Նորություններ

12.09.2023 (Обновлено: 18.09.2023 10:44)

Սերգեյ Գլազևը ԱՏՀ-2023-ում. «Նոր աշխարհատնտեսական կացութաձևին անհրաժեշտ է նոր արժութաֆինանսական ճարտարապետություն»

Միջպետական միավորումների մասնակցությունը արժութաֆինանսական հաշվարկների գլոբալ համակարգի թարմացմանը դարձել է Վլադիվոստոկում սեպտեմբերի 11-ին անցկացվող Արևելյան տնտեսական համաժողովի շրջանակներում Եվրասիական տնտեսական հանձնաժողովի կողմից կազմակերպված «Մեծ Եվրասիա. այլընտրանքային միջազգային արժութաֆինանսական համակարգի ձևավորման դրայվերներ» նստաշրջանի հիմնական թեման: Նստաշրջանի հեռարձակումը հասանելի է այս հղումով։

ԵՏՀ ինտեգրման և մակրոտնտեսության նախարար, ՌԳԱ ակադեմիկոս Սերգեյ Գլազևն իր ելույթում նշել է Եվրասիական տնտեսական միության հաջողությունները ազգային արժույթով հաշվարկների անցնելու հարցում և ընդգծել, որ այս հարցը հատկապես արդիական է ԵԱՏՄ-ի հետագա զարգացման և Մեծ Եվրասիայի տարածքում նրա դիրքավորման պլանների մշակման համատեքստում։

«ԵԱՏՄ-ում փոխադարձ առևտրում ազգային արժույթներով հաշվարկների բաժինը 2022 թվականի վերջին կազմել է 83%», — ասել է ԵՏՀ նախարարը՝ վստահություն հայտնելով, որ այդ միտումը կմեծանա։

Սերգեյ Գլազևը նաև ընդգծել է, որ նոր համաշխարհային արժույթի ստեղծումը ակտիվորեն քննարկվում է տարածաշրջանային և միջպետական միավորումների առանցքային հարթակներում, ներառյալ ԲՐԻԿՍ-ը, որի կշիռը համաշխարհային տնտեսության մեջ անընդհատ աճում է։

ԵՏՀ նախարարը հատուկ ուշադրություն է դարձրել առանցքային հումքային ապրանքների գնագոյացման հարցերին, ընդ որում, նշելով ԵԱՏՄ-ի ջանքերը ընդհանուր եվրասիական բորսայական տարածքի ձևավորման ուղղությամբ։

«Ազգային արժույթներով թվային ձևով հաշվարկների հետագա զարգացումը շատ խոստումնալից ուղղություն է ապագայում, — ասել է Սերգեյ Գլազևը: – Եթե աշխարհի առաջատար երկրները կամ, առնվազն, ԲՐԻԿՍ-ի երկրները պայմանավորվեն, որ իրենց ազգային արժույթների որոշակի քվոտաներ հատկացնում են թվային ձևով, ապա թվային բորսաներում մի քանի հարյուր բրոքերներ այդ արժույթները կհասցնեն հավասարակշռության հարաբերակցության, և մենք կարող էինք դրանք օգտագործել: Կարծում եմ՝ դա տեղի կունենա»։

Ռուսաստանի Դաշնության Պետական դումայի փոխնախագահ Ալեքսանդր Բաբակովը պաշտպանել է միջազգային հաշվարկային միավորի նախագծի մշակման անհրաժեշտության մասին առաջարկը՝ մատնանշելով կարևոր ներքին պայմանը՝ ռուբլու անկայունության նվազեցում և վերազգային զարգացման խնդիրներին համարժեք մոնետար քաղաքականության վարում։ 

Մեծ Եվրասիայի տարածքում հաշվարկների նոր ձևերին անցնելու և նման գործընթացների համար անհրաժեշտ ենթակառուցվածքի հարմարեցման մասին խոսել են ԵԱՏՄ արտասահմանյան գործընկերները։ Այսպես, Շանհայի համագործակցության կազմակերպության գլխավոր քարտուղարի տեղակալ Սոհայիլ Խանը խոսել է ազգային արժույթով հաշվարկներին անցնելու համար ՇՀԿ-ի ձեռնարկվող քայլերի մասին՝ նշելով կազմակերպության անդամ պետությունների ֆինանսների նախարարությունների և կենտրոնական բանկերի ներկայացուցիչներից հատուկ ստեղծված փորձագիտական խմբի աշխատանքը:

«Մասնագետները մանրակրկիտ վերլուծում են արժութային կարգավորման վերաբերյալ երկրների օրենսդրության տարբերությունները, ազգային արժույթներով փոխադարձ հաշվարկների ընթացիկ վիճակը, բացահայտում են դրանց զարգացումը զսպող սահմանափակումները, ինչպես նաև ընդլայնման հեռանկարները», — նշել է ՇՀԿ գլխավոր քարտուղարի տեղակալը։

Մյանմարի Միության Հանրապետության միության ներդրումների և արտաքին տնտեսական կապերի նախարար Կան Զոն պաշտպանել է այն թեզը, որ անհրաժեշտ է արդիականացնել արժութաֆինանսական համակարգը, որը հաշվի կառներ տեխնոլոգիական նորարարությունը, պետությունների փոխկախվածության աննախադեպ մակարդակը և զարգացող երկրների աճող դերը համաշխարհային տնտեսության մեջ: 

«Անհրաժեշտ է ստեղծել ավելի ներառական համակարգ, որը հաշվի կառներ զարգացող տնտեսություն ունեցող պետությունների շահերը», — ընդգծել է Կան Զոն:

Արժութաֆինանսական կապերի զարգացման վերաբերյալ իրենց տեսակետն են ներկայացրել նաև Չինաստանի Ժողովրդական համալսարանի «Չունյան» Ֆինանսական հետազոտությունների ինստիտուտի գործադիր դեկան Վան Վենը և ՎԷԲ.ՌՖ-ի գլխավոր տնտեսագետ Անդրեյ Կլեպաչը, Մակրոտնտեսական վերլուծության և կարճաժամկետ կանխատեսման կենտրոնի դրամավարկային քաղաքականության վերլուծության ուղղության ղեկավար Օլեգ Սոլնցևը, ՌԳԱ ժողովրդատնտեսական կանխատեսման ինստիտուտի տնօրեն Ալեքսանդր Շիրովը, Բրազիլիայի տնտեսական վերլուծաբան Պեպե Էսկոբարը, Եվրասիական ինտեգրման գիտական կենտրոնի փորձագիտական խմբի ղեկավար Օլեգ Նոգինսկին: