Նորություններ
ԵԱՏՄ-ն և ԱՍԵԱՆ-ը հաջողությամբ զարգացնում են առևտրատնտեսական համագործակցությունը
Այս մասին Եվրասիական տնտեսական հանձնաժողովի ինտեգրման և մակրոտնտեսության նախարար Սերգեյ Գլազևը հայտնել է «Ռուսաստանը և ԱՍԵԱՆ-ը ԱԽՏ-ում. փոխգործակցության դինամիկա, տարածաշրջանային գործընթացներ և գլոբալ համատեքստ» գիտաժողովի բացման արարողությանը։
Սերգեյ Գլազևը նշել է, որ ԵԱՏՄ-ի և ԱՍԵԱՆ-ի երկրներին բնորոշ է տնտեսական կապվածությունը և փոխադարձ լրացվելիությունը, որոնք լավ հիմք են երկարաժամկետ հեռանկարում առևտրատնտեսական համագործակցության զարգացման համար։ Միևնույն ժամանակ, ԵԱՏՄ-ի և ԱՍԵԱՆ-ի միջև ներդրումային փոխգործակցության և առևտրի մասշտաբները դեռ օպտիմալ չեն։ Անհրաժեշտ է բարելավել գործընկերության ենթակառուցվածքը և ավելացնել արտադրական և գիտատեխնիկական կոոպերացիան։ ԵՏՀ-ն արդեն նման ջանքեր է գործադրում։ Տնտեսական համագործակցության ոլորտում ԵՏՀ-ի և ԱՍԵԱՆ-ի միջև փոխըմբռնման հուշագրի ստորագրման պահից անցած հինգ տարվա ընթացքում սերտ կապեր են հաստատվել ԱՍԵԱՆ-ի քարտուղարության հետ, կանոնավոր կերպով կազմակերպվում են խոշոր համատեղ միջոցառումներ, որի նպատակն է ոչ միայն ինտեգրացիոն փորձի փոխանակումը, այլև գործարար համայնքների միջև փոխգործակցության ուղղակի ուղիների ստեղծումը։
«Մենք մեր կողմից պատրաստ ենք առավել բարենպաստ պայմաններ ստեղծել առևտրի ավելացման համար, վերացնել խոչընդոտները, ընդլայնել արտոնյալ առևտրի ռեժիմները», - ասել է Սերգեյ Գլազևը՝ այս համատեքստում հիշատակելով ԵԱՏՄ-ի և Ինդոնեզիայի միջև ազատ առևտրի մասին համաձայնագրի կնքման շուրջ ընթացող բանակցությունները։
Գիտաժողովի բացման արարողությանը մասնակցել են նաև Ռուսաստանի Դաշնության արտաքին գործերի նախարարի տեղական Անդրեյ Ռուդենկոն, Ռուսաստան-ԱՍԵԱՆ գործարար խորհրդի նախագահ Իվան Պոլյակովը, Ինդոնեզիայի ռազմավարական և միջազգային հետազոտությունների կենտրոնի տնտեսական բաժնի ղեկավար Ֆաջար Հիրավանը, Լաոսի ԱԳՆ միջազգային հարաբերությունների ինստիտուտի տնօրեն Մայ Սայնյավոնգը, Ռուսաստանի ԱԳՆ ՄԳԻՄՕ-ի գիտական աշխատանքի գծով պրոռեկտոր Անդրեյ Բայկովը, Ռուսաստանի ԱԳՆ ՄԳԻՄՕ-ին կից ԱՍԵԱՆ կենտրոնի տնօրեն Եկատերինա Կոլդունովան և ԵԱՏՄ-ի և ԱՍԵԱՆ-ի երկրների այլ փորձագետներ։
Տեղեկանք
«Ռուսաստանը և ԱՍԵԱՆ-ը ԱԽՏ-ում. փոխգործակցության դինամիկան, տարածաշրջանային գործընթացները և գլոբալ համատեքստը» գիտաժողովն անցկացվում է ՄԳԻՄՕ-ում Ռուսաստանի միջազգային հետազոտությունների ընկերակցության (ՌՄՀԸ) 15-րդ կոնվենտի շրջանակներում և նվիրված է Ռուսաստանի և ԱՍԵԱՆ-ի միջև ռազմավարական գործընկերության հնգամյակին:
ԵՏՀ-ի և ԱՍԵԱՆ-ի միջև տնտեսական համագործակցության ոլորտի փոխըմբռնման հուշագիրը ստորագրվել է 2018 թվականի նոյեմբերի 14-ին Սինգապուրում։ Փաստաթուղթը հիմք է ստեղծում Եվրասիական աշխարհամասի մասշտաբով ինտեգրացիոն բլոկերի փոխգործակցության հարցերի լայն շրջանակի քննարկման նպատակով երկխոսային հարթակ ձևավորելու համար։
Հուշագրի իրականացման համար ընդունվել է 2021-2025 թվականների համագործակցության ծրագիրը։ Այն ընդգրկում է այնպիսի ոլորտներ, ինչպիսիք են մաքսային օրենսդրությունը և իրավակիրառ պրակտիկան, առևտրային քաղաքականությունը, առևտրային քաղաքականությունը, ձեռնարկատիրական գործունեությունը, տեխնիկական և հակամենաշնորհային կարգավորումը, ՍԲՍ-միջոցները, էներգետիկան, ներքին շուկաների գործունեությունը և այլն։
