Жаңалықтар

12.04.2024 (Обновлено: 17.04.2024 10:34)

ЕАЭО мен Иран елдерінің кәсіпкерлері Еркін сауда туралы келісім аясында ынтымақтастықты жалғастырады

Еуразиялық экономикалық комиссия Кеңесі 2023 жылғы 25 желтоқсандағы Еуразиялық экономикалық одақ пен Иран Ислам Республикасы арасындағы Еркін сауда туралы келісімді іске асыруға бағытталған іс-шаралар жоспарын бекітті. Оның ішінде құжатта тараптардың іскерлік қауымдастықтары арасындағы ынтымақтастықты тереңдету көзделген.

«Атап айтқанда, Иранның кезекті Еуразиялық экономикалық форумға серіктес ретінде қатысу мәселесі пысықталатын болады. Кездесу аясында «ЕАЭО – Иран» бизнес – диалогын ұйымдастыру және өткізу көзделіп отыр», — деді ЕЭК сауда министрі Андрей Слепнев.

Тараптардың бизнес-диалог платформасын құру мақсатында Еуразиялық экономикалық одақтың Іскерлік кеңесі мен Сауда, өнеркәсіп, тау-кен ісі және ауыл шаруашылығы жөніндегі Иран палатасы арасындағы қолданыстағы 2019 жылғы 25 қыркүйектегі ынтымақтастық туралы меморандумға өзгертулер енгізу немесе жаңа меморандум жасасу жоспарлануда. Осы платформа аясындағы іс-шаралар көлік саласындағы ынтымақтастық, мультимодальды тасымалдарды дамыту, ғылыми зерттеулер мен әзірлемелер саласындағы бірлескен жобалар, кәсіпорындар арасында кооперациялық байланыстар орнату, отын-энергетикалық кешен жобалары, сондай-ақ энергия тиімділігі, энергия үнемдеу және жаңартылатын энергия көздері, білім беру, медицина, телекоммуникациялар сияқты салалық өзара іс-қимыл бағыттарын ескере отырып жүргізілетін болады.

Іскерлік қоғамдастықтардан келіп түсетін ұсыныстарды Келісімді қолдануға және ЕАЭО мен Иран арасындағы сауда қатынастарын одан әрі дамытуға байланысты мәселелерді талқылау үшін құрылатын орган – Бірлескен комитет пысықтайтын және қарайтын болады.

Қосымша тараптар бизнес-форумдар, көрмелер, бизнес-миссиялар және т. б. өткізуді қамтитын саудаға жәрдемдесу жөніндегі ұйымдардың бірлескен іс-шаралар жоспарын дайындайды.