Жоғары Еуразиялық экономикалық кеңес Төрағасы, Ресей Федерациясының Президенті Владимир Путиннің Еуразиялық экономикалық одақ мемлекеттерінің басшыларына үндеуінде баяндалған Ресейдің төрағалық ету басымдықтарын іске асыру жөніндегі ЕЭК-тің іс-қимыл жоспары Еуразиялық экономикалық комиссия Алқасының Төрағасы Михаил Мясниковичтің бұйрығымен бекітілді.
Іс-қимыл жоспарында Комиссия ЕАЭО елдерімен бірлесіп оларды іске асыру үшін 2023-2027 жылдары 80-ге жуық іс-шараны орындауды жоспарлап отырған 12 міндет айқындалған.
Комиссия мен Одақ елдерін, атап айтқанда, мына жұмыстар күтіп тұр:
— ЕАЭО-ның 2024 жылға арналған халықаралық қызметінің негізгі бағыттарын қалыптастыру жұмысы шеңберінде Одақты әлемдік және өңірлік жайғастырудың нысаналы бағдарларын өзектілендіру;
— Еуразиялық экономикалық одақ шеңберінде өнеркәсіптік ынтымақтастық үшін экономикалық қызметтің басымдықты түрлерінде озат ғылыми-технологиялық шешімдерді әзірлеу мен ендірудегі ынтымақтастықты дамыту туралы ұсыныстар дайындау;
— 2030 және 2045 жылдарға дейінгі кезеңге арналған интеграциялық өзара іс-қимылдың негізгі векторларын айқындайтын ұзақ мерзімді жоспарлаудың жаңа құжаттарын дайындау туралы мәселені пысықтау;
— Еуразиялық экономикалық одақтың ұзақ мерзімді кезеңге арналған ғылыми-техникалық дамуының стратегиялық бағдарламасын әзірлеуді қамтамасыз ету;
— Еуразиялық интеграцияның рәміздері болуға қабілетті бірлескен ауқымды жоғары технологиялық жобалардың тізбесін әзірлеу;
— Еуразиялық экономикалық одақтың интеграцияланған ақпараттық жүйесін дамытудың 2027 жылға дейінгі нысаналы бағдарламасын іске асыруды қамтамасыз ету;
— азық-түлік қауіпсіздігін нығайту және ауыл шаруашылығы саласын одан әрі дамытуға бағытталған шаралардың кең кешені жөнінде ұсыныстар дайындау;
— Еуразиялық рейтинг агенттігін құру мүмкіндігі мәселесін пысықтау;
— Еуразиялық экономикалық одаққа мүше мемлекеттердің 2024-2026 жылдарға арналған үйлестірілген (келісілген) көлік саясатының негізгі бағыттары мен кезеңдерін іске асыру жөніндегі іс-шаралар жоспарын («жол картасын») дайындау;
— ынтымақтастық туралы қол қойылған құжаттар негізінде ШЫҰ, АСЕАН, ТМД, МЕРКОСУР сияқты сыртқы әріптестермен және басқа өңірлік экономикалық бірлестіктермен жүйелі диалог орнатуды қамтамасыз ету.
Бұдан өзге, басқа да іс-шаралардың кең тобы жоспарланып отыр.
Комиссия Алқасы іс-қимыл жоспары мониторингін тұрақты негізде қамтамасыз ететін болады.