Жаңалықтар

29 сәуірдің 2025 Гоар Барсегян: "ЕАЭО елдері Өзбекстан Республикасымен кооперациялық байланысты белсенді дамытуда" 28-29 сәуірде Ташкентте Еуразиялық экономикалық комиссияның Өнеркәсіп және агроөнеркәсіптік кешен жөніндегі министрі Гоар Барсегян "ИННОПРОМ. Орталық Азия" халықаралық өнеркәсіптік көрмесінің ашылу салтанатына қатысты. Көрменің басты іс-шарасы "Орталық Азиядағы стратегиялық өнеркәсіптік әріптестік: озық технологиялар негізінде интеграция" пленарлық сессиясы болды, онда Гоар Барсегян Еуразиялық экономикалық одақ мемлекеттерінің өнеркәсіптік ынтымақтастығының басымдықтары және Өзбекстан кәсіпорындарымен кооперациялық байланыстарды дамыту перспективалары туралы баяндама жасады. "ЕАЭО елдері Өзбекстан Республикасымен кооперациялық байланысты белсенді дамытуда. Машина жасау, авиация құрылысы, химия және жеңіл өнеркәсіптегі бірлескен жобалар перспективалы бола алады. Оларды іске асыруға және осы бағыттар бойынша өндірісті ұлғайтуға ЕАЭО елдері де, Өзбекстан да мүдделі", — деп атап өтті Гоар Барсегян. Көрме алаңында Гоар Барсегян Қазақстан Республикасының Өнеркәсіп және құрылыс министрі Ерсайын Нағаспаевпен жұмыс кездесуін өткізді. ЕАЭО шеңберіндегі ынтымақтастықтың перспективалық бағыттары талқыланды. Бұдан басқа, Гоар Барсегян "Tashtib-Tex" ЖШҚ Ташкент тоқыма комбинаты" кәсіпорнына барды, оның барысында жеңіл өнеркәсіп саласындағы және ЕЭК пен Өзбекстан Үкіметінің 2024 – 2026 жылдарға арналған бірлескен іс-шаралар жоспарын іске асыру шеңберіндегі ынтымақтастықты дамытудың мәселелері талқыланды.

29 сәуірдің 2025 ЕЭК-те ЕАЭО агроөнеркәсіптік кешеніндегі цифрлық экономиканы дамыту проблемалары мен бірлескен іс-қимыл талқыланды Еуразиялық экономикалық комиссияның штаб-пәтерінде Еуразиялық экономикалық одақ шеңберінде агроөнеркәсіптік кешендегі цифрлық экономиканы дамыту мәселелеріне арналған дөңгелек үстел болып өтті. ЕЭК Агроөнеркәсіптік саясат департаментінің директоры Наира Карапетян ЕАЭО интеграцияланған ақпараттық жүйесі шеңберінде цифрлық экожүйенің қалыптасуы туралы айтып, ауыл шаруашылығы өсімдіктерінің, асыл тұқымды малдың сорттары және селекциялық жетістіктер бойынша деректер алмасу мәселелеріне, сондай-ақ агроиндустрияның интерактивті картасына тоқталды. "2026 жылғы 1 маусымнан бастап Ауыл шаруашылығы өнімдеріне қойма куәліктерін шығару (беру), айналысқа жіберу және өтеу қағидалары туралы келісімді іс жүзінде іске асыру басталады, бұл ауыл шаруашылығы өнімдерінің электрондық саудасын дамытуға жаңа серпім береді", – деп Наира Карапетян дөңгелек үстелге қатысушыларды хабардар етті. Дөңгелек үстелге қатысушылар дәлме- дәл егін шаруашылығы технологияларын, фермаларды автоматтандыруды және т.б. қоса, өсімдік шаруашылығы мен мал шаруашылығындағы цифрлық шешімдерді ендіру тәжірибесімен бөлісті. Іс-шара ЕАЭО агроөнеркәсіптік кешенін цифрлық трансформациялаудың маңыздылығын және экономиканың осы секторының бәсекеге қабілеттілігін арттыру мақсатында тиімді экожүйені құру үшін мүше мемлекеттердің бірлескен күш-жігері қажет екенін растады. Дөңгелек үстелге ЕАЭО елдерінің Ауыл шаруашылығы министрліктерінің, бизнесінің өкілдері, халықаралық сарапшылар қатысты.

29 сәуірдің 2025 ЕЭК-те ЕАЭО шеңберіндегі асыл тұқымды мал шаруашылығындағы мемлекетаралық өзара іс-қимылдың механизмдері талқыланды Еуразиялық экономикалық комиссияның Агроөнеркәсіптік саясат департаменті "AGROBRICS+" Астық – Құрама жем – Ветеринария" MVC халықаралық көрмесі шеңберінде "Асыл тұқымды мал шаруашылығы саласында Еуразиялық құзыреттілік орталықтарын қалыптастыру" атты дөңгелек үстел өткізді. БҰҰ Азық-түлік және ауыл шаруашылығы ұйымының қатысуымен Еуразиялық экономикалық одақ елдерінің мемлекеттік басқару органдарының, бизнес-одақтарының, ғылыми мекемелерінің өкілдері ауыл шаруашылығы жануарларының асыл тұқымдық құндылығын болжау технологиясын, соның ішінде геномдық талдау негізінде пайдалануды кеңейту бойынша мемлекетаралық өзара іс-қимылдың маңызды бағыттары мен механизмдерін талқылады. Спикерлер ұсынған және пікірсайысқа қатысушылар қолдаған Еуразиялық геномдық селекция жүйесінің тұжырымдамалары мен модельдері, сондай-ақ бірлескен селекциялық-генетикалық зерттеулер жүргізуге және тәжірибе алмасуға орайлас тәсілдемелер асыл тұқымды мал шаруашылығындағы құзыреттіліктің Еуразиялық орталықтары базасында селекциялық-асылдандыру жұмысын үйлестіру және талдамалық қамтамасыз ету шеңберінде іске асырылуы мүмкін. "Дөңгелек үстел жұмысының қорытындылары геномдық селекцияны және жоғары тиімді репродуктивті технологияларды кеңінен ендіру негізінде Одақ мемлекеттерінің мал шаруашылығын орнықты дамыту үшін мемлекетаралық өзара іс-қимылдың келісілген механизмдерін Комиссия алаңында одан әрі қарау мен әзірлеудің нысанасына айналады", — деп түйіндеді ЕЭК Агроөнеркәсіптік саясат департаментінің директоры Наира Карапетян.

23 сәуірдің 2025 ЕЭК өнеркәсіп пен АӨК саласында Иранмен ынтымақтастықты дамыту жөнінде семинар өткізді 23 сәуірде Еуразиялық экономикалық комиссия алаңында ЕЭК  Сауда жөніндегі министрі Андрей Слепнев пен ЕЭК Өнеркәсіп және агроөнеркәсіптік кешен жөніндегі министрі Гоар Барсегянның төрағалық етуімен ЕАЭО елдері мен Иран аумағындағы арнайы экономикалық аймақтарға бизнестің қатысуын қоса, өнеркәсіп пен АӨК саласында Иранмен ынтымақтастықты дамыту перспективаларына арналған семинар өтті. Іс-шара Еуразиялық экономикалық одақ пен Иран Ислам Республикасы арасындағы Еркін сауда туралы толық форматты келісімнің күшіне енуі қарсаңында ұйымдастырылды. "Мұндай семинарлар проблемалық мәселелерді де, біздің сауда-экономикалық қатынастарымыздың дамуындағы жаңа өсу нүктесі болуы мүмкін бағыттарды да талқылауға мүмкіндік беретін тиімді алаң болып табылады", – деп атап өтті Андрей Слепнев. Ол Келісімнің осы жылғы 15 мамырда күшіне енгізілгенінен кейін ЕАЭО елдерінің компаниялары Иран нарығына қол жеткізудің бірегей жағдайларына ие болатынын атап көрсетті және тараптар ашылатын перспективаларды, соның ішінде өнеркәсіптік кооперацияны жолға қою бөлігінде толық пайдаланатынына үміт білдірді. Келісімде, атап айтқанда, ЕАЭО мен Иранның іскер топтары өзара мүддені білдіретін ынтымақтастықты дамытудың әртүрлі бағыттарын нақты талқылай алатын бірқатар диалог құралын құру көзделген. "Салалық ынтымақтастық шеңберінде біз өнеркәсіптік және агроөнеркәсіптік кәсіпорындардың өзара іс-қимылында, ғылыми зерттеулерді, технологиялар мен инновацияларды дамытуда, кооперациялық байланыстарды кеңейтуде елеулі әлеует бар екенін көріп отырмыз. ЕАЭО мемлекеттерінің үлкен экономикалық әлеуеті бар, ал ресурстардың болуы мен бірлескен іс-қимыл мүше мемлекеттердің Иранмен өзара тауар айналымын ұлғайту, бәсекеге қабілетті өндіріс көлемін ұлғайту және жоғары технологиялық өнім экспортын дамыту мүмкіндігін ашады", – деп атап өтті Гоар Барсегян. Өнеркәсіп пен АӨК саласындағы ирандық әріптестермен өзара іс-қимылдың неғұрлым перспективалы бағыттарын Келісімнің ережелерін имплементациялауға бағытталған ЕАЭО, оған мүше мемлекеттер және Иран арасындағы Сауда-экономикалық ынтымақтастық жөніндегі бірлескен іс-шаралар жоспарының (жол картасының) әзірленіп жатқан жобасына кірістіру ұсынылады. Семинарға ЕАЭО елдерінің өнеркәсібі мен ауыл шаруашылығының түрлі саласын білдіретін және ирандық әріптестермен өзара іс-қимылды дамытуға әрі Иран нарығына шығуға мүдделі мемлекеттік органдарының, іскерлік бірлестіктері мен компанияларының өкілдері қатысты.

18 сәуірдің 2025 Сәуле Молдабаева ЕЭК-тің Агроөнеркәсіптік саясат департаменті директорының орынбасары болып тағайындалды Сәуле Сүндетбайқызы Молдабаева 1982 жылы 19 наурызда Қазақстан Республикасының Қостанай облысындағы Рудный қаласында туған. 2003 жылы О. А. Байқоңыров атындағы Жезқазған университетін, 2007 жылы "Қазтұтынуодағы"-ның Қарағанды экономикалық университетін "Есеп және аудит"мамандығы бойынша бітірген. 2004 жылы — Қазақстан Республикасы Мемлекеттік қызмет істері агенттігінің құжаттамалық қамтамасыз ету, бақылау және кадр жұмысы бөлімінің маманы. 2004 жылғы қарашадан бастап 2024 жылға дейін Қазақстан Республикасы Ауыл шаруашылығы министрлігінің Стратегиялық жоспарлау және талдау департаментінде жұмыс істеп, жетекші маманнан осы Департаменттің директорына дейінгі жолдан өтті. 2024 жылғы шілдеден бастап — Қазақстан Республикасы Ауыл шаруашылығы министрлігінің Халықаралық ынтымақтастық және инвестициялар тарту департаменті және Стратегиялық жоспарлау және талдау департаменті директорының орынбасары. Мемлекеттік наградалармен: "Ерен еңбегі үшін" медалімен, Қазақстан Республикасы Президентінің Құрмет грамотасымен, "Ауыл шаруашылығы саласының үздігі" төсбелгісімен, Қазақстан Республикасы Ауыл шаруашылығы министрінің құрмет грамоталарымен және алғыс хаттарымен, бірқатар мерейтойлық медальдармен марапатталған. 2025 жылғы 14 сәуірден бастап Еуразиялық экономикалық комиссияның Агроөнеркәсіптік саясат департаменті директорының орынбасары болып тағайындалды.

17 сәуірдің 2025 Комиссия мұнай-газ машиналарын жасайтын өндірісшілерді өнеркәсіптік кооперация жобаларын қаржыландыру механизмін пайдалануға шақырады Еуразиялық экономикалық комиссия және Ресей өнеркәсіпшілер мен кәсіпкерлер одағы Еуразиялық мұнай-газ форумы аясында "Еуразиялық экономикалық одаққа мүше мемлекеттерде мұнай-газ жабдығын өндіру саласындағы кооперациялық ынтымақтастықты дамыту туралы" бірлескен дөңгелек үстел өткізді. Саланың өзекті мәселелері, соның ішінде ЕАЭО кәсіпорындарының ынтымақтастығындағы тосқауылдарды жою жайы талқыланды. ЕЭК Өнеркәсіптік саясат департаменті директорының орынбасары Виталий Вовк 2030 жылға дейінгі ЕАЭО шеңберіндегі Өнеркәсіптік ынтымақтастықтың негізгі бағыттарына сәйкес тмұнай-газ машиналарын жасау Одақ елдерінің өзара іс-қимылының басым саласының бірі болып табылатынын атап өтті. Өнеркәсіптік кооперация жобаларын қаржыландырудың жаңа құралының ойдағыдай іске қосылуын ескере отырып, Комиссия өкілі бизнеске мүше мемлекеттердің үш немесе одан да көп кәсіпорны арасында кооперациялық байланыс құруды жандандыруды ұсынды. "Комиссия ЕЭК Алқасы ұсынымының жобасын әзірледі, ол Одақ елдерін мұнай-газ жабдығын өндіру саласындағы жобаларды іске асыру кезінде өнеркәсіптік кооперацияны қаржыландырудың жаңа механизмін пайдалану мүмкіндіктерін ескеруге бағдарлайды", — деп түйіндеді Виталий Вовк.  

11 сәуірдің 2025 ЕЭК теміржол машиналарын жасау саласында қаржылай жәрдемдесу механизмін пайдалануды жандандырады Өнеркәсіп және агроөнеркәсіптік кешен жөніндегі министр Гоар Барсегян басқарған Еуразиялық экономикалық комиссия делегациясы Тверь облысында "Түйінді жүйелер мен компоненттер" компаниялар тобының ("ТЖК" КТ) өндірістік алаңдарының жұмысымен танысты. Ресейлік бұл холдинг рельсті жылжымалы құрамға арналған жүйелер мен компоненттердің аса ірі өндірушілерінің бірі болып табылады. "ТЖК" КТ өнеркәсіптік технопаркі мен холдинг кәсіпорындарын аралау барысында Еуразиялық экономикалық одақ шеңберінде "Мәскеу — Санкт-Петербург" жоғары жылдамдықты теміржол магистралінің жобасын іске асыру үшін өнеркәсіптік кооперацияға қаржылай жәрдемдесу механизмін пайдалану талқыланды. "Біз қаржылық жәрдемдесу механизмін холдинг өндірістік қуаттарды жаңғырту және ұлғайту, сондай-ақ ЕАЭО елдерінің кәсіпорындарымен жаңа кооперациялық тізбектер құру үшін ойдағыдай пайдаланады деп санаймыз. Біз "ТЖК" КТ ғана емес, бүкіл Еуразиялық өнеркәсіптің позициясын нығайтатын жаңа кооперациялық тізбектер құра аламыз", — деп атап өтті Гоар Барсегян. "ТЖК" КТ Ресей Федерациясының он өңірінде 16 мыңнан астам адам жұмыс істейтін 20-дан астам кәсіпорынды біріктіреді. "ТЖК" КТ тапсырыс берушілерінің арасында Ресей мен Еуропаның 200-ден астам компаниясы бар.

Жаңалықтар

ЕАЭО ресурстары