кыр

Жаңылыктар

ЕЭК СМИде Фото Видео
01 июлундагы 2025 Косметикалык продукциянын стандарттарын иштеп чыгуу программасына өзгөртүүлөр киргизилди Евразия экономикалык комиссиясынын Коллегиясы “Парфюмериялык-косметикалык продукциянын коопсуздугу жөнүндө” техникалык регламенттин ишке ашырылышын жана колдонулушун камсыз кылган мамлекеттер аралык стандарттарды иштеп чыгуу программасына өзгөртүүлөрдү жактырды. Өзгөртүүлөрдө беш мамлекеттер аралык стандарттарды, анын ичинде Кытай Эл Республикасынын стандарттарынын негизинде парфюмериялык-косметикалык продукцияда формальдегидди аныктоо боюнча эки стандартты, ISO эл аралык стандарттарынын негизинде күндөн коргоочу каражаттарды сыноо ыкмаларына эки стандартты жана Ислам өлкөлөрүнүн SMIIC стандартташтыруу жана метрология институтунун стандартынын негизинде Halal парфюмериялык-косметикалык продукция боюнча бир стандартты иштеп чыгуу каралган. Ошондой эле тогуз мамлекеттер аралык стандарттарга өзгөртүүлөрдү киргизүү пландаштырылган.
30 июнундагы 2025 Евразия экономикалык форумунда интеллектуалдык транспорттук тутумдарды киргизүү талкууланды Евразия экономикалык бирлигинин мамлекеттеринде интеллектуалдык транспорттук тутумдарды киргизүүнүн перспективалары Евразия экономикалык комиссиясынын энергетика жана инфраструктура боюнча министри Арзыбек Кожошев менен Россиянын "Транспорттун санариптик доору" санариптик транспорт технологияларын өнүктүрүү боюнча ассоциациясынын президенти Александр Семкиндин Минскте өткөн жумушчу жолугушуусунда талкуулоонун предмети болуп калды. Сүйлөшүүлөрдүн жүрүшүндө ЕЭК министри ушул жылдын январында ЕЭК Кеңеши тарабынан жактырылган, ЕАЭБ мүчө мамлекеттеринин интеллектуалдык транспорттук тутумдарынын өз ара иштешүүсүн өркүндөтүү боюнча Концепцияны ишке ашыруу жөнүндө маалымдады. Жолугушуунун катышуучулары ишке ашырууга пландаштырылган базалык сервистердин тизмеси, ошондой эле Бирлик өлкөлөрүнүн ИТТларынын маалыматтык өз ара иштешүүсүнүн форматтарына карата талаптарды унификациялоо боюнча пикир алмашышты. "Биздин мамлекеттерде ИТТны киргизүүнүн ар кандай деңгээлин эске алуу менен, унификацияланган стандарттарга жана талаптарга негизделген ЕАЭБдин тоскоолдуксуз санариптик мейкиндигин түзүү өтө маанилүү", – деп баса белгиледи Арзыбек Кожошев. Тараптар аталган маселелерди сентябрь айында өтө турган ар жылдык «Россиянын интеллектуалдык транспорттук тутумдары. Транспорттун санарип доору» эл аралык форумунун алкагында улантууну макулдашышты.
30 июнундагы 2025 Таиланддын ишкерлери ЕАЭБ рыногунда иштөө перспективаларына оң баа беришти Таиланддын ишкерлер коомдоштугунун сурамы боюнча Евразия экономикалык комиссиясы Таиланд Королдугунун Россия Федерациясындагы Элчилиги жана Москвадагы Тай соода борбору менен биргеликте "ЕАЭБ: динамикалык эл аралык соода шарттарында тайланддык ишкерлер үчүн перспективалуу рыноктор" онлайн-семинарын уюштурду. "Евразия экономикалык бирлигинин жана Таиланддын өз ара иштешүүсүнүн өнүккөн жана түшүнүктүү инфраструктурасы түзүлгөн. ЕЭК жана Таиланд Өкмөтү 2018-жылы түзүлгөн Кызматташтык жөнүндө меморандумду ишке ашырууну улантууда. Биргелешкен жумушчу топтун эки отуруму болуп өттү. Кызматташтыктын кыйла кызыгууну жараткан негизги чөйрөлөрү аныкталды", — деди ЕЭКтин Интеграцияны өнүктүрүү департаментинин директору Микаел Беллуян. Ошондой эле ал ЕАЭБ менен Таиланддын диалогу бизнес үчүн ачык экендигин белгиледи. ЕЭК тарабынан уюштурулуп жаткан, анын ичинде АСЕАН өлкөлөрүнө багытталган иш-чаралардын көпчүлүк бөлүгү бизнес-аудитория үчүн өткөрүлөт жана ишкерлердин ортосунда түз байланышты түзүүгө мүмкүндүк берет. Департаменттин башчысы ЕАЭБ жана Таиланддын ишкер чөйрөлөрүнүн катышуусу менен диалогду өнүктүрүүнүн драйвери боло ала турган, кызматташтыктын потенциалдуу артыкчылыктуу чөйрөлөрүн белгилеп өттү. Бул санариптештирүү, өнөр жай кызматташтыгы жана азык-түлүк коопсуздугу, транспорт жана логистика, ошондой эле каржы кызматтары сектору, анын ичинде төлөмдөрдү жүргүзүү маселелери. Өз кезегинде, Таиланд Королдугунун Соода министрлигинин Эл аралык соодага көмөктөшүү департаментинин директору Сунанта Канвалкулкидж Таиланддын ЕАЭБ мамлекеттеринин ар бири менен соода-экономикалык кызматташтыгынын жогорку потенциалын ишке ашыруу мүмкүнчүлүгүн позитивдүү баалады. Семинардын жүрүшүндө ЕАЭБ рыногуна жеткиликтин практикалык жол-жоболору, Бирликте соода саясаты жана бажы-тарифтик жөнгө салуу, мүчө мамлекеттердин жана Таиланддын өнөр жай, транспорт, логистика чөйрөсүндө кызматташуу потенциалы каралды. Таиланддык ишкер чөйрөлөрдүн өкүлдөрү ЕАЭБ рыногунда өз ишинин позитивдүү мисалдары жөнүндө маалымат менен бөлүшүштү.
27 июнундагы 2025 Андрей Слепнев: "ЕАЭБде товарларды маркалоо өзүнүн натыйжалуулугун далилдеди" Бул туурасында Евразия экономикалык комиссиясынын соода боюнча министри Андрей Слепнев 27-июнда Минскте өткөн Жогорку Евразия экономикалык кеңешинин отурумунда идентификациялоо каражаттары менен товарларды маркалоо тутумун өнүктүрүү жөнүндө маселени кароонун жыйынтыктары боюнча билдирди. "2019-жылдан тартып Евразия экономикалык бирлигинде жалпысынан 274 миллиардга жакын товар маркаланган. Рыноктун "акталышы", контрафактылык продукциялардын деңгээлинин төмөндөшү, легалдуу компаниялардын санынын көбөйүшү, ак ниеттүү өндүрүүчүлөрдүн рентабелдүүлүгүнүн өсүшү жана бюджетти толтуруу деңгээлинин жогорулашы далилденген натыйжалар болуп саналат", – деп белгиледи Андрей Слепнев. Маркалоонун натыйжасы ЕАЭБ өлкөлөрүнүн маалыматтары менен тастыкталган. Мисалы, Арменияда товарларды мыйзамдуу өндүрүүчүлөрдүн жана импорттоочулардын санынын өсүшү 7%ды түзгөн. Казакстанда контрафакттык тамеки продукциясынын жүгүртүүсү 24,7 млн долларга азайган. Россия Федерациясында сүт продукциясы үчүн рынокто актоо деңгээлинин өсүшү 22%га, жеңил өнөр жай товарлары үчүн – 36%га, бут кийим үчүн – 18%га, парфюмерия үчүн – 43%га жеткен. "Мүчө мамлекеттердин бюджеттери да маркалоону киргизүүдөн чоң пайда көрүштү. Салыктардын жана алымдардын түшүүсүнүн көбөйүшү бардык өлкөлөр боюнча байкалууда жана өлкөдө маркалоо киргизилген товарлардын категорияларынын санына түздөн-түз көз каранды", — деди Андрей Слепнев. Мисалы, товарлардын категорияларынын максималдуу саны маркаланган Россияда маркаланган продукцияны сатуудан бюджетке кошумча түшүүлөрдүн көлөмү 15 млрд долларды түзсө, Кыргызстанда 68 млн долларды түзгөн. Жалпы бирликтик эрежелер киргизилгенге чейин эле рынокту кыйла "актоого" мүмкүндүк берген улуттук маркалоо мурдатан колдонулган Беларуста кошумча бюджеттик түшүүлөрдүн көлөмү 4,64 млн долларга жеткен. Кийинки кадам мыйзамсыз продукцияга каршы натыйжалуу күрөшүүгө багытталган маркалоо тутумун андан ары жакшыртуу болмокчу.  "Биринчи кезектеги милдет товарлардын келип чыгышынын мыйзамдуулугун жана коопсуздугун көзөмөлдөө үчүн улуттук маркалоо тутумдарынын ролун күчөтүү болуп саналат", – деп баса белгиледи Андрей Слепнев. Мындан тышкары, Бирликтин деңгээлинде маркалоо тутумун технологиялык өркүндөтүү жана маркаланган товардын эркин жүрүүсүн укуктук камсыздоо боюнча иштер улантылат.
27 июнундагы 2025 Арзыбек Кожошев: "Жалпы рынок электр энергиясын чек ара аралык сатууга бирдей жеткилик берет" Евразия экономикалык комиссиясынын энергетика жана инфраструктура боюнча министри Арзыбек Кожошев Минскте өткөн ЕЭФ-2025те Евразия "бешилтигинин" мамлекеттеринин электр энергетикалык рынокторун интеграциялоонун перспективаларына арналган "ЕАЭБдин жалпы электр энергетикалык рыногу – келечекке көз караш" тегерек столунун ишине катышты. "Жалпы рынок электрэнергиясынын чек ара аралык соодасына бирдей жеткиликтүүлүктү камсыз кылат, өз ара соодалашуунун көлөмдөрүн жана ыкмаларын кеңейтет, Евразия экономикалык бирлигинин өлкөлөрүнүн энерготутумдарындагы жүктөмдөрдүн графигин түздөөгө жана генерациялоочу кубаттуулуктардын ашыкча курулушунан баш тартууга мүмкүндүк берет. Бул мүчө мамлекеттердин энергетикалык коопсуздугун жогорулатат", — деп белгиледи Арзыбек Кожошев. Иш-чаранын катышуучулары ЕАЭБдин жалпы электр энергетикалык рыногунун ченемдик базасын түзүүдөгү прогрессти белгилешти, интеграция контекстинде электр энергиясынын ички рынокторун реформалоонун жана өнүктүрүүнүн өзгөчөлүктөрүн карап чыгышты жана келечектеги рыноктун иштөө шарттарында Бирлик өлкөлөрүнүн экономикасынын реалдуу секторун жана бизнес-коомдоштукту өнүктүрүүнүн перспективаларын жана артыкчылыктарын аныкташты. "Азыркы учурга карата электр энергиясынын рыногунун иштешинин дээрлик бардык ченемдик базасы бекитилген, регламенттер менен Кошулуу жөнүндө келишим кыйла деңгээлде даярдалган. Ошол эле учурда Келишимде бекитилген жана эрежелерде ишке ашырылган, анын ичинде электр энергетикасынын экономиканын реалдуу секторуна кеңири таасиринен улам жалпы электр энергетикалык рынокту түзүү жана иштетүү принциптерин сактоо өтө маанилүү", – деп маалымдады Арзыбек Кожошев. Тегерек столго 50дөн ашык тармактык уюмдардын жетекчилери жана эксперттери катышып, жалпы электр энергетикалык мейкиндикти түзүүгө бизнестин жана жөнгө салуучулардын жогорку кызыкчылыгын ырасташты. ЕАЭБ мамлекеттеринин энергетикалык ведомстволорунун жетекчилери жана инфраструктуралык жана биржалык уюмдарынын өкүлдөрү дискуссиянын катышуучулары болушту.
Валентин Татарицкий ЕАЭБ Ишкер кеңешинин Президиумунун отурумуна катышты 27 июнундагы 2025 Валентин Татарицкий ЕАЭБ Ишкер кеңешинин Президиумунун отурумуна катышты Минскте өткөн IV Евразия экономикалык форумунун иштиктүү программасынын алкагында Евразия экономикалык комиссиясынын техникалык жөнгө салуу боюнча министри Валентин Татарицкий Евразия экономикалык бирлигинин Ишкер кеңешинин Президиумунун отурумуна катышты. Бирликтин техникалык регламенттеринде милдеттүү талаптарды орнотууну өркүндөтүү жөнүндө баяндама менен чыгып сүйлөп жатып ЕЭК министри мындай деп баса белгиледи: "Биз Бирликтин укугун акырындык менен кеңейтүү жана ага стандартташтыруу, өлчөөлөрдүн бирдейлигин камсыз кылуу, аккредитациялоо, көзөмөлдөө практикасы чөйрөсүндө барган сайын көбүрөөк компетенцияларды киргизүү менен интеграцияны тереңдетүүнү улантып жатабыз. Бул талыкпаган эмгек, анын жүрүшүндө биз күн сайын ар кандай кыйынчылыктарга, категориялуулукка жана позициялардын каршылыгына, юридикалык татаалдыктарга туш болобуз". Валентин Татарицкий евразиялык жөнгө салуудагы продукцияга карата коопсуздуктун техникалык талаптарын иштеп чыгуу жана актуалдаштыруу механизмин өркүндөтүүгө багытталган жаңылыктарды баса белгиледи. Ишкер чөйрөлөрдүн бул ишке катышуу мүмкүнчүлүктөрүн кеңейтүү жана ЕАЭБдин техрегламенттерин жана аларга карата стандарттардын тизмегин иштеп чыгууда бардык кызыкдар тараптардын өз ара иштешүүсүн кыйла жөнөкөйлөтүү, анын ичинде техникалык жөнгө салуу чөйрөсүндө санариптик платформаны ишке киргизүүнүн аркасында камсыз кылынат. "Бирликтин алкагында санариптик техникалык жөнгө салуу" долбоорун ишке ашыруу эң активдүү баскычта турат. Учурдагы көйгөйлүү маселелерге жана ЕАЭБ техрегламенттеринин долбоорлорун иштеп чыгуунун жана аларды корректировкалоонун бир кыйла карама-каршы тректерине өзгөчө басым жасалды. Мындан тышкары, Валентин Татарицкий рынокту кооптуу продукциянын жүгүртүмүнөн коргоонун айрым чараларына жана Бирлик өлкөлөрүндө ЕАЭБ техрегламенттеринин аткарылышына контролдук-көзөмөл иш-чараларын жүргүзүүнүн практикасынын айырмачылыгына көңүл бурду. "Бүгүнкү күндө көзөмөл чындап эле "регламенттик эмес" продукцияга жол берүү жана жүгүртүү менен көптөгөн көйгөйлөрдү ачыктап жатат, анын ичинде шайкештикти баалоо боюнча органдардын ак ниеттүүлүгү, шайкештикти баалоо жөнүндө "боз" документтердин жүрүшү жана башкалар жагында, — деп белгиледи Валентин Татарицкий. — Бирликтин аянтчасында эки тартип боюнча иштер аяктап жатат, алар өлкөлөрдүн мамилелерин, анын ичинде "боз" документтер менен иштөөдө системалаштырат деп ишенебиз. Кеп, Бирликтин бир өлкөсүнүн экинчи өлкөнүн мамлекеттик көзөмөлүнүн чараларынын негиздүүлүгү жөнүндө кайрылууларын кароо тартиби жана Мамлекеттик көзөмөлдөө органдарынын өз ара, ошондой эле аккредитациялоо боюнча органдар менен өз ара аракеттенүү тартиби жөнүндө болуп жатат". 
27 июнундагы 2025 Валентин Татарицкий: "ЕАЭБдеги тамак-аш азыктарынын коопсуздугу — калктын бакубаттуулугунун кепилдиги" Евразия экономикалык комиссиясынын техникалык жөнгө салуу боюнча министри Валентин Татарицкий Минскте ЕЭФ-2025 алкагында "ЕАЭБ тамак-аш продукциясынын коопсуздугу калктын бакубаттуулугунун кепилдиги катары: комплекстүү жөнгө салуу, мамилелер жана артыкчылыктар" панелдик сессиясын өткөрдү. Азык-түлүк коопсуздугу — бул адамдардын ден соолугуна, ар кандай экономикалык, социалдык, илимий жана техникалык аспектилерге таасир этүүчү көп кырдуу көйгөй. Макулдашылган СФС-чаралары жана техникалык жөнгө салуу мындай продукциянын коопсуздугун камсыз кылууда негизги ролду ойнойт. "Тамак-аш азыктарынын коопсуздугу — бул керектөөчүлөрдүн ден соолугун коргоо гана эмес, ошондой эле ички жана тышкы рынокторго товарлардын жеткиликтүүлүгүнүн негизги элементи, өндүрүүчүлөрдүн атаандаштыкка жөндөмдүүлүгүн жогорулатуу жана СФС-чаралар жана техникалык жөнгө салуу тутумуна ишенимди бекемдөө, — деп баса белгиледи Валентин Татарицкий. – Аны камсыз кылуу илимий далилдерге жана заманбап санариптик инструменттерге негизделген системалуу жана дисциплиналар аралык мамилени талап кылат. Комиссиянын жана ЕАЭБ өлкөлөрүнүн ыйгарым укуктуу органдарынын бардык ишмердиги тамак-аш продукциясынын коопсуздугун камсыз кылуу үчүн шарттарды түзүүгө, Бирликтин ички рыногунда жана тышкы рыноктордо анын атаандаштыкка жөндөмдүүлүгүн жогорулатууга багытталган". Сессия санитардык, ветеринардык-санитардык, карантиндик фитосанитардык чаралар жана техникалык жөнгө салуу жаатындагы ыйгарым укуктуу органдардын, ЕАЭБ өлкөлөрүнүн алдыңкы илимий-изилдөө институттарынын, эл аралык уюмдардын, тамак-аш продукциясын өндүрүүчүлөрдүн жана тармактык бирликтердин жана ассоциациялардын өкүлдөрүнүн чоң кызыгуусун жаратты. Иш-чаранын катышуучулары санитардык, ветеринардык жана фитосанитардык чаралар жана техникалык жөнгө салуу чөйрөсүндө укуктук инструменттерди түзүү; адамдардын, жаныбарлардын жана өсүмдүктөрдүн ден-соолугуна коркунучтарды четтетүүгө багытталган "Бирдиктүү ден соолук" концепциясын ишке ашыруу; ЕАЭБ өлкөлөрү менен эл аралык уюмдардын ортосунда тамак-аш продукциясынын коопсуздугун камсыздоонун бирдиктүү тутумун түзүүдө өз ара аракеттенүү; ошондой эле СФС-чараларын колдонуу чөйрөсүндө маалыматтык тутумдарды колдонуу маселелерин талкуулашты. Жыйынтыгында панелдик сессиянын катышуучулары Форумдун алкагынан тышкары диалогду, тажрыйба алмашууну жана Комиссиянын жана Бирлик өлкөлөрүнүн ыйгарым укуктуу органдарынын тамак-аш продукциясынын коопсуздук шарттарын камсыздоо, анын ичинде Бирликтин актыларын өркүндөтүү боюнча мындан аркы практикалык биргелешкен ишин улантуунун зарылдыгын баса белгилешти. Сессияга Жаныбарлардын ден соолугунун дүйнөлүк уюмунун (ЖДДУ) Европа боюнча аймактык өкүлчүлүгүнүн, Өсүмдүктөрдү коргоо боюнча Европа жана Жер Ортолук деңиз уюмунун (ӨКЕЖУ) жана Дүйнөлүк саламаттыкты сактоо уюмунун (ДССУ) Регионалдык кеңсесинин өкүлдөрү катышышты.  
27 июнундагы 2025 ЕАЭБ жана Никарагуа: байланыштарды кеңейтүүгө жана соода-экономикалык диалогду активдештирүүгө эки тараптуу мамиле Минсктеги Евразия экономикалык форумунун талааларында ЕЭК менен Никарагуа Өкмөтүнүн өз ара иштешүүсү боюнча жумушчу топтун теңтөрагалары – ЕЭКтин интеграция жана макроэкономика боюнча министри Эльдар Алишеровдун жана Никарагуанын Президентинин инвестициялар, соода жана эл аралык кызматташтык маселелери боюнча кеңешчиси Лауреано Ортега Мурильонун жолугушуусу болуп өттү. "2024-жылы ЕЭК менен Никарагуа Өкмөтүнүн ортосунда Өз ара иштешүү жөнүндө меморандумга кол коюу менен биз диалогубузду сапаттык жаңы деңгээлге чыгардык. Биздин жалпы максатыбыз — соода-экономикалык кызматташтыкты күчөтүү жана диверсификациялоо, өз ара кызыкчылык жараткан тармактык багыттар боюнча тажрыйба алмашуу боюнча биргелешкен аракеттерди координациялоо, ошондой эле ЕАЭБ менен Никарагуанын ишкер чөйрөлөрүнүн өкүлдөрүнө түз өз ара иштешүүнү орнотууга көмөктөшүү болду", – деп белгиледи Эльдар Алишеров. Теңтөрагалар биргелешкен жумушчу топтун 2024-жылдын аягында өткөн отурумунан кийинки мезгилде тараптардын аткарган иштери жөнүндө маалымат алмашып, тармактык диалогду өнүктүрүүнүн чоң потенциалын белгилешти. Мындан тышкары, ЕЭК министри мындай деп белгиледи: "Соода-экономикалык кызматташтыктын көлөмдөрүн өз ара пайдалуу жогорулатуу милдетин биргелешип чечүү менен, бири-бирин жакшыраак билүү, коммерциялык мүмкүнчүлүктөр жана бизнес жүргүзүү шарттары жөнүндө маалыматтын тартыштыгын жоюу зарыл. Бизнес — биздин диалогдун негизги драйвери жана бенефициары". Лауреано Ортега Мурильо дал ушундай контекстте биргелешкен жумушчу топтун Москвадагы мурунку отурумунда жетишилген макулдашуулар иштелип жатканын билдирди. Ал ошондой эле Никарагуа ЕАЭБге караштуу байкоочу-мамлекет статусун алуу маселесин изилдеп жатканын, бул Никарагуанын ЕАЭБдин мүчө мамлекеттери жана ЕЭК менен соода-экономикалык өз ара аракеттенүүсүн андан ары активдештирүүгө кызыкдар экендигин тастыктайт. Эльдар Алишеров жооп катары мындай статусту алуунун процедуралык маселелерин түшүндүрдү. Жумушчу топтун теңтөрагалары мындан ары биргелешкен жумушчу топто техникалык жөнгө салуу, санитардык, фитосанитардык жана ветеринардык чараларды колдонуу, керектөөчүлөрдүн укуктарын коргоо, фармацевтика жана биотехнология маселелерине көңүл буруу максатка ылайыктуу экендигин белгилешти. ЕАЭБдин жана Никарагуанын географиялык алыстык факторун эске алуу менен, жогорку транспорттук чыгымдар жана санариптештирүүнү өнүктүрүү жана кызмат көрсөтүүнү коштогон маселелер менен байланышпаган секторлорго көңүл буруу максатка ылайыктуу. ЕЭК менен Никарагуа Өкмөтүнүн өз ара иштешүүсү боюнча биргелешкен жумушчу топтун кезектеги толук форматтагы отуруму үстүбүздөгү жылдын аягына пландаштырылды.
Дагы көрсөтүү

Ресурсы ЕАЭС