Жаңалықтар

01 Oct 2024 АӨК цифрландыру БЭФ-2024 шеңберінде қаралды Еуразиялық экономикалық одақ шеңберінде ауыл шаруашылығы өнімдері айналымының сенімгерлік бизнес-экожүйесін құжатсыз негізде қалыптастыру бүкіл өндірістік-өткізу тізбегі бойында деректердің үлкен массивін цифрландыруға қосымша серпін бола алады. Бұл мемлекет пен бизнестің өзара іс-қимылының тиімділігін және болашақта саланың бәсекеге қабілеттілігін арттыруға мүмкіндік береді. III Еуразиялық экономикалық форумның іскерлік бағдарламасы шеңберінде өткен «Ауыл шаруашылығы өнімдерінің қадағалануын қамтамасыз ету және сауданы дамыту контексінде АӨК цифрландыру» сараптамалық сессиясының қатысушылары осындай қорытындыға келді. «Ұлттық деңгейде ЕАЭО мемлекеттері ауқымды деректерді жинау және өңдеу және аграрлық нарықты трансформациялау негізінде мемлекеттік қызметтер көрсетуді автоматтандыруға бағытталған ауыл шаруашылығы саласындағы цифрлық сервистерді белсенді түрде әзірлеуде. Комиссия ашық және тұтастай ЕАЭО-дағы үздік ұлттық практикаларды масштабтау жөніндегі ұсыныстарды қарауға дайын», - деп атап өтті Еуразиялық экономикалық комиссияның Өнеркәсіп және агроөнеркәсіптік кешен министрі Гоар Барсегян. ФАО мен Халықаралық астық жөніндегі кеңес өкілдері талқыланып жатқан саладағы жаһандық үрдістер туралы айтып берді. Қырғыз Республикасының су ресурстары, ауыл шаруашылығы және қайта өңдеу өнеркәсібі министрінің орынбасары Самат Насирдинов пен Россельхознадзор басшысының орынбасары Светлана Алексеева ұлттық мемлекеттік цифрлық платформаларды дамыту тақырыбын ашты. Қазақстан Республикасы Қаржы министрлігінің «Ақпараттық-есепке алу орталығының» сарапшылары Қазақстанда электрондық астық қолхаттарының жұмыс істеу тәжірибесімен бөлісті. «Ақпараттық ресурстар, бір жағынан, мемлекеттік органдарға белгілі бір деректер мен мәліметтерді өңдеуді автоматтандыруға мүмкіндік береді, екінші жағынан, бизнес-құрылымдар үшін мемлекеттік және бақылаушы органдармен өзара іс-қимылды барынша оңайлату мүмкіндіктерін ашады. Нәтижесінде нарыққа қатысушылар мен мемлекеттің бір-біріне деген сенімі артып келеді», – деп атап өтті сессия модераторы - «Деловая Россия» жалпыресейлік қоғамдық ұйымының вице-президенті, атқару комитетінің басшысы Нонна Каграманян.

30 Sep 2024 ЕЭФ-2024 алаңдарында ауыл шаруашылығындағы инфрақұрылым мен логистиканы дамыту перспективалары талқыланды 30 қыркүйекте III Еуразиялық экономикалық форум шеңберінде Ереванда Еуразиялық экономикалық комиссияның Өнеркәсіп және агроөнеркәсіптік кешен министрі Гоар Барсегянның қатысуымен «Ауыл шаруашылығындағы инфрақұрылым және логистика: заманауи сын-тегеуріндер мен шешімдер» атты дөңгелек үстел өтті. ЕЭК министрі жаһандық нарықтағы өндіріс циклдары мен жеткізу тізбектерінің бұзылуы жағдайында азық-түлікпен қамтамасыз ету және сауданы дамыту үшін уақтылы және тиімді жеткізудің ерекше маңыздылығын атап өтті. Одақтың ауыл шаруашылығы өнімдері мен азық-түлік саудасы ол құрылғаннан бері екі еседен астам өсті, экспорт үш есеге жуық өсті. Пікірталас барысында іс-шараға қатысушылар АӨК өнімдерін, оның ішінде ЕАЭО-ға мүше мемлекеттердің шағын және орта кәсіпорындарының өндіруі мен экспортына арналған инфрақұрылым мен логистиканың жай-күйі мен маңыздылығын, ауыл шаруашылығы тауарларының кедергісіз трансұлттық қозғалысын қамтамасыз етуді, сондай-ақ осы саладағы әлеуетті жобаларды талқылады. «Одаққа мүше мемлекеттердің АӨК бәсекеге қабілеттілігін қолдау үшін ауыл шаруашылығы өнімдерімен және азық-түлікпен өзін-өзі қамтамасыз етуді арттыруға, транспарентті және жеделдетілген логистика мен заманауи инфрақұрылымға негізделген тұрақты азық-түлік жүйелерін дамытудың қажеттілігі айқын. Мәселенің маңыздылығын түсіне отырып, Комиссия осы бағытты пысықтауға және тиімді жеткізу тізбегін құру үшін ЕАЭО мемлекеттерінің күш-жігерін үйлестіруге ерекше назар аударады», - деп атап өтті Гоар Барсегян. Қатысушылар ЕАЭО кеңістігінде агроөнеркәсіптік кешеннің физикалық және цифрлық инфрақұрылымын дамыту бойынша мемлекеттік органдар мен бизнес-қоғамдастықтардың тұрақты диалогы мен табысты өзара іс-қимылының қажеттілігіне назар аударды. Талқылауға мемлекеттік басқарудың салалық органдарының басшылары, бизнес-қоғамдастық пен іскер топтардың өкілдері, сондай-ақ ФАО қатысты. «Яков және Серіктестер» ЖШҚ «ауыл шаруашылығы және жаңартылатын ресурстар» бағытының директоры Алексей Клецко модератор болды.

28 Aug 2024 Георгий Арзуманян: "Жеңіл өнеркәсіпті дамыту және өнеркәсіптік кооперацияны жолға қою – ЕЭК басымдықтарының бірі" Еуразиялық экономикалық комиссияның Өнеркәсіптік саясат департаменті директорының орынбасары Георгий Арзуманян ТМД Экономикалық даму Іскерлік орталығы ұйымдастырған "ТМД ЖЕҢІЛ ӨНЕРКӘСІБІ" екінші Еуразиялық жеңіл өнеркәсіп көрме-конгресінің жалпы отырысына қатысты. Отырысқа қатысушылар ЕАЭО мен ТМД жеңіл өнеркәсіп саласының жай-күйін, жеңіл өнеркәсіп бұйымдарының ішкі нарықтар мен үшінші елдердің нарықтарына шығуына қазіргі бар тосқауылдарды, қазіргі заманғы геоэкономикалық шындық жағдайында экспорттық-импорттық төлемдерді қамтамасыз ету мәселелерін қарады. Іс-шарада интеграциялық бірлестіктердің жеңіл өнеркәсіпті дамыту жөніндегі күн тәртібін ілгерілетудегі тәжірибесі ұсынылды, заңнамалық – құқықтық мәселелерден бастап ірілендірілген жәрмеңке-көрме іс–шараларына дейін әртүрлі ұйымдар іске асыратын бірлескен бастамаларды үндестіру және ұлғайту қажеттігі атап өтілді. Георгий Арзуманян жеңіл өнеркәсіп Еуразиялық экономикалық одақ елдері үшін орташа мерзімді перспективада өнеркәсіптік ынтымақтастықтың басым бағыты бола отырып, тұтастай алғанда, Одақ мемлекеттерінің көпшілігінде өсудің оң серпінімен сипатталатынын атап өтті. "Сонымен қатар, сапалы шикізатпен қамтамасыз ету, соның ішінде бастапқы шикізатты қайта өңдеу, химиялық талшықтар мен жіптер өндірісін жолға қою, техникалық тоқыма бұйымдарын дамыту, ЕАЭО аумағында негізгі жабдықтар мен қосалқы материалдардың, бірінші кезекте станоктардың, аз тоннажды химия өнімдері өндірісінің болмауы секілді бірқатар елеулі проблемалар әлі де бар. Бұл мәселелерді шешу елдеріміздің мемлекеттік органдары тарапынан күшейтілген назарды, неғұрлым жүйелі тәсілдемені және кешенді қолдауды талап етеді", — деп атап өтті Георгий Арзуманян. Оның сөзінше, саланы технологиялық дамыту, еңбек ресурстарының тапшылығы мәселелері және құзыреттілік орталықтарын құру қажеттігі айрықша назар аударуды тілейді. Пікірсайыс аясында саланы қолдаудың қазіргі бар шаралары бойынша жан-жақты пікір алмасу болды. Атап айтқанда, ЕЭК Өнеркәсіптік саясат департаментінің өкілі ЕАЭО-дағы бірлескен кооперациялық жобаларға қаржылай жәрдемдесудің жаңа ұлтүсті құралы туралы егжей-тегжейлі айтып берді. 

22 Aug 2024 Автомобиль жасауда өнеркәсіптік кооперацияны дамытудың жаңа мүмкіндіктері талқыланды Еуразиялық экономикалық комиссияның Өнеркәсіптік саясат департаментінің Еуразиялық экономикалық кеңістікке мүше мемлекеттердің өнеркәсіптік кешендерін дамыту мониторингі және талдау бөлімі бастығының орынбасары Галина Мартинкевич ХV Халықаралық Мәскеу автомобиль форумында Еуразиялық экономикалық одақта автомобиль жасау саласындағы кооперациялық ынтымақтастықты дамытудың жаңа механизмдері туралы баяндама жасады. "ЕАЭО-да автомобиль жасаудағы салааралық кооперация дайын өнім жеткізілімі, сондай-ақ Одақ аумағындағы құрастыру өндірістері үшін компоненттер мен олардың бөліктерін өндіру мен жеткізу бөлігіндегі жеткізілім арқылы жүзеге асырылады", — деп атап өткен Галина Мартинкевич өз сөзін "Бұл үшін мүше мемлекеттердің, соның ішінде үшінші елдердің өндірушілерінің қатысуымен, бірлескен жобаларды іске асыру бойынша қажетті құзыреттері мен ғылыми-технологиялық базасы бар" деп толықтырды. Комиссия өкілі кооперацияның: дизельді қозғалтқыш жасау саласындағы бірлескен жобаларды (Минск мотор зауыты және Ярославль мотор зауыты), Көкшетаудағы "КАМАЗ-Инжиниринг" АҚ-ның бірлескен Қазақстан-Ресей жобасын пысықтау сияқты мысалдарын келтірді. Электр көлік құралдарын өндіру және танымал ету бөлігіндегі ағымдағы әлемдік үрдістерді ескере отырып, Комиссияда "Еуразиялық электробус" жобасын әзірлеу бойынша жұмыс жүргізілуде, мүше мемлекеттердің аумағында автомобиль электр көлігі үшін зарядтау және сервистік инфрақұрылымның (объектілердің орналасқан жерін көрсете отырып) интерактивті картасы қалыптастырылады. "Бұл жобаларға, соның ішінде оқшаулау деңгейін арттыру және автокомпоненттік базаны дамыту мақсатында басқа да мүдделі өндірушілер, қосыла алады", — деп атап өтті Галина Мартинкевич. Оның сөзінше, мүше мемлекеттердің автомобиль жасау саласындағы таяу болашақтағы негізгі міндеттері құрастыру өндірістерін оқшаулауды арттыру, көлік құралдарының жаңа түрлерін шығаруды игеру, автокомпоненттер мен материалдар бағытын дамыту, электр қозғалтқышы бар көлік құралдарын өндіру мен пайдалануды ынталандыру, ЕАЭО аумағында көлік құралдарының ұлттық брендтерін шығару болып табылады. Галина Мартинкевич атап өткендей, бұл міндеттерді іске асыруға Еуразиялық экономикалық одақтағы кооперациялық өнеркәсіптік жобаларға қаржылай жәрдемдесудің жаңа механизмінің мүмкіндіктерін пайдалану ықпал ететін болады.

11 Jul 2024 Георгий Арзуманян Оралдың өндірісшілерін ЕАЭО-ның кооперациялық тізбегіне белсендірек қосылуға шақырды Еуразиялық экономикалық комиссияның Өнеркәсіптік саясат департаменті директорының орынбасары Георгий Арзуманян Екатеринбургте «Иннопром» халықаралық көрмесінде оралдық металлургия, машина жасау, станок жасау және басқа кәсіпорындарының өкілдерін өнеркәсіптік кооперацияны қаржыландыру механизмімен таныстырды. ЕЭК өкілі оны іске асыру кезеңдері, жобаларды іріктеудің негізгі критерийлері және қаржы ұйымдары мен қарыз алушыларға қойылатын талаптар туралы айтып берді. "Механизм Еуразиялық экономикалық одақ елдерінде жақында – осы жылғы маусымда іске қосылды және жобаның әлеуетті қатысушыларында әлі де көптеген мәселе бар. Біз жаңа құралды бизнеске барынша түсінікті ету үшін түсіндіру жұмыстарын жүргізудеміз. Бұл тұрғыда "Иннопром" алаңы бізге көп көмектесті, қызу диалог форматы кәсіпорындардан тез кері байланыс алуға мүмкіндік береді," – деп атап өтті Георгий Арзуманян. Георгий Арзуманян өңір кәсіпорындарын ЕАЭО-ның кооперациялық тізбегіне белсендірек қосылуға шақырды. Георгий Арзуманян ЕЭК стендінде өңірлік делегациялардың өкілдерімен бірқатар жұмыс кездесуін өткізді, солардың барысында нормативтік-құқықтық реттеу, техникалық стандарттар мәселесі, инвестициялар тартудың және өнеркәсіптік жобаларды іске асырудың жаңа шешімдері талқыланды. ЕЭК іс-шараларына Екатеринбургтің "Композит Групп" холдингінің, Дмитровградтан келген "Полесье ДГ" ЖШҚ, Санкт-Петербургтің "Дека" дәнекерлеу материалдары зауытының басшылары, Калининград облысының Өнеркәсіптік саясат, кәсіпкерлікті және сауданы дамыту министрлігінің, Ульянов облысының Өнеркәсіпті дамыту орталығының, Самара облысының Инвестицияларды тарту агенттігінің және Орынбор облысының Инвестициялық даму агенттігінің өкілдері қатысты. «Иннопром» халықаралық өнеркәсіптік көрмесі Екатеринбургте 2010 жылдан бері жыл сайын өткізіліп келеді. Іс-шара аясында дәстүрлі түрде ЕАЭО-ға мүше мемлекеттер мен шет елдердің экономиканың нақты секторындағы жетістіктері көрсетіледі.

09 Jul 2024 Екатеринбургтегі «Иннопром» халықаралық көрмесінде ЕАЭО-ның өнеркәсіптік саясат жөніндегі кеңесінің отырысы болып өтті Күн тәртібіне Еуразиялық экономикалық одақ шеңберіндегі өнеркәсіптік ынтымақтастықтың 2030 жылға дейінгі негізгі бағыттары, Ресей Федерациясының робот техникасын дамытудың, ЕАЭО-да өнеркәсіптік роботтарды өндіру мен ендірудің мемлекетаралық бағдарламасын әзірлеу жөніндегі бастамашылық ұсынысы, Еуразиялық өнеркәсіптік кооперация, субконтрактация және технологиялар трансфері желісі туралы, сондай-ақ өнеркәсіптегі бірлескен кооперациялық жобаларға қаржылық көмек көрсету механизмін іске асыру барысы туралы мәселелер енді. Отырысқа қатысушылар жүргізіліп жатқан жұмыстарды және 2030-өнеркәсіптік ынтымақтастықтың негізгі бағыттарының (ӨЫНБ) жобасын оларды бекіту үшін қажетті құжаттар пакетімен қоса мақұлдады. Жобаға сәйкес ЕАЭО елдері үш бағыт: Одақ нарығының әлеуетін пайдалану, өнеркәсіптік-технологиялық өзара іс-қимыл және экспорттық нарықтардағы ынтымақтастық бойынша міндеттерді шешуге шоғырланады. "ӨЫНБ-ны іске асыру жөніндегі нақты іс-шаралар алғаш рет құжатқа қосымшамен ресімделгені, іске асыру нысандарын, мерзімдерін, сондай-ақ орындауға жауаптыларды көрсете отырып, тиісті құралдар түрінде көрсетілгені түбегейлі жаңа нәрсе болып табылады. Олар ӨЫНБ-мен бір мезгілде бекітілетін болады. Белгіленген тәртіппен қаралғаннан кейін құжатты осы жылдың қазан айында Еуразиялық үкіметаралық кеңестің отырысына шығару жоспарлануда", – деп атап өтті Еуразиялық экономикалық комиссияның Өнеркәсіп және агроөнеркәсіптік кешен жөніндегі министрі Гоар Барсегян. Одақ елдерінің бейінді министрлері өндірісті дамыту және өнеркәсіптік роботтарды енгізу бойынша жаңа Еуразиялық технологиялық платформаны қалыптастыру тәсілдемелерін келісіп, старт берді. Отырысқа қатысушылар "Еуразиялық өнеркәсіптік кооперация, субконтрактация және технологиялар трансфері желісі" жобасын қайта іске қосу кезеңдерін талқылады және оны қайта форматтау жөніндегі тәсілдемелерді одан әрі пысықтауды жалғастыру туралы шешім қабылдады. Өнеркәсіп салаларында бірлескен кооперациялық жобаларға қаржылық көмек көрсету механизмін іске асыруға қатысты Гоар Барсегян бизнес пен қаржы ұйымдарының жаңа механизмге қатысу шарттары туралы хабардар ету бойынша Комиссияның белсенді жұмыс жүргізіп жатқанын атап өтті. Атап айтқанда, мүше мемлекеттердің кооперациялық жобаларды қалыптастыруы кезінде оларға консультациялық қолдау жүйелі негізде жүзеге асырылады. "Комиссияға алғашқы жобалық ұсыныс келіп түсті, ол қаралып жатыр. Бизнестің жобалық белсенділігін жандандыру маңызды, бұл жерден біз "бестік" елдерінің өңіраралық байланыстарын кеңейтудегі елеулі әлеуетін көріп отырмыз. Осы мәселеде Комиссия мүше мемлекеттердің мүдделі ведомстволарының жәрдеміне сүйенеді", – деп хабарлады Гоар Барсегян. Тараптар өнеркәсіп салаларында бірлескен коперациялық жобаларды іздеу мен дайындау жөніндегі жұмысты жандандыру жайында шешім қабылдады.

Жаңалықтар

ЕАЭО ресурстары