ЕАЭО-да Еуразиялық жастар бастамаларын қолдау қоры құрылуы мүмкін

25.08.2022

ЕАЭО-да Еуразиялық жастар бастамаларын қолдау қоры құрылуы мүмкін

Чолпон-Ата қаласында (Қырғыз Республикасы) «Рух Ордо» мәдени орталығында өтіп жатқан ТМД мен ЕАЭО-ның «Келечек» («Болашақ») Жастар форумының ашылуында Еуразиялық экономикалық комиссия Алқасының Төрағасы Михаил Мясникович осындай ұсыныс айтты.

«Қор өңірлік бөлімшелерден құралып, тегін негізде консультациялық, білім беру және басқа қызметтерді көрсете алар еді деп ойлаймын.Жастардың интеграциялық жобаларына ұйымдастырушылық-құқықтық қолдау көрсете алар еді», — деп атап өтті Михаил Мясникович.

Іс-шараға Қырғыз Республикасы Министрлер Кабинетінің Төрағасы Акылбек Жапаров та қатысты. Құттықтау сөзбен қайырылған Қырғызстан Үкіметінің басшысы ТМД мен ЕАЭО-ның жастар күн тәртібі Еуразиялық интеграцияның векторларының бірі болып табылатынын атап өтті.

«Білім беру және қоғамдық жобалар, әсіресе интернационалдық экономика, робот техникасы және IT-технологиялар саласындағы жобалар жасампазшыл жастар үшін үлкен мүмкіндіктер туғызады. ТМД мен ЕАЭО-ның жастар күн тәртібі Еуразиялық интеграцияның жаңа векторларының бірі болып табылатыны маңызды. Осы бағытты одан әрі әртараптандыру біздің жастарымыздың Оңтүстік Америкадан Оңтүстік Шығыс Азияға дейінгі шет мемлекеттермен, интеграциялық өңірлік бірлестіктермен байланысу географиясын кеңейтуге мүмкіндік береді», — деді Акылбек Жапаров.

ЕЭК Алқасының басшысы Михаил Мясникович мемлекет басшылары бекіткен Еуразиялық экономикалық интеграцияны дамытудың 2025 жылға дейінгі стратегиялық бағыттарында жұртшылықты Еуразиялық интеграция процестеріне кеңінен тарту көзделгенін еске салды. Бұл ретте 30 жасқа дейінгі жастар ЕАЭО елдері халқының бестен бірін құрайды және Одақтың әлеуметтік-экономикалық дамуының маңыздың міндеттерін іске асыруда өзінің лайықты орнын тауып отыр.

«Коммуникация арналарын құру үшін біз ЕЭК-те жастардың өтініштерін жедел қарау, жас кәсіпкерлерді, жас мамандарды, студенттерді қолдау мақсатында «бір терезе» құруды жоспарлап отырмыз», — деп атап көрсетті ЕЭК Алқасының Төрағасы.

Оның сөзінше, Комиссия еңбекші жастар үшін қосымша мүмкіндіктер жасауға ұмтылады. Өткен жылы «Шекарасыз жұмыс» біріздендірілген жүйесі жұмысын бастады. Бүгінде дерекқорда 500 мыңнан астам бос орын бар.

«Еуразиялық экономикалық одақты одан әрі дамыту бағыттарын тұжырымдауда жастарға үлкен рөл беріліп отыр. Бұл дұрыс та. Одақтық құрылысқа қатыса отырып, сіздер өздеріңіз үшін өмірдің жағдайларын жасайсыздар», — деп түйіндеді Михаил Мясникович.

Анықтама

2022 жылғы 25-26 тамызда Қырғыз Республикасы Ыстықкөл облысының Чолпон-Ата қаласында, «Рух Ордо» мәдени орталығында ТМД мен ЕАЭО-ның Еуразиялық үкіметаралық кеңестің отырысына орайластырылған «Келечек» («Болашақ») Жастар форумы өтуде.

Форумға 250-ден астам делегат қатысуда, бұлар – Еуразиялық экономикалық одақтың және Тәуелсіз Мемлекеттер Достастығы елдерінен келген жас кәсіпкерлер, мемлекеттік қызметшілер, жасампазшыл жастардың өкілдері, жас дипломаттар, студенттер.

Форумның мақсаты – мүше мемлекеттердің ынтымақтастығын одан әрі дамыту және Еуразиялық интеграция идеяларын әйгілеу. Форум жастардың өзара іс-қимылын кеңейтуге, бастамаларды іске асыру үшін жаңа мүмкіндіктер жасауға, жас ұрпақ өкілдерінің қоғамдық және кәсіби өзін-өзі танытуына бағытталған.