Жаңылыктар
Бишкекте бажы кызматташтыгынын маселелери талкууланды
Евразия экономикалык комиссиясынын бажы кызматташтыгы боюнча министри Руслан Давыдов Кыргыз Республикасынын Каржы министрлигине караштуу Мамлекеттик бажы кызматынын төрагасы Самат Исабеков менен жумушчу жолугушуу өткөрдү.
Евразия өкмөттөр аралык кеңешинин бажы наркын контролдоо ыкмаларын унификациялоо боюнча тапшырмаларынын аткарылышын конструктивдүү жана деталдуу талкуулоо болуп өттү. Ошондой эле көңүл борборунда Навигациялык пломбаларды колдонуу жөнүндө макулдашууну ишке ашыруу, бажы транзитинин бажы жол-жоболору, маалымат алмашуу жана бажы чөйрөсүндөгү жалпы процесстерди ишке ашыруу маселелери болду.
Жаңы "Смарт Бажы" бажы маалымат тутуму сунушталды, анын платформасында бажы операцияларын жана бажы контролун жүргүзүү боюнча комплекстүү чечимдерди ишке ашыруу пландаштырылган. Бул тутумду ишке киргизүү өткөрүү пункттарынын транспорт каражаттары аркылуу өтүү убактысын кыйла кыскартат.
Руслан Давыдов санариптештирүү жаатында Кыргызстандын бажы кызматынын ишин белгилеп, мыкты дүйнөлүк стандарттарды эске алуу менен бирдиктүү укук колдонуу практикасын калыптандыруу үчүн ЕАЭБ өлкөлөрүнүн бажы кызматтарынын ортосунда тажрыйба алмашуунун маанилүүлүгүн баса белгиледи.
ЕЭК министри кесиптештерине жемиштүү өз ара аракеттешүүсү үчүн ыраазычылык билдирди, ошондой эле Бирликтин иштөөсүнүн башкы максаттарынын бири – анын бүткүл аймагында бирдиктүү бажылык жөнгө салууну камсыз кылуу үчүн кызматташтыктын мындан ары тереңдешине ишенимин билдирди.
