Նորություններ

Եվրասիական տնտեսական հանձնաժողովի ինտեգրման և մակրոտնտեսության նախարար Սերգեյ Գլազևը դեկտեմբերի 5-ին Կահիրեում՝ ռուսաստանյան ընկերությունների բազմոլորտ գործարար առաքելության բացմանը իր խոսքում մատնանշել է առևտրի ինտենսիվացումը, նոր լոգիստիկ երթուղիների որոնումը և ազգային, այդ թվում՝ թվային արժույթների վրա հիմնված միջազգային հաշվարկների նոր համակարգի զարգացումը որպես հնարավոր գերակայություններ Եգիպտոսի և աֆրիկյան այլ երկրների հետ Եվրասիական տնտեսական հանձնաժողովի համագործակցության զարգացման ընթացքում: Գործարար առաքելությունը կազմակերպել է Ռուսաստանի արտահանման կենտրոնը։

«ԵԱՏՄ երկրների և Աֆրիկայի միջև առևտրատնտեսական համագործակցության ներուժը հսկայական է, կան բոլոր անհրաժեշտ նախադրյալները դրա հետագա զարգացման համար», – հայտարարել է Սերգեյ Գլազևը՝ շեշտելով, որ ԵԱՏՄ ապրանքաշրջանառությունը Աֆրիկյան տարածաշրջանի հետ միայն այս տարվա հունվարից սեպտեմբեր ընկած ժամանակահատվածում աճել է 34%-ով, իսկ ԵԱՏՄ երկրների արտահանումը Աֆրիկյան տարածաշրջան՝ 40%-ով։

«Աֆրիկյան շուկան գեներացնում է ԵԱՏՄ պետություններում արտադրվող հանքային ապրանքների, պարենի, քիմիական արդյունաբերության ապրանքների, մետաղների, մեքենաների և սարքավորումների լավ պահանջարկ։ Միևնույն ժամանակ աֆրիկյան երկրներից ԵԱՏՄ են ներմուծվում գյուղատնտեսական հումք, բանջարեղեն, մրգեր, քիմիական արտադրանք, տեքստիլ և հագուստ», – ասել է Սերգեյ Գլազևը՝ ընդգծելով առևտրատնտեսական համագործակցությանն աջակցելու նոր գործիքներ գտնելու կարևորությունը։

Գործարար առաքելության լիագումար մասի ընթացքում Ռուսաստանի և Եգիպտոսի ձեռնարկատերերը, ինչպես նաև ԵՏՀ-ի ներկայացուցիչները քննարկել են այնպիսի հարցեր, ինչպիսիք են Եգիպտոս արտահանման ավելացումը և այն զսպող գործոնները, արտահանմանն աջակցելու ֆինանսական և ոչ ֆինանսական մեխանիզմները, գնումների գործունեության առանձնահատկություններն ու պրակտիկան, լոգիստիկ հարցերի և միջսահմանային հաշվարկների վերաբերյալ հնարավոր լուծումները երրորդ երկրների կողմից ԵԱՏՄ որոշ պետությունների նկատմամբ սահմանափակող միջոցներ կիրառելու պայմաններում։

Քննարկման մասնակիցները նշել են գործնական հետաքրքրությունը ԵԱՏՄ-ի և Եգիպտոսի միջև ազատ առևտրի համաձայնագրի գործարկման, ինչպես նաև ԵԱՏՄ-ի և Աֆրիկայի ենթատարածաշրջանային ինտեգրացիոն միավորումների միջև փոխգործակցության զարգացման նկատմամբ՝ շեշտը դնելով ԱԱՀ, մեքենաշինության, գիտատար տեխնոլոգիաների, տրանսպորտի, էներգետիկայի ոլորտներում համագործակցությանը, այդ թվում՝ վերականգնվող ռեսուրսների օգտագործմամբ։

Եգիպտոսում Ռուսաստանի Դաշնության առևտրային ներկայացուցիչ Ալեքսեյ Թևանյանը նշել է նաև, որ առևտրատնտեսական համագործակցության ծավալների մեծացման համար կարևոր է Եգիպտոսի Սուեզի ջրանցքի տնտեսական գոտում ռուսական արդյունաբերական գոտու հաջող շահագործումը, որտեղ Միության այլ երկրների ընկերությունները ևս հնարավորություն ունեն ստանալու ռեզիդենտի կարգավիճակ և մուտք գործելու ամբողջ աֆրիկյան շուկա՝ այս գոտում արտադրված իր արտադրանքով։ Բացի այդ, առևտրի վրա դրական ազդեցություն կունենան միջբանկային համագործակցության ընդլայնումը և ազգային արժույթներով հաշվարկների գործարկումը:

Եգիպտոսի արդյունաբերության ֆեդերացիայի (FEI) գործընկերների հետ աշխատանքի և միջազգային հարաբերությունների զարգացման գծով տնօրեն Շայիմա Բահա Էլ Դինը ներկայացրել է եգիպտական և ռուսական ընկերությունների միջև կոոպերացիոն կապերի զարգացման հեռանկարները՝ նշելով փորձաքննության և բիզնեսի միջազգայնացման ոլորտի լավագույն փորձը:

Եգիպտոսի գործարար շրջանակների ներկայացուցիչները մեծ հետաքրքրություն են հայտնել ինչպես Ռուսաստանի Դաշնության, այնպես էլ ԵԱՏՄ այլ երկրների հետ համագործակցության տարբեր ոլորտներում կոոպերացիայի զարգացման հարցում։

2024 թվականին նախատեսվում է շարունակել Հանձնաժողովի մասնակցությունը բազմոլորտ գործարար առաքելություններին։ Համապատասխան նախապատրաստական աշխատանքն իրականացնում է ԵՏՀ-ն ՌԱԿ-ի, ԵԱՏՄ Գործարար խորհրդի, ՌԱՁՄ և Միության անդամ պետությունների գործարար շրջանակների հետ համատեղ։