгерілеудің айрықша маңызы бар. «Соңғы уақыттағы түйінді оң оқиға «рубль-риал» валюталық жұбы саудасының бастауы болып табылады», — деп атап көрсетті министр.
Тараптар болашақ келісім бойынша келіссөздердің бұдан арғы графигін белгіледі. «Тарифтік бөлікте айтарлықтай ілгерілеу болады деп санаймыз, бұл келіссөз процесінің қорытынды кезеңін жақындатуға мүмкіндік береді», — деп қорытындылады Андрей Слепнев.
Анықтама
2021 жылдың қорытындысы бойынша ЕАЭО мен Иран арасындағы тауар айналымы 5 млрд АҚШ долл. жетіп, 2020 жылмен салыстырғанда 73% өсті. Бұл ретте мүше мемлекеттердің экспорты 2 еседен астам (1,65-тен 3,42 млрд АҚШ долл.дейін) өсті, ал импорт 29% (1,25-тен 1,6 млрд АҚШ долл.дейін) артты.
