арм

Նորություններ

ԵՏՀ ԶԼՄ-ներում Ֆոտոսրահ Տեսադարան
27 հունիսի 2025 Անդրեյ Սլեպնև. «ԵԱՏՄ-ում ապրանքների մակնշումն ապացուցել է իր արդյունավետությունը» Այս մասին հայտարարել է Եվրասիական տնտեսական հանձնաժողովի առևտրի նախարար Անդրեյ Սլեպնևը հունիսի 27-ին Մինսկում՝ Եվրասիական տնտեսական բարձրագույն խորհրդի նիստում նույնականացման միջոցներով ապրանքների մակնշման համակարգի զարգացման հարցի քննարկման արդյունքում: «Սկսած 2019 թվականից՝ Եվրասիական տնտեսական միությունում, ընդհանուր առմամբ, մակնշվել է շուրջ 274 միլիարդ միավոր ապրանք: Ապացուցված արդյունքներն են շուկայի «սպիտակեցումը», կեղծ արտադրանքի մակարդակի նվազումը, օրինական ընկերությունների թվի բարձրացումը, բարեխիղճ արտադրողների եկամտաբերության աճը և բյուջեն լցնելու մակարդակի բարձրացումը», — նշել է Անդրեյ Սլեպնևը: Մակնշման արդյունքը հաստատվել է ԵԱՏՄ երկրների տվյալներով: Օրինակ՝ Հայաստանում ապրանքներ օրինական արտադրողների ու ներմուծողների թվի աճը կազմել է 7%: Ղազախստանում կեղծ ծխախոտային արտադրանքի շրջանառությունը նվազել է 24.7 մլն դոլարով: Ռուսաստանի Դաշնությունում կաթնամթերքի մասով շուկայի սպիտակեցման մակարդակի աճը հասել է 22%-ի, թեթև արդյունաբերության՝ 36%-ի, կոշիկի՝ 18%, օծանելիքի մասով՝ 43%-ի: «Անդամ պետությունների բյուջեները նույնպես զգալիորեն շահել են մակնշում ներդնելուց: Հարկերի ու տուրքերի մուտքերի ավելացումը նկատվում է բոլոր երկրներում և ուղղակիորեն կախված է այն ապրանքների կատեգորիաների թվից, որոնց նկատմամբ երկրում մակնշում է կիրառվել», — հայտնել է Անդրեյ Սլեպնևը: Օրինակ՝ Ռուսաստանում, որտեղ մակնշվում են առավելագույն թվով ապրանքների կատեգորիաներ, մակնշված արտադրանքի իրացումից բյուջեի լրացուցիչ մուտքերի ծավալը կազմել է 15 մլրդ դոլար, Ղրղզստանում՝ 68 մլն դոլար: Բելառուսում, որտեղ նախկինում գործում էր ազգային մակնշում, որը թույլ տվեց դեռևս մինչև համամիութենական կանոններ ներդնելը էապես «սպիտակեցնել» շուկան, բյուջեի լրացուցիչ մուտքերի ծավալը հասել է 4.64 մլն դոլարի: Հաջորդ քայլը կդառնա մակնշման համակարգի հետագա բարելավումը, որն ուղղված է ապօրինի արտադրանքի դեմ ավելի արդյունավետ պայքարին:  «Առաջնահերթ նպատակ է մակնշման ազգային համակարգերի դերի ավելացումը ապրանքների ծագման օրինականության և անվտանգության նկատմամբ վերահսկողության համար», — ընդգծել է Անդրեյ Սլեպնևը: Բացի այդ, Միության մակարդակով կշարունակվի մակնշման միութենական համակարգի տեխնոլոգիական կատարելագործման և մակնշված ապրանքի ազատ տեղաշարժի իրավական ապահովման աշխատանքը:
27 հունիսի 2025 ԵԱՏՄ-ն և ԱՄԷ-ն տնտեսական գործընկերության մասին համաձայնագիր են ստորագրել Հունիսի 27-ին Մինսկում՝ Եվրասիական տնտեսական բարձրագույն խորհրդի նիստի շրջանակներում, կայացել է Եվրասիական տնտեսական միության և նրա անդամ պետությունների՝ մի կողմից, և մյուս կողմից՝ Արաբական Միացյալ Էմիրությունների միջև Տնտեսական գործընկերության մասին համաձայնագրի ստորագրումը: Փաստաթուղթը ստորագրեցին՝ Հայաստանի Հանրապետության փոխվարչապետ Մհեր Գրիգորյանը, Բելառուսի Հանրապետության փոխվարչապետ Նատալյա Պետկևիչը, Ղազախստանի Հանրապետության փոխվարչապետ, ազգային տնտեսության նախարար Սերիկ Ժումանգարինը, Ղրղզստանի Հանրապետության նախարարների կաբինետի առաջին փոխվարչապետ Դանիյար Ամանգելդիևը, Ռուսաստանի Դաշնության կառավարության փոխնախագահ Ալեքսեյ Օվերչուկը, Եվրասիական տնտեսական հանձնաժողովի կոլեգիայի նախագահ Բակիտժան Սագինտաևը, ինչպես նաև Արաբական Միացյալ Էմիրությունների արտաքին առևտրի նախարար Թանի Ահմեդ Ալ Զեյուդին: Արաբական Միացյալ Էմիրությունները Պարսից ծոցի երկրների շարքում ԵԱՏՄ գլխավոր առևտրային գործընկերներից է: Ակնկալվում է, որ Տնտեսական գործընկերության մասին ստորագրված համաձայնագիրը նոր փուլանիշ կդառնա ԱՄԷ-ի հետ առևտրային հարաբերություններում և փոխադարձ առևտուրը կբերի որակապես նոր մակարդակ: ԵԱՏՄ և ԱՄԷ միջև տնտեսական գործընկերության մասին համաձայնագրի կնքման աշխատանքը, որն ուղղված է համագործակցության առավելագույն խորացմանը, շարունակվել է երկուսուկես տարի: Ստեղծված պայմանները թույլ կտան զգալիորեն ավելացնել երկրների միջև առևտրային շրջանառությունը: «Նոր ձևավորվող առևտրային ռեժիմի շրջանակներում Էմիրությունների կողմը առանձնաշնորհային մուտք է բացել ապրանքային անվանացանկի 86%-ի համար: Միության զիջումները գործընկերոջ համար ընդգրկում են ապրանքային անվանացանկի 85%-ը», — նշել է Եվրասիական տնտեսական հանձնաժողովի առևտրի նախարար Անդրեյ Սլեպնևը: Նա հստակեցրել է, որ արտահանման առանձնաշնորհային ծածկույթը մեր երկրների համար արժեքային արտահայտմամբ կընդգրկի ընթացիկ արտահանման ավելի քան 98%-ը, կամ ավելի քան 12.1 մլրդ դոլարը:  Առևտրային ռեժիմի ազատականացման արդյունքում ԱՄԷ-ի կողմից ԵԱՏՄ ապրանքների նկատմամբ կիրառվող միջին դրույքաչափը կկրճատվի 5%-ից մինչև 0.6%: Այսպիսով, ներմուծման մաքսատուրքերի վճարումից տարեկան տնտեսումը գնահատվում է ավելի քան 260 մլն դոլար: Ապրանքային կտրվածքով առանձնաշնորհային մուտք կապահովվի ԵԱՏՄ-ի այնպիսի առանցքային գյուղատնտեսական ապրանքների համար, ինչպիսիք են հացահատիկայինները (ցորեն, գարի, եգիպտացորեն), միսը (ԽԵԱ, ոչխարի միս, ենթամթերք), թռչնամիսը, ձուն, չորացրած բանջարեղենը (սիսեռ, ոսպ, ոլոռ, լոբի), բուսական յուղը, կաթնամթերքը (անքաշ կաթ, կաթի փոշի, յոգուրտներ, կաթնային շիճուկ, սերուցքային կարագ, պանիրներ), հրուշակեղենը, մեղրը, հանքային ջուրը, ջեմերը, շոկոլադը: Արդյունաբերական հատվածի մասով զիջումներ են տրամադրվել ապրանքների հետևյալ կատեգորիաների համար՝ մետաղագործական արդյունաբերության արտադրանք (լեգիրված պողպատից գլանվածք, շիկագլոցված և սառնագլոցված գլանվածք, պատրաստի արտադրատեսակներ սև մետաղներից, խողովակներ, պրոֆիլներ և անկյունակներ, երկաթե, ալյումինե և պղնձե մետաղալար, ալյումինե փայլաթիթեղ և այլն), նավթամթերքներ (ներառյալ թեթև և այլ թորվածքները), անտառարդյունաբերական համալիրի արտադրանք (սալեր, նրբատախտակ, տակդիրներ, կահույք և այլն), թաղանթանյութ, տպագիր արտադրանք, գայլիկոնման գործիքներ, մեխանիկական սարքավորումների լայն տեսականի՝ սկսած տուրբիններից մինչև պոմպերի առանձին տեսակներ: Ազատականացումը կվերաբերի նաև էլեկտրական սարքավորումներին (էլեկտրագեներատորային կայանքներ, առաջնային տարրեր և առաջնային մարտկոցներ, էլեկտրական կուտակիչներ և այլն), երկաթուղային կոնտեյներներին, շարժիչային փոխադրամիջոցներին՝ ներառյալ հատուկ տեխնիկան, կոսմետիկային (մազերի խնամքի միջոցներ, օծանելիք, դեզոդորանտներ և այլն), քիմիական արդյունաբերության արտադրանքին (ներկեր, յուղեր, մակերևութային ակտիվ նյութեր, պարարտանյութեր) և դեղերին: Արաբական Միացյալ Էմիրությունները կկարողանան ավելացնել սպառողական ապրանքների լայն տեսականու մատակարարումները: Խոսքը կոսմետիկայի, օծանելիքի, ժամացույցների, հագուստի առանձին տեսակների մասին է: «Համաձայնագիրը իսկապես պատվախնդիր է, և ոչ միայն սակագնային ազատականացման, այլև դրանով ձևավորվող կարգավորող միջավայրի տեսանկյունից», — նշել է Անդրեյ Սլեպնևը: Նրա խոսքով՝ փաստաթղթում ամրագրված դրույթները համապատասխանում են էլեկտրոնային առևտրի, տնտեսական համագործակցության և ՓՄՁ-ին ԵԱՏՄ երկրների և ԱՄԷ միջև արտաքին առևտրային գործունեությանը ներգրավման հարցերով լավագույն համաշխարհային ստանդարտներին: «Մեր առևտուրը 2020 թվականից աճել է ավելի քան երեք անգամ: Բիզնեսի խանդավառության և ԵՏՀ և մեր երկրների կարգավորիչների ակտիվ աշխատանքի շնորհիվ համաձայնագիրը գործարկելուց հետո արդեն մոտ ապագայում ապրանքաշրջանառությունը կարող է գերազանցել 20 մլրդ դոլար ցուցանիշը», — համոզված է ԵՏՀ առևտրի նախարարը: Ստորագրվելուց հետո տնտեսական գործընկերության մասին համաձայնագիրը կուղղվի ԱՄԷ-ում և ԵԱՏՄ երկրներում վավերացման ընթացակարգերի իրականացմանը, որոնք անհրաժեշտ են դրա ուժի մեջ մտնելու համար։
27 հունիսի 2025 ԵԱՏՄ-ն և Մոնղոլիան ժամանակավոր առևտրային համաձայնագիր են կնքել Հունիսի 27-ին Մինսկում՝ Եվրասիական տնտեսական բարձրագույն խորհրդի նիստի շրջանակներում, կայացել է Եվրասիական տնտեսական միության և նրա անդամ պետությունների՝ մի կողմից, և մյուս կողմից՝ Մոնղոլիայի միջև Ժամանակավոր առևտրային համաձայնագրի ստորագրումը: Փաստաթուղթը ստորագրեցին՝ Հայաստանի Հանրապետության փոխվարչապետ Մհեր Գրիգորյանը, Բելառուսի Հանրապետության փոխվարչապետ Նատալյա Պետկևիչը, Ղազախստանի Հանրապետության փոխվարչապետ, ազգային տնտեսության նախարար Սերիկ Ժումանգարինը, Ղրղզստանի Հանրապետության նախարարների կաբինետի առաջին փոխվարչապետ Դանիյար Ամանգելդիևը, Ռուսաստանի Դաշնության կառավարության փոխնախագահ Ալեքսեյ Օվերչուկը, Եվրասիական տնտեսական հանձնաժողովի կոլեգիայի նախագահ Բակիտժան Սագինտաևը, ինչպես նաև Մոնղոլիայի առաջին փոխվարչապետ, տնտեսության և զարգացման նախարար Ուչրալ Նյամ Օսորը: Համաձայնագրի ստորագրումը նշանավորում է ԵԱՏՄ երկրների և Մոնղոլիայի միջև առևտրային հարաբերությունների զարգացման նոր փուլը: Այն ընդգրկում է 367 ապրանքային ենթադիրք յուրաքանչյուր կողմի համար, որոնց նկատմամբ մաքսատուրքերը կզրոյացվեն կամ կնվազեցվեն փաստաթղթի ուժի մեջ մտնելու պահից: Համաձայնագիրը կնքվում է երեք տարի ժամկետով՝ գործողության ժամկետը ևս երեք տարով երկարաձգելու հնարավորությամբ: «Ըստ վիճակագրության՝ սակագնային առանձնաշնորհները կընդգրկեն ԵԱՏՄ-ից Մոնղոլիա 2 մլրդ դոլարի արտահանման մատակարարումներ, այսինքն՝ ավելի քան 90%-ը: Համաձայնեցված առանձնաշնորհումները ԵԱՏՄ ընկերություններին թույլ կտան տնտեսել տարեկան մինչև 100 մլն դոլար», — նշել է Եվրասիական տնտեսական հանձնաժողովի առևտրի նախարար Անդրեյ Սլեպնևը: Նրա խոսքով՝ ստորագրված առևտրային համաձայնագրին համապատասխան՝ ԵԱՏՄ երկրների գյուղատնտեսները առանձնաշնորհային պայմաններ կունենան Մոնղոլիայի շուկա այնպիսի սկզբունքորեն կարևոր ապրանքների մատակարարման համար, ինչպիսիք են ցորենը, եգիպտացորենը, կաթնամթերքը, բուսական յուղերը, մսից ու թռչնամսից արտադնարքը, շաքարը, հրուշակեղենը, պանիրները, հանքային ջուրը և ալկոհոլային արտադրանքը: Արդյունաբերական ապրանքների մասով մատակարարումների աճ է կանխատեսվում արտադրանքի հետևյալ տեսակների համար՝ մետաղագործական արտադրանք (երկաթահամահալվածքներ, շիկագլոցված և սառնագլոցված գլանվացքներ, ձողեր, անկյունակներ, խողովակներ և այլն), շարժիչային փոխադրամիջոցներ (ավտոմեքենաներ, ավտոբուսներ, բեռնատարներ, հատուկ տեխնիկա, ավտոբաղադրիչներ, կցանքներ և այլն), երկաթուղային մեքենաշինության և քիմիական արդյունաբերության արտադրանք (պոլիմերներ, պլաստիկ սալեր և մասեր), դողեր, ազոտային պարարտանյութեր, դեղեր և այլն: Մոնղոլական ապրանքների մասով, իրենց հերթին, առանձնաշնորհային մուտք կտրամադրվի մսի (ձիու, ԽԵԱ-ի, ոչխարի միս, մսի պահածոներ, ենթամթերք), կաթնամթերքի (յոգուրտներ, պանիր), թեթև արդյունաբերության ապրանքների (բուրդ, թելեր), ինչպես նաև թեթև արդյունաբերության պատրաստի որակյալ ապրանքների համար՝ ներառյալ տրիկոտաժե և տեքստիլ հագուստը: Համաձայնագրի ոչ սակագնային մասը պարունակում է հետագա կոոպերացիայի հնարավորություններ՝ տեխնիկական կարգավորման, սանիտարական, անասնաբուժական և բուսասանիտարական միջոցների, մաքսային համագործակցության, էլեկտրոնային առևտրի և տնտեսական համագործակցության ոլորտներում: «Վերջին մի քանի տարվա ընթացքում ԵԱՏՄ-ի և Մոնղոլիայի միջև ապրանքաշրջանառությունն արդեն աճել է ավելի քան մեկուկես անգամ: Ակնկալում ենք, որ համաձայնագրի գործարկումից հետո այս միտումը կպահպանվի և կամրապնդվի, ինչը թույլ կտա մեր ապրանքաշրջանառությունը հասցնել 3 մլրդ դոլարի», — նշել է Անդրեյ Սլեպնևը: Ստորագրվելուց հետո ժամանակավոր առևտրային համաձայնագիրը կուղղվի Մոնղոլիայում և ԵԱՏՄ երկրներում վավերացման ընթացակարգերի իրականացմանը, որոնք անհրաժեշտ են դրա ուժի մեջ մտնելու համար։
Պարգևատրվել են «Կանաչ Եվրասիա» երրորդ միջազգային կլիմայական մրցույթի հաղթողները 26 հունիսի 2025 Պարգևատրվել են «Կանաչ Եվրասիա» երրորդ միջազգային կլիմայական մրցույթի հաղթողները Հունիսի 26-ին Մինսկում՝ 4-րդ Եվրասիական տնտեսական համաժողովի շրջանակներում ամփոփվել են «Կանաչ Եվրասիա» երրորդ միջազգային կլիմայական մրցույթի արդյունքները, որը կազմակերպվել է Եվրասիական տնտեսական հանձնաժողովի և Նոր նախագծերի առաջմղման հարցերով ռազմավարական նախաձեռնությունների գործակալության (ՌՆԳ) կողմից: Մրցույթի հիմնական նպատակներն են Եվրասիական տնտեսական միության պետությունների կայուն զարգացմանը ուղղված կանաչ օրակարգի տեխնոլոգիական առաջատարների բացահայտումը և կլիմայական միտիգացիայի և հարմարեցման արդյունավետ պրակտիկաների ժողովրդականացումը: «Ուրախ ենք տեսնել, որ մրցույթը շարունակում է թափ հավաքել: Այս տարի մենք արդեն ունենք 16 մասնակից երկիր, ընդ որում՝ ոչ միայն ԵԱՏՄ-ից և Եվրասիական մայրցամաքից: Մասնավորապես, մրցույթին մասնակցել են մի քանի աֆրիկյան պետություններ», - նշել է ԵՏՀ առևտրի նախարար Անդրեյ Սլեպնևը: Նա ընդգծել է, որ մրցման հիմքում դրված է նախաձեռնության, էկոլոգիականության և տնտեսական արդյունավետության համակցությունը, որպեսզի կլիմայական պրակտիկաները համապատասխանեն տնտեսական զարգացման գաղափարներին: Մրցույթի կարևոր պայման է, որ մասնակիցների կողմից ներկայացվող լուծումները կարող են տիրաժավորվել՝ դառնալով ընդհանուր սեփականություն: 2025 թվականին մրցույթի դափնեկիր է դարձել 41 մասնակից. 25-ը՝ Ռուսաստանից, հինգը՝ Բելառուսից, երկուական մասնակից՝ Չինաստանից և Հնդկաստանից, մեկական՝ Ղազախստանից, Ղրղզստանից, Ուզբեկստանից, Իրանից, Մոլդովայից, Էթովպիայից և Սենեգալից: Կազմակերպիչները լրացուցիչ առանձնացրել են «Եվրասիական հեռանկար» միջանցիկ կատեգորիայի երկու պրակտիկա՝ նշելով միջազգային կոոպերացիոն բաղադրիչ ունեցող նախագծեր, որոնց իրականացմանը մասնակցել է նաև մի քանի պետություն: Նույն օրը կայացել է «Կանաչ Եվրասիա» մրցույթի նախագծերի ներկայացում, որի շրջանակներում փորձագիտական կազմը գնահատել է մրցույթի հաղթողների ու մրցանակակիրների պրակտիկաները: «Կանաչ Եվրասիա» երրորդ մրցույթին մասնակցել է 295 հայտ Հայաստանից, Բելառուսից, Բուլղարիայից, Հնդկաստանից, Իրանից, Ղազախստանից, Ղրղզստանից, Չինաստանից, Մոլդովայից, Ռուսաստանից, Սենեգալից, Տաջիկստանից, Թուրքմենստանից, Ուզբեկստանից, Եթովպիայից, ՀԱՀ-ից: Կլիմայական միտիգացիայի և հարմարեցման առավել արդյունավետ պրակտիկաների փորձագիտական գնահատումը և ընտրությունը կատարվում էին 10 անվանակարգով:
26 հունիսի 2025 Անդրեյ Սլեպնև. «Այսօր «Եվրասիական ագրոէքսպրես» նախագծի քարտեզը զգալիորեն ընդլայնվում է» Այս մասին Եվրասիական տնտեսական հանձնաժողովի առևտրի նախարար Անդրեև Սլեպնևը հայտարարել է՝ դիմելով Մինսկում՝ 4-րդ Եվրասիական տնտեսական համաժողովի շրջանակներում անցկացված «Եվրասիական ագրոէքսպրես՝ նոր հորիզոններ ու հնարավորություններ» նստաշրջանի մասնակիցներին: «Եվրասիական տնտեսական միությունը և դրա անդամ պետությունները դիրքավորվում են որպես գյուղմթերքի գլոբալ արտադրության կարևոր տարր և պատրաստ են իրենց լուրջ ավանդն ունենալ միջազգային պարենային անվտանգության ապահովման գործում: Մենք դրանում ենք տեսնում մեր ոլորտի առաքելությունը, և այստեղ անհրաժեշտ է ապահովել որակյալ լոգիստիկա», — ընդգծել է ԵՏՀ նախարարը: Անդրեյ Սլեպնևի խոսքով՝ որակյալ, ոչ փանկարժեք և արագ լոգիստիկան թույլ է տալիս բացահայտվել ամբողջ տարածաշրջանների գյուղատնտեսական ներուժին: Ընդ որում, «Եվրասիական ագրոէքսպրեսի» գործողության ընթացքում հաջողվել է հաստատել մատակարարումների կայուն օրացույց, առաջին հերթին՝ ՉԺՀ-ի ուղղությամբ: «Կնշեի, որ եթե նախագիծն սկսվում էր որպես Հարավ-Արևելյան Ասիային և չինական շուկային ուղղված նախագիծ, ապա այսօր դրա քարտեզը էապես ընդլայնվում է: Ուրախալի է, որ գործնական աշխատանքներ են սկսվել «Հյուսիս-Հարավ»միջանցքի՝ ագրոպարենային արտադրանքի համար խոստումնալից ուղղության շուրջ», — հայտնել է Անդրեյ Սլեպնևը: Նա նշել է, որ խոսքը տվյալ դեպքում ինչպես Իրանի, այնպես էր տարածաշրջանի այլ երկրների մասին է: Օրինակ՝ հետաքրքիր էր «Եվրասիական ագրոէքսպրես» նախագծում Արաբական Միացյալ Էմիությունները ներառելը: Այս երկրի հետ վաղը նախատեսվում է ստորագրել տնտեսական համագործակցության մասին համաձայնագիր, որի կարևոր բաղադրիչ է հենց գյուղատնտեսական արտադրանքի առևտուրը: Բացի այդ, աշխատանք է տարվում ԵԱՏՄ ամենամերձավոր գործընկեր Մոնղոլիայի հետ, որը միաժամանակ տարանցիկ երկիր է Չինաստանի ուղղությամբ: Համաձայնագիրը, որը վաղը ստորագրվելու է Մոնղոլիայի հետ, զգալի հեռանկարներ է ստեղծում մատակարարումների աճի համար: Ընդ որում, տվյալ դեպքում կարող ենք խոսել ոչ միայն ԵԱՏՄ-ից գյուղմթերքի մատակարարումների, այլև մոնղոլական մսամթերքի և կաթնամթերքի հետադարձ բեռնման մասին, որով հետաքրքրված են մեր երկրները: «Եվրասիական ագրոէքսպրեսն» իրենից ներկայացնում է ինտեգրացիոն նախագիծ, որի նպատակն է ինչպես Միության ներսում, այնպես էլ երրորդ երկրներ գյուղատնտեսական և պարենային բեռների արագացված երկաթուղային և մուլտիմոդալ փոխադրման իրականացումը: Նախագծի իրականացման երեք տարում փոխադրվել է ավելի քան 1.5 մլն տոննա բեռ, դրանցից կեսին ավելին՝ ռեֆրիժերատորային: 2024 թվականի արդյունքներով՝ փոխադրված բեռների ծավալը մեկնարկային 2022 թվականի համեմատ ավելացելի է 23%-ով: 
26 հունիսի 2025 Անդրեյ Սլեպնևը մասնակցել է ԵԱՏՄ-Մոնղոլիա կլոր սեղանին և ԵԱՏՄ-ԱՄԷ բիզնես երկխոսությանը Եվրասիական տնտեսական հանձնաժողովի առևտրի նախարար Անդրեյ Սլեպնևը ելույթ է ունեցել Մինսկում՝ 4-րդ Եվրասիական տնտեսական համաժողովի շրջանակներում կայացած ԵԱՏՄ-Մոնղոլիա կլոր սեղանին, որտեղ նշել է, որ կողմերի փոխհարաբերությունների խորը պատմական շերտը և սերտ կապերը թույլ են տալիս վստահորեն ապագա կառուցել: «Այսօրվա պայմաններում, երբ աշխարհը բաժանվում է, և հակամարտություններ են ի հայտ գալիս, ամենամոտ կարևանների հետ հարաբերությունների ամրապնդումն, անշուշտ, չափազանց կարևոր է», — ընգծել է Անդրեյ Սլեպնևը: Ըստ ԵՏՀ նախարարի՝ ԵԱՏՄ և Մոնղոլիայի միջև ժամանակավոր առևտրային համաձայնագրի շուրջ կայացած բանակցությունները կարելի է որակել որպես բարեկամական և գործընկերային, քանի որ առկա բոլոր բարդությունները հաջողությամբ լուծվում էին՝ հաշվի առնելով առաջնորդների քաղաքական կամքը և ընդհանուր վստահության ու փոխըմբռնման շնորհիվ: «Վերջին հինգ տարում մեր ապրանքաշրջանառությունը մեկ քառորդով աճել է: Միևնույն ժամանակ, առանցքային խնդիրներից է զգայի անհավասարակշռությունը, որը կապված է մոնղոլական կողմից մեր շուկա կատարվող մատակարարումների համեմատ մոնղոլական շուկա շատ ավելի մեծ ծավալներով մեր մատակարարումների հետ: Ուստի ԵԱՏՄ-ում մոնղոլական ապրանքների առկայության ընդլայնման հարցը մեզ համար ոչ պակաս առաջնահերթ է, քան մեր ապրանքների առաջմղումը Մոնղոլիայում», — նշել է Անդրեյ Սլեպնևը: Նրա կարծիքով՝ գործընկերը կարող է ապահովել լավ ավանդ և մեր հավասարակշռության ամրապնդում մսի, հագուստի մասով և բազմաթիվ այլ ուղղություններով: Չնայած համաձայնագրի ժամանակավոր բնույթին և սահմանափակ ապրանքային ընդգրկմանը, այն վերաբերում է Մոնղոլիա ԵԱՏՄ-ի այնպիսի ոլորտների արտադրանքի մատակարարումների շուրջ 90%-ին, ինչպիսիք են մետաղագործությունը, շարժիչային փոխադրամիջոցները, քիմիական արդյունաբերությունը, անվադողերը, փայտամշակումը, գյուղմթերքը: «Ինչի՞ մասին պետք է ավելի լավ մտածենք: Համաձայնագրում մենք ամրագրել ենք կարգավորմանն առնչվող մի շարք կետեր, դրանք են՝ մաքսատունը, էլեկտրոնային առևտուրը, տեխնիկական կանոնակարգերը, սանիտարական միջոցները, ոլորտային համագործակցությունը», — հայտնել է ԵՏՀ առևտրի նախարարը՝ հավելելով, որ բոլոր այս ոլորտները դեռևս «բացահայտման» ենթակա են: Բացի այդ, Մոնղոլիան մայրցամաքային առևտրի կարևոր մասնակից է: ԵԱՏՄ — Մոնղոլիա — Չինաստան շրջանակում այժմ զարգացող էներգետիկայի կամ տրանսպորտի ոլորտի նախագծերը չափազանց կարևոր ու խոստումնալից են: Անդրեյ Սլեպնևը նաև մասնակցել է ԵԱՏՄ-ԱՄԷ բիզնես երկխոսությանը, որի ընթացքում հատուկ նշել է, որ այն, որ Արաբական Միացյալ Էմիրությունները Մերձարևելյան տարածաշրջանի դարպասներն են, զուտ խոսույթ չէ, այլ ապացուցված փաստ, որը հիմնված է երկրի կողմից լոգիստիկայում, նավահանգիստներում, ենթակառուցվածքում, առևտրային շփումներում և տնտեսական գոտիներում կատարված հսկայական ներդրումների վրա: «Հատկանշական է, որ մենք տնտեսական գործընկերության մասին համաձայնագիր ենք ստորագրում, որը որոշակի իմաստով մեզ միացնում է ԱՄԷ-ի և, ընդհանուր առմամբ, տարածաշրջանի կողմից իրականացվող աճի այս ալիքին», — ընդգծել է ԵՏՀ առևտրի նախարարը: Խոսքը, ի թիվս այլնի, արտադրոթյունում կոոպերացիայի ընդլայնման և «Հյուսիս-Հարավ» միջանցքի զարգացման մասին է, որի կարևոր հանգույցն է ԱՄԷ-ն, իսկ մի շարք այլ երկրների հետ ԵԱՏՄ-ն համաձայնագրեր է կնքեր ազատ առևտրի մասին կամ բանակցություններ է վարում այդ ուղղությամբ: Անդրեյ Սլեպնևը բիզնես երկխոսության մասնակիցներին տեղեկացրել է, որ վերջին տասը տարվա ընթացքում ԵԱՏՄ-ի առևտուրը Էմիրությունների հետ արդեն աճել է ավելի քան հինգ անգամ, իսկ համաձայնագրի նախագիծն ներառում է ապրանքաշրջանառության ավելի քան 90%-ի ազատականացում: «Սա ոչ թե պարզապես ազատ առևտրի, այլ հենց տնտեսական գործընկերության մասին համաձայնագիր է: Այս առումով մեզ համար այն եզակի և առաջավոր. արտաքին գործընկերների հետ նման խորության պայմանավորվածություններ մենք դեռ չենք ունեցել», — հայտնել է ԵՏՀ առևտրի նախարարը: Ելույթի ավարտին նա կողմերի բիզնեսին հորդորել է ձգտել գործնականում համաձայնագրով ամրագրվող հնարավորությունների իրականացմանը, որպեսզի էապես ավելանան փոխադարձ առևտրի առկա ծավալները: Դրան կնպաստեն նաև ԵԱՏՄ պետությունների կողմից ծառայությունների և ներդրումների ոլորտում ԱՄԷ-ի հետ վարվող բանակցությունները: Ինչպես ավելի վաղ հայտնել էինք, հունիսի 27-ին Եվրասիական տնտեսական բարձրագույն խորհրդի նիստի շրջանակներում ակնկալվում է ԵԱՏՄ և Մոնղոլիայի միջև ժամանակավոր առևտրային համաձայնագրի և ԵԱՏՄ և ԱՄԷ միջև տնտեսական գործընկերության մասին համաձայնագրի ստորագրում:
24 հունիսի 2025 ՉԺՀ-ից շիկադեֆորմացված անկարան խողովակների նկատմամբ հակագնագցման տուրքը երկարաձգվել է հինգ տարի ժամկետով Եվրասիական տնտեսական հանձնաժողովի Կոլեգիան երկարաձգել է ՉԺՅ-ից ծագող, կոռոզակայուն պողպատից պատրաստված շիկադեֆորմացված անկարան խողովակների նկատմամբ հակագնագցման տուրքի գործողության ժամկետը մինչև 2030 թվականի հունիսի 9-ը ներառյալ։ «Որոշումն ընդունվել է 2024 թվականի սեպտեմբերի 25-ին Ներքին շուկայի պաշտպանության վարչության կողմից սկսված կրկնակի հակագնագցման հետաքննության արդյունքների հիման վրա, որը պայմանավորված էր Եվրասիական տնտեսական միության երկրների խողովակներ արտադրողների դիմումի հիման վրա կիրառված միջոցի գործողության ժամկետը լրանալով», — նշել է ԵՏՀ առևտրի նախարար Անդրեյ Սլեպնևը։ Դիմումը ներկայացրել էին «Վոլժսկի խողովակի գործարան» ԲԸ-ն, «Պերվոուրալսկի նոր խողովակների գործարան» ԲԸ-ն և «Չելյաբինսկի խողովակագլոցման գործարան» ԲԸ-ն: ՉԺՀ-ից կոռոզիակայուն պողպատից պատրաստված շիկադեֆորմացված անկարան խողովակների նկատմամբ հակագնագցման տուրքը սահմանվել է Եվրասիական տնտեսական հանձնաժողովի Կոլեգիայի 2019 թվականի դեկտեմբերի 3-ի N 218 որոշմանը համապատասխան։ Տուրքի չափը կազմում է մաքսային արժեքի 15.5%-ը։ Միջոցի գործողությունը երկարաձգվել է կրկնակի հետաքննության անցկացման ժամկետով։ 
24 հունիսի 2025 Վահագն Ղազարյանը Մինսկում մասնակցել է Եվրասիական գիտագործնական դպրոցի շրջանակներում անցկացվող միջոցառումներին Եվրասիական տնտեսական հանձնաժողովի մաքսասակագնային և ոչ սակագնային կարգավորման վարչության տնօրեն Վահագն Ղազարյանը բացել է ԵՏՀ «Եվրասիական տնտեսական միության մաքսասակագնային կարգավորման ոլորտում որոշումների ընդունում» երրորդ մոդելի աշխատանքը (ՏԿԿ ռեժիմով), որն անցնում է Մինսկում «Համաշխարհային տնտեսության տարածք. գաղափարներ, ռազմավարություններ, փոխգործակցություն» Եվրասիական գիտագործնական դպրոցի շրջանակներում: Միջոցառմանը մասնակցում են ԱՊՀ տարբեր երկրների ավելի քան հարյուր ուսանողներ: Միջոցառման նպատակն է ԱՊՀ երկրների երիտասարդության շրջանում Եվրասիական տնտեսական հանձնաժողովի աշխատանքների վերարտադրման՝ Առևտրի հարցերով խորհրդատվական կոմիտեի (մաքսասակագնային, ոչ սակագնային կարգավորման և պաշտպանական միջոցների հարցերով ենթակոմիտեի) անալոգի անցկացման միջոցով եվրասիական ինտեգրման ժողովրդականացումն է: «մաքսասակագնային կարգավորման հարցերով ԵՏՀ-ի արդեն ավանդական դարձած մոդելի իրագործումը Հանձնաժողովի գործունեությանը երիտասարդության ծանոթացման հրաշալի օրինակ է: Մասնակիցները միջազգային առևտրային բանակցություններ վարելու հմտություններ կստանան ԵԱՏՄ-ում ինտեգրման գործընթացների ավելի խորը ըմբռնման համար», — նշել է Վահագն Ղազարյանը:  
Ցուցադրել ավելին

Պաշարներ ԵՏՄ