Жаңалықтар
ЕЭК пен БАӘ-нің Энергетика және инфрақұрылым министрлігі өзара іс-қимылды тереңдетеді
Еуразиялық экономикалық комиссияның Энергетика және инфрақұрылым жөніндегі министрі Арзыбек Кожошев пен БАӘ Энергетика және инфрақұрылым министрі Сухейль Мохамед Аль Мазруи осы жылғы 4 қарашада Абу-Дабидегі ADIPEC халықаралық көрмесі мен конференциясы аясында Еуразиялық экономикалық одақ елдері мен Біріккен Араб Әмірліктері арасындағы энергетика саласын дамыту жөніндегі ынтымақтастықтың перспективаларын талқылады.
ЕЭК министрі мүше мемлекеттердің Одақтың энергетикалық ресурстарының ортақ нарықтарын құру, сондай-ақ ЕАЭО шеңберінде жаңғыртылатын энергия көздері мен климаттық күн тәртібін ілгерілету бойынша жүргізіліп жатқан жұмыстардың барысы туралы айтты. Тараптар энергия үнемдеу мен энергия тиімділігін арттыру, сондай-ақ жасыл технологиялар мен жаңғыртылатын энергия көздерін дамыту саласында тәжірибе алмасу туралы уағдаласты.
ADIPEC-2024 шеңберінде Арзыбек Кожошев "Энергетикалық ауысу, жасанды интеллект және дамушы экономикасы бар елдердің рөлі" министрлік дөңгелек үстеліне қатысты.
Пікірсайыс барысында ЕЭК министрі: "Қазіргі заманғы энергетика энергия ресурстарын тиімді басқарудың, сондай-ақ электр желілері жұмысының тұрақтылығын, орнықтылығын және басқарылуын қамтамасыз етудің сыни шақырыстарына тап болып отыр", — деп атап көрсетті.
Форумға қатысушылар Еуразиялық интеграцияның түйінді мәселелерінің бірі — ЕАЭО елдерінің ортақ энергетикалық кеңістікті қалыптастыру жөніндегі бірлескен қызметі болып табылатынын атап өтті. Энергия ресурстарының ортақ нарықтары қолда бар ресурстарды ұтымды пайдалануға ғана емес, сонымен қатар барлық электр энергиясын өндірушілер мен халық үшін ашық нарықтық бағамен арзан, сенімді және орнықты энергия көздеріне кемсітусіз қол жеткізуді қамтамасыз етуге мүмкіндік береді.
Ортақ нарықтар өндіруші жабдықтарды жүктеуді оңтайландыруға, негізгі қорлардың тозу жағдаятын жақсартуға, энергетикалық объектілерді пайдалану сенімділігі мен қауіпсіздігін арттыруға және энергия көздерін әртараптандыруға ықпал етуге арналған.
Іс-шарада энергетика саласын дамытудағы озық, зияткерлік және инновациялық цифрлық шешімдердің рөліне де көп көңіл бөлінді. Жасанды интеллект осы проблемаларды шешудің қуатты құралы деп аталады.
"Технологияның дамуына және энергияның жаңа көздерін ендіруге байланысты оңтайландыру мен басқару мәселесі сынамды болып отыр. Жасанды интеллект қоршаған ортадағы өзгерістерге бейімделуге, тұтыну көлемін болжауға және энергия ресурстарын тиімді бөлуге қабілетті интеллектуалдық жүйелерді құруға жаңа мүмкіндіктер береді", — деп атап өтті Арзыбек Кожошев.
Форум аясында баспасөз конференциясы болып өтті, оның барысында ЕЭК министрі бұқаралық ақпарат құралдары өкілдерінің сұрақтарына жауап берді.
