Նորություններ

Սեպտեմբերի 30-ին Երևանում՝ Եվրասիական 3-րդ տնտեսական համաժողովի շրջանակներում, կայացել է «Էլեկտրաէներգիայի կենտրոնացված առևտրի դեպքում Եվրասիական տնտեսական միության ընդհանուր էլեկտրաէներգետիկ շուկայի մասնակիցների հեռանկարներն ու առավելությունները» կլոր սեղան եվրասիական «հնգյակի» երկրների էներգետիկայի ոլորտի լիազոր մարմինների ղեկավարների տեղակալների և էլեկտրաէներգետիկ կազմակերպությունների ղեկավարների մասնակցությամբ։

Նիստի մասնակիցները հատուկ անդրադարձել են էլեկտրաէներգիայի կենտրոնացված առևտրի շրջանակներում էլեկտրաէներգիայի շուկայական գնագոյացման մեխանիզմներին: Քննարկվել են բորսայական մեխանիզմները, շուկայի մասնակիցների համար ոչ խտրական պայմանների ապահովումը, ազգային արժույթների օգտագործման հեռանկարները և Միության ընդհանուր էլեկտրաէներգետիկ շուկայի պոտենցիալ մասնակիցների ակնկալիքները։

Առանձին քննարկվել են Միության ընդհանուր էլեկտրաէներգետիկ շուկայում տեղեկատվական փոխանակման համակարգի կազմակերպումը և առևտուր իրականացնելիս էլեկտրոնային թվային ստորագրությունների, այդ թվում՝ Միության պետություններում տրամադրված ստորագրությունների կիրառման մեխանիզմները:

«Էներգակիրների գների համաշխարհային կոնյունկտուրայի աճի պայմաններում էլեկտրական էներգիայի ընդհանուր շուկա ստեղծելու մասին եվրասիական «հնգյակի» երկրների որոշումը ռացիոնալ լուծում է էլեկտրաէներգիայի հավասարակշռված գներ և սակագներ ունենալու և ԵԱՏՄ երկրների ազգային տնտեսությունների աճի դրական դինամիկա ստանալու համար։ Ընդհանուր էլեկտրաէներգետիկ շուկայի գործարկումը կնպաստի Եվրասիական տնտեսական միության անդամ պետությունների էներգետիկ անվտանգության մակարդակի բարձրացմանը»,- նշել է Եվրասիական տնտեսական հանձնաժողովի էներգետիկայի և ենթակառուցվածքների նախարար Արզիբեկ Կոժոշևը։