Նորություններ
ԵԱՏՄ-ում շարունակվում է դեղերի որակի վերահսկողությանը ներկայացվող պահանջների ներդաշնակեցման աշխատանքը
Եվրասիական տնտեսական հանձնաժողովի կոլեգիան հաստատել է Եվրասիական տնտեսական միության դեղագրքի փոփոխությունները, որոնք ԵԱՏՄ պետությունների համար ապահովում են դեղամիջոցների որակի գնահատման միասնական մոտեցում։
Փոփոխությունները ներառում են 46 նոր ընդհանուր դեղագրքային հոդված, որոնք պարունակում են դեղորայքային պատրաստուկների դեղագործատեխնոլոգիական փորձարկումների մեթոդների, կենսաբանական դեղամիջոցների վերլուծության նկարագրություններ, մանրէաբանությանն առնչվող ընդհանուր տեքստեր, կենսաբանական դեղամիջոցների և ռադիոդեղագործական դեղորայքային պատրաստուկներին ներկայացվող պահանջներ, որոնք անհրաժեշտ են դրանց պատշաճ որակը և արդյունավետությունը հաստատելու համար: Փոփոխություններն ուժի մեջ կմտնեն 2025 թվականի հունվարի 1-ից։
Դեղագրքային հոդվածները (մենագրությունները) նախապատրաստվել են ԵԱՏՄ Դեղագրքային կոմիտեի կողմից՝ հաշվի առնելով Միության պետությունների ազգային դեղագրքերը։ ԵԱՏՄ Դեղագրքի փոփոխությունները անդամ պետություններում ներդաշնակեցված ընդհանուր և մասնավոր դեղագրքային հոդվածների պատրաստման կանոնավոր աշխատանքի արդյունք են:
Բացի այդ, փոփոխություններ են կատարվել Հանձնաժողովի կոլեգիայի 2020 թվականի օգոստոսի 11-ի N 100 որոշման մեջ, որոնք կապված են անասնաբուժական դեղորայքային պատրաստուկների գրանցման դոսյեները Միության Դեղագրքին համապատասխանեցնելու ժամկետի երկարաձգման հետ։
Այժմ ԵԱՏՄ-ի Դեղագրքային կոմիտեի կողմից նախապատրաստվել է ընդհանուր դեղագրքային հոդվածների (մենագրությունների) ավելի քան 50 նախագիծ ԵԱՏՄ Դեղագրքի 1-ին հատորի չորրորդ մասի համար։ Դեղագրքային հոդվածների (մենագրությունների) նախագծերի նախնական քննարկումն անցկացվում է ԵՏՀ կայքում:
