Նորություններ
ԵԱՏՄ-Կուբա» բիզնես երկխոսության ընթացքում քննարկվել են առևտրատնտեսական համագործակցության զարգացման նոր հնարավորությունները
Առևտրի ինտենսիվացման համար Եվրասիական տնտեսական միության երկրները և Կուբան պետք է ավելի ակտիվ աշխատեն գործարար շրջանակների ներկայացուցիչների միջև շփումների ընդլայնման ուղղությամբ։ Այս կարծիքին են հանգել փորձագետները սեպտեմբերի 30-ին Երևանում՝ Եվրասիական տնտեսական համաժողովի շրջանակներում կայացած «ԵԱՏՄ-Կուբա» բիզնես երկխոսության ընթացքում։
«Կուբան Լատինական Ամերիկայում և Կարիբյան ավազանում ԵԱՏՄ առանցքային գործընկերներից է։ Մենք տեսնում ենք ձեռնարկատիրական համայնքի գործնական հետաքրքրությունը այնպիսի ոլորտներում առևտրատնտեսական համագործակցության նպատմամբ, ինչպիսիք են դեղագործությունը, բժշկական ծառայությունները, գյուղմթերքի արտադրությունը, էներգետիկան, տրանսպորտը»,- նշել է ԵՏՀ արդյունաբերության և ագրոարդյունաբերական համալիրի նախարար Գոհար Բարսեղյանը։
Գոհար Բարսեղյանն ընդգծել է, որ ԵՏՀ-ն առաջարկում է իր ենթակառուցվածքը ԵԱՏՄ և Կուբայի գործարար շրջանակների միջև փոխգործակցության զարգացման համար։ ԵՏՀ և Կուբայի կառավարության միջև փոխըմբռնման հուշագրով ստեղծված համատեղ հանձնաժողովի նիստերի շրջանակներում բիզնես սեմինարներ կամ բիզնես առաքելություններ են անցկացվում Միության երկրների և Կուբայի ձեռնարկատերերի մասնակցությամբ. Միության երկրների ընկերություններն ավանդաբար մասնակցում են Կուբայի խոշորագույն FIHAV կոնգրեսացուցահանդեսային տոնավաճառ միջոցառմանը:
Համագործակցության այն ուղղությունները, որոնց ԵԱՏՄ երկրները և Կուբան պետք է ուղղեն իրենց ջանքերը, ներկայացրել է Կուբայի արտաքին առևտրի և օտարերկրյա ներդրումների փոխնախարար Դեբորահ Ռիվաս Սաավեդրան։ Այս ոլորտները կապված են Կուբայի տնտեսության ուժեղ կողմերի՝ զբոսաշրջության, թեթև արդյունաբերության, խմիչքների և սննդամթերքի արտադրության հետ:
Կուբայի գործարար շրջանակների ներկայացուցիչները և Միության երկրների փորձագետները նշել են ամբողջ լատինամերիկյան տարածաշրջանի սպառողական շուկա մուտք գործելու նպատակով Կուբայում համատեղ ձեռնարկությունների ստեղծման հնարավորությունը։ Նման ՀՁ-ները կարող էին զբաղվել ցիտրուսայինների, խոզի մսի և թռչնամսի արտադրությամբ, Կուբայի արդյունաբերական արտադրությունների արդիականացմամբ, տնտեսության թվային վերափոխմամբ, օրգանական պարարտանյութերի և այլ ապրանքների արտադրությամբ՝ ինչպես ԵԱՏՄ երկրներ, այնպես էլ տարածաշրջանի երրորդ երկրներ արտահանելու համար, ինչպես նաև արևային վահանակների օգտագործմամբ էլեկտրաէներգիայի արտադրությամբ։
Ռուսաստանի արդյունաբերողների և ձեռնարկատերերի միության փոխնախագահ Սերգեյ Կրասիլնիկովը ներկայացրել է փոխգործակցության զարգացման և առկա առևտրատնտեսական ներուժի ավելի որակյալ գործարկման առաջարկներ։ Ընդհանուր առմամբ, այս առաջարկները կապված են այնպիսի ուղղություններով ավելի ինտենսիվ աշխատանքի անհրաժեշտության հետ, ինչպիսիք են հողօգտագործման և մտավոր սեփականության ոլորտի իրավահարաբերությունները, Կուբայում բջջային կապի և վճարային համակարգերի աշխատանքը, բանկերի մասնաճյուղերի բացումը, լոգիստիկայի կատարելագործումը, այդ թվում՝ երրորդ երկրների դրոշներով նավերի մուտքը ծովային նավահանգիստներ, Կուբայի աշխատաշուկայի կարգավորումը և այլն։
