Жаңалықтар
Бақытжан Сағынтаев БҰҰ-ның Женевадағы Офисінің бас атқарушы директоры Татьяна Валоваямен келіссөз жүргізді
Еуразиялық экономикалық комиссия Алқасының Төрағасы Бақытжан Сағынтаев Біріккен Ұлттар Ұйымының Женевадағы Офисінің бас атқарушы директоры Татьяна Валоваямен жұмыс кездесуін өткізді.
Тараптар Ұйымның Женевадағы бөлімшесін қоса, Комиссия мен БҰҰ құрылымдары арасындағы өзара іс-қимылды талқылады, сондай-ақ ЮНКТАД (БҰҰ Сауда және даму жөніндегі конференциясы) алаңындағы халықаралық бірлестіктер диалогының перспективаларын қарады.
Бақытжан Сағынтаев ЕЭК-тің интеграциялық практикаларды өзара зерделеу мәселесінде, соның ішінде БҰҰ қамқорлығындағы іс-шараларда әріптестермен өзара іс-қимылға ашық екенін атап өтті.
Алқа Төрағасы Еуразиялық экономикалық интеграция процестерін дамыту туралы Еуропаның ресми, іскерлік және сарапшылық топтарының хабардарлығын арттыру үшін таяу болашақта БҰҰ-ның Женевадағы офисінде "Еуразиялық экономикалық одақ күндерін" өткізуді ұсынды. Бұған ЕЭК Одақтың барлық елінен келісім алды.
Келіссөз қорытындысы бойынша тараптар ынтымақтастықты кеңейтуге мүдделілік білдірді.
