арм

Նորություններ

Ելույթներ Ֆոտոսրահ Տեսադարան
28 Nov 2024 Գոհար Բարսեղյան. «ԵԱՏՄ-ում արդյունաբերական կոոպերացիայի ֆինանսական աջակցության մեխանիզմը տնտեսության իրական հատվածում ինտեգրման նոր մակարդակ է» Եվրասիական տնտեսական հանձնաժողովի արդյունաբերության և ագրոարդյունաբերական համալիրի նախարար Գոհար Բարսեղյանը տեսաձևաչափով մասնակցել է «Ռուսաստանի արդյունաբերող-2024» միջազգային համաժողով-ցուցահանդեսի լիագումար նստաշրջանի աշխատանքներին։ Գոհար Բարսեղյանը նշել է, որ Եվրասիական տնտեսական միության երկրների ընդհանուր տնտեսական շահերը խթանում են արդյունաբերական գործընկերության ենթակառուցվածքի զարգացումը։ Օրինակ՝ ընդունված նոր ռազմավարական փաստաթուղթը՝ «ՄԻնչև 2030 թվականն ընկած ժամանակահատվածի արդյունաբերական համագործակցության հիմնական ուղղությունները», որը սահմանում է տնտեսության իրական հատվածում ԵԱՏՄ երկրների գործունեության գերակայությունները։ Դրանց թվում են Միության ներքին շուկայի ներուժն օգտագործելու նպատակով ջանքերի միավորումը, արդյունաբերական և տեխնոլոգիական համագործակցության զարգացումը, փոխգործակցությունը արտահանման շուկաներում։ ԵՏՀ նախարարը համաժողովի մասնակիցներին պատմել է նաև ԵԱՏՄ-ում արդյունաբերական կոոպերացիայի նախագծերի ֆինանսական աջակցության մեխանիզմի մասին։ «Սա տնտեսության իրական հատվածում ինտեգրման նոր մակարդակ է։ Որպես աջակցության միջոց սահմանվել է Միության բյուջեից ֆինանսական կազմակերպությունների կողմից համատեղ նախագծերի իրականացման նպատակով տրվող վարկերի և փոխառությունների տոկոսադրույքի սուբսիդավորումը։ Մեր երկրների ղեկավարները նման նախագծերի համար աննախադեպ պայմանների են հավանություն տվել՝ դա անդամ պետության կենտրոնական բանկի առանցքային դրույքաչափի հարյուր տոկոսանոց փոխհատուցումն է։ Նոր մեխանիզմը մշակվել է որպես փորձնական, և նախագծերի արտոնյալ վարկավորման համապատասխան համակարգը ԵԱՏՄ-ում գործելու է հինգ տարի»,- ընդգծել է ԵՏՀ նախարարը։ Ամփոփելով՝ Գոհար Բարսեղյանը նշել է, որ բիզնեսի ներկայացուցիչների հետ ուղիղ երկխոսությունը թույլ կտա փոխըմբռնում ձեռք բերել փոխադարձ շահի վրա հիմնված եվրասիական կոոպերացիոն նախագծերին մասնակիցների ներգրավման հրատապ խնդիրների լուծման հարցում:
25 Nov 2024 Գեորգի Արզումանյանը խոսել է ԵԱՏՄ-ում միջերկրային արդյունաբերական կոոպերացիայի հնարավորությունների մասին Եվրասիական տնտեսական հանձնաժողովի արդյունաբերական քաղաքականության վարչության փոխտնօրեն Գեորգի Արզումանյանը թեմատիկ զեկույցով հանդես է եկել Ալմաթիում՝ NON-FOOD ASIA EXPO միջազգային ցուցահանդեսի ընթացքում անցկացվող «Ապրանքային հոսքերի կազմակերպումը ԵԱՏՄ և Ասիա երկրներում» կլոր սեղանի շրջանակներում։ Գեորգի Արզումանյանի խոսքով, այսօր Եվրասիական տնտեսական միությունում արդյունաբերության զարգացման նպատակների իրականացման հիմնական խնդիրներն են կոոպերացիոն փոխգործակցության և համագործակցության ընդհանուր տարածքի ձևավորումը, ինչպես նաև ԵԱՏՄ ընդհանուր շուկան առանցքային ապրանքներով և ռեսուրսներով ապահովելը։ Այս խնդիրների իրականացումը կնպաստի կոոպերացիոն նախագծերին աջակցելու մեխանիզմների զարգացմանը, գերակա ուղղություններով համատեղ արտադրության տեղայնացման, երրորդ երկրների շուկաներ ապրանքների արտահանման զարգացման ուղղությամբ անդամ պետությունների ջանքերի միավորմանը։ «Մեր նպատակներին հասնելու համար չափազանց կարևոր է դառնում Միության ներուժի օգտագործումը,- նշել է Գեորգի Արզումանյանը։ - Այստեղ մեծ նշանակություն ունեն նաև ֆինանսական ինստիտուտների՝ որպես համատեղ արտադրություններին աջակցելու հիմնական տարրի աշխատանքը և Հանձնաժողովի գործունեությունը ԵԱՏՄ-ում կոոպերացիայի խթանման նոր պայմանների և մեխանիզմների մշակման մասով»։ Նա, մասնավորապես, խոսել է արդյունաբերական կոոպերացիայի ֆինանսավորման նոր մեխանիզմի մասին, որը մշակվել է Հանձնաժողովի կողմից անդամ պետությունների հետ համատեղ և գործարկվել այս տարվա հունիսին։ «Սա Միությունում իրական հատվածի ֆինանսական աջակցության առաջին վերազգային գործիքն է, - ընդգծել է ԵՏՀ ներկայացուցիչը։ – Մեխանիզմը ձեռնարկատերերին առաջարկում է աննախադեպ պայմաններ՝ փոխհատուցում անդամ պետության կենտրոնական բանկի հիմնական դրույքաչափի 100%-ի չափով: Բիզնեսի համար մեկ այլ կարևոր առավելություն է փոքր և միջին ձեռնարկությունների կողմից նոր տեխնոլոգիաների հասանելիությունը ստանալու հնարավորությունը»: Ֆինանսավորման նոր գործիքը մեծ հետաքրքրություն է առաջացրել ցուցահանդեսի մասնակիցների շրջանում։ Դրա իրականացման մանրամասն քննարկումը շարունակվել է Գեորգի Արզումանյանի և Ղազախստանի բիզնեսի ներկայացուցիչների երկկողմ հանդիպումների ընթացքում։ Դրա հետ մեկտեղ քննարկվել են համատեղ արտադրված արտադրանքի արտահանմանն աջակցելու միջոցները, պետգնումների հասանելիության մասով խոչընդոտները, մաքսային հարցեր։ Գեորգի Արզումանյանը մասնակցել է նաև բիզնեսի խթանմանը և ներդրումներին նվիրված ռազմավարական նստաշրջանին։
22 Nov 2024 Գոհար Բարսեղյանը խոսել է ԵԱՏՄ ձեռքբերումների մասին Եվրասիական տնտեսական հանձնաժողովի արդյունաբերության և ագրոարդյունաբերական համալիրի նախարար Գոհար Բարսեղյանը Մոսկվայում ելույթ է ունեցել ՌԴ ԱԳՆ ՄԳԻՄՕ հարթակում կայացած «Եվրասիական տնտեսական միության 10 տարին. ձեռքբերումներ և գերակայություններ» լիագումար նստաշրջանում։ Գոհար Բարսեղյանը միջոցառման մասնակիցներին պատմել է, թե Եվրասիական տնտեսական միության ինչ ձեռքբերումներով են ինտեգրացիոն միավորման երկրները եկել հոբելյանական օրվան։ Ինչպես նշել է ԵՏՀ նախարարը, 10 տարվա ընթացքում Միության ՀՆԱ-ն աճել է ավելի քան 12%-ով, և անցած տարվա արդյունքներով այն գնահատվել է 2.4 տրիլիոն դոլար։ Զարգանում է փոխադարձ առևտուրը, որի ծավալը 2023 թվականի վերջին հասել է 88.7 մլրդ դոլարի։ Տասնամյակի ընթացքում ԵԱՏՄ երկրների միջև ապրանքաշրջանառության ծավալը կրկնապատկվել է: Նախարարը տեղեկացրել է նաև Միությունում արդյունաբերության ոլորտի զարգացման, դրա աջակցության և խթանման գործիքների մասին։  «Ձևավորվել է զարգացման միութենական բյուջե, որն ուղղված է արդյունաբերական արտադրությունում նոր տարածաշրջանային կոոպերացիոն շղթաների ստեղծմանը»,- նշել է Գոհար Բարսեղյանը։
20 Nov 2024 Քննարկվել են ԵԱՏՄ հաստոցաշինության և միկրոէլեկտրոնիկայի ոլորտի արդյունաբերական քաղաքականության գերակայությունները Եվրասիական տնտեսական հանձնաժողովի արդյունաբերական քաղաքականության վարչության փոխտնօրեն Գեորգի Արզումանյանը մասնակցել է «Ինտեգրում» 6-րդ եվրասիական բիզնես համաժողովի «Հաստոցաշինություն և միկրոէլեկտրոնիկա՝ ԵԱՏՄ արդյունաբերական քաղաքականության հիմնական գերակայություններ» ոլորտային նստաշրջանի աշխատանքներին։ «Հանձնաժողովի արդյունաբերական բլոկի կողմից իրականացված հաստոցաշինության շուկայի վերլուծությունը ցույց է տվել, որ Եվրասիական տնտեսական միությունում ներմուծման բաժինը ընդհանուր սպառման մեջ կազմում է մոտ 80-85%: Աճում է ինչպես ընդհանուր առմամբ հաստոցաշինության արտադրանքի ներմուծման ծավալը, այնպես էլ ԵԱՏՄ շուկայում Ասիախաղաղօվկիանոսյան տարածաշրջանի արտադրողների բաժինը: Միկրոէլեկտրոնիկայի շուկան նաև ցույց է տալիս լուրջ կախվածություն ներմուծումից, ինչն առաջացնում է ԵԱՏՄ անդամ պետությունների միջև արագացված արդյունաբերական կոոպերացիայի անհրաժեշտություն»,- հայտնել է Գեորգի Արզումանյանը։ Նա նիստի մասնակիցներին տեղեկացրել է այս ուղղությամբ Հանձնաժողովի աշխատանքի, Միությունում հաստոցաշինության և միկրոէլեկտրոնիկայի ոլորտներում արդյունաբերական կոոպերացիայի զարգացման, ինչպես նաև արդյունաբերական կոոպերացիայի ֆինանսավորման նոր մեխանիզմի և դրա օգտագործման հնարավորությունների մասին։ Գործարար համայնքի ներկայացուցիչները խոսել են ժամանակակից հաստոցաշինական արտադրությունների ռոբոտացման և ավտոմատացման, տեխնոլոգիական վերազինման դեպքում շահերի հավասարակշռման, ԵԱՏՄ երկրներում պատժամիջոցների պայմաններում հաստոցաշինության զարգացման, միկրոէլեկտրոնիկայի ոլորտում ներմուծմանը փոխարինող նորարարական լուծումների մասին։
15 Nov 2024 ԵԱՏՄ երկրների ագրոարդյունաբերական համալիրի խորհրդում քննարկվել են ձեռքբերումներն ու հեռանկարները Նոյեմբերի 15-ին Երևանում կայացած Եվրասիական տնտեսական միության ագրոարդյունաբերական քաղաքականության խորհրդի նիստում ԵԱՏՄ երկրների լիազոր մարմինների ղեկավարները և Եվրասիական տնտեսական հանձնաժողովի արդյունաբերության և ագրոարդյունաբերական համալիրի նախարար Գոհար Բարսեղյանը քննարկել են անդամ պետությունների ագրոարդյունաբերական համալիրների զարգացման դինամիկան, ոլորտի արդյունավետության բարձրացման ուղիները, միջպետական համագործակցության ներուժը և ընդգծել Եվրասիական «հնգյակի» պետություններում գյուղատնտեսության զարգացման դրական միտումները: Նիստի մասնակիցները քննարկել են ԵԱՏՄ ագրոարդյունաբերական համալիրին տրամադրվող պետական աջակցության զարգացման հեռանկարային ուղղությունները։  «Անշուշտ, անդամ պետություններում գյուղատնտեսությանը պետական աջակցության հեռանկարային միջոցներն են՝ արտոնյալ վարկավորումը, գյուղացիների ներդրումային ծախսերի մի մասի բյուջետային փոխհատուցումը, գյուղմթերքի գերակա տեսակների արտադրության համար դրամաշնորհների և ուղղակի վճարումների տրամադրումը։ Կարևոր է ուշադիր լինել նման աջակցության տրամադրման մեխանիզմների և վարչարարության ձևերի նկատմամբ դրա արդյունավետությունը բարելավելու համար: Միության յուրաքանչյուր երկրում որոշակի պրակտիկա է ձևավորվել, որին հարկ է ուշադրություն դարձնել անդամ պետությունների հնարավոր մասշտաբավորման համար»,- ընդգծել է ԵՏՀ արդյունաբերության և ագրոարդյունաբերական համալիրի նախարար Գոհար Բարսեղյանը։ Կողմերը կողմ են արտահայտվել փորձի փոխանակման նպատակով տարեկան կտրվածքով պետական աջակցությանը նվիրված արտագնա սեմինարներ անցկացնելու նախաձեռնությունը։ Նախարարները քննարկել են հիմնական գյուղատնտեսական ապրանքների և պարենի ներքին շուկայի կայուն զարգացման ապահովմանն ուղղված ագրոարդյունաբերական համալիրների կանխատեսման համակարգի կատարելագործման մոտեցումները։ Քննարկվել են ագրոարդյունաբերական համալիրի մասով ԵԱՏՄ շրջանակներում մինչև 2030 թվականը և մինչև 2045 թվականն ընկած ժամանակահատվածում տնտեսական գործընթացների հետագա զարգացման մասին «Եվրասիական տնտեսական ուղի» հռչակագրի իրականացման պլանի նախապատրաստման միջոցառումները: Կոնսենսուս է ձեռք բերվել գյուղատնտեսության, տոհմային անասնաբուծության և սերմնաբուծության պետական աջակցության, ԱԱՀ արտադրանքի պահեստավորման ենթակառուցվածքի օբյեկտների վերաբերյալ տեղեկատվական ռեսուրսի ստեղծման հարցերում։ Խորհրդի անդամները պայմանավորվել են արագացնել դիրքորոշումների մերձեցման աշխատանքները Եվրասիական տնտեսական միության շրջանակներում արտադրանքը որպես օրգանական ճանաչելու կարգի մասին համաձայնագրի նախագիծը համաձայնեցնելու համար: Պայմանավորվածություն է ձեռք բերվել Միության ընդհանուր ագրարային շուկայում հավասարակշռության ապահովմանն ուղղված համագործակցությունը խորացնելու մասին՝ հաշվի առնելով ազգային շահերը և ինտեգրացիոն միավորման նպատակները: Գոհար Բարսեղյանը մասնակցել է Հայաստանի Հանրապետության փոխվարչապետ, Եվրասիական տնտեսական հանձնաժողովի խորհրդի նախագահ Մհեր Գրիգորյանի և Ռուսաստանի Դաշնության գյուղատնտեսության նախարար Օքսանա Լուտի հանդիպմանը, որի ընթացքում քննարկվել են ագրոարդյունաբերական համալիրի զարգացման հեռանկարային ուղղությունները, այդ թվում՝ ԵԱՏՄ շրջանակներում: Եվրասիական տնտեսական միության ագրոարդյունաբերական քաղաքականության խորհուրդը ստեղծվել է անդամ պետությունների ղեկավարների որոշմամբ՝ համաձայնեցված ագրոարդյունաբերական քաղաքականության իրագործման շրջանակներում Միության երկրների գյուղատնտեսության նախարարությունների արդյունավետ փոխգործակցության ապահովման համար։ Խորհրդի կազմում ընդգրկվել են ԵԱՏՄ պետությունների գյուղատնտեսության նախարարները և ԵՏՀ-ի՝ արդյունաբերության և ագրոարդյունաբերական համալիրի և տեխնիկական կարգավորման նախարարները։
14 Nov 2024 Նիկոլայ Կուշնարև. «Արդյունաբերական կոոպերացիան նպաստում է ազգային արտահանման առաջմղմանը» Եվրասիական տնտեսական հանձնաժողովի արդյունաբերական քաղաքականության վարչության տնօրեն Նիկոլայ Կուշնարևը «Արտահանմանն ուղղված և օտարերկրյա նախագծերի իրականացում, հեռանկարներ և աջակցության հարցեր» նստաշրջանում խոսել է Եվրասիական տնտեսական միությունում արտահանման զարգացումը խթանող արդյունաբերական կոոպերացիայի առանցքային մեխանիզմների մասին: Միջոցառումը տեղի է ունեցել «Ռուսաստան. նախագծային և կառուցվածքային ֆինանսավորում 2024» խորհրդաժողովի շրջանակներում։ Որպես արտահանման աջակցության կարևորագույն գործիքներից մեկը Նիկոլայ Կուշնարևը նշել է ԵԱՏՄ-ում արդյունաբերական կոոպերացիայի ֆինանսավորման մեխանիզմը, որը մշակել է Հանձնաժողովը անդամ պետությունների հետ համատեղ։ «Մեր նոր մեխանիզմը նախատեսում է արդյունաբերական ձեռնարկությունների արդիականացման և տեխնիկական վերազինման հնարավորություն, ինչը նպաստում է արտահանման շուկայում նրանց մրցունակության բարձրացմանը,- ընդգծել է Նիկոլայ Կուշնարևը։ - Ազգային արտահանումը խթանող ևս մեկ միջոց է տեխնոլոգիական սարքավորումների և համալրողների մատակարարումը կոոպերացիոն նախագծերի իրականացման շրջանակում»: Նիկոլայ Կուշնարևը նաև նշել է Հանձնաժողովի աջակցությունը ԵԱՏՄ երկրներում արդյունաբերական կլաստերների ձևավորմանը։ Նրա խոսքով՝ Հանձնաժողովն աջակցում էՌուսաստանի արտաքին շուկաներում արդյունաբերանորարարական ենթակառուցվածքներ ստեղծելու մասին Ռուսաստանի Դաշնության արդյունաբերության և առևտրի նախարարության նախաձեռնությանը։ Եզրափակելով՝ Նիկոլայ Կուշնարևը նշել է Հանձնաժողովի պատրաստակամությունը՝ ակտիվացնելու արդյունաբերության ոլորտի միջպետական ծրագրերի և նախագծերի մշակման, ֆինանսավորման և իրականացման գործունեությունը։ «Միջպետական ծրագրերն ու նախագծերը նորարարական արտադրանքի մշակման և արդյունաբերական արտադրությունում առաջադեմ տեխնոլոգիաների ներդրման կոնկրետ խնդիրների լուծման մեխանիզմ են, - ընդգծել է Նիկոլայ Կուշնարևը: - Եվ մենք ցանկանում ենք, որ այս գործիքը դառնա նաև արդյունաբերական արտադրանք արտահանողներին աջակցելու արդյունավետ միջոց»: «Ռուսաստան. նախագծային և կառուցվածքային ֆինանսավորում 2024» ամենամյա խորհրդաժողովը խոշորագույն ոլորտային միջոցառում է, որն իր հարթակում միավորում է առաջատար բանկերի, կորպորացիաների, պետական կառույցների ղեկավարության ներկայացուցիչներին և ներդրումային նախագծեր նախաձեռնողներին փորձի փոխանակման և Ռուսաստանում նախագծային ֆինանսավորման արդի խնդիրների քննարկման համար:
14 Nov 2024 Գոհար Բարսեղյան. «Արդյունաբերության և ԱԱՀ զարգացումը կարևոր ներդրում ունի ԵԱՏՄ երկրների տնտեսության իրական հատվածի խթանման գործում» Եվրասիական տնտեսական հանձնաժողովի արդյունաբերության և ագրոարդյունաբերական համալիրի նախարար Գոհար Բարսեղյանը Մոսկվայում Եվրասիական տնտեսական միության պետությունների ձեռնարկատերերի և օտարերկրյա ներդրողների համար Եվրոպական բիզնեսի ընկերակցության կողմից կազմակերպված ոլորտային նստաշրջանի մասնակիցներին ներկայացրել է համատեղ կոոպերացիոն նախագծերի ֆինանսական աջակցության մեխանիզմի գործնական իրականացման հիմնական ասպեկտները, ինչպես նաև ԵԱՏՄ երկրների արտադրական համալիրների զարգացման և արդիականացման հնարավորությունները: «Հանձնաժողովը անդամ պետությունների հետ համատեղ սկսել է մեխանիզմի գործնական իրականացումը, որը առաջիկա հինգ տարվա ընթացքում թույլ կտա գործնականում խթանել արտադրանքի արդադրության նոր տարածաշրջանային կոոպերացիոն շղթաների ստեղծումը»,- նշել է Գոհար Բարսեղյանը «Բազմաթիվ անուններով տարածաշրջան. հին մարտահրավերներ, նոր հնարավորություններ, շփումների ընդլայնում» նստաշրջանի ընթացքում: ԵՏՀ նախարարի խոսքով, ագրոարդյունաբերական ոլորտում գերակա է մնում փոքր և միջին բիզնեսին աջակցություն տրամադրելը։ Այս կապակցությամբ Հանձնաժողովը մշակել և ընդունել է երկարաժամկետ հեռանկարում կայուն տնտեսական գործունեության պայմաններ ապահովելու միջոցով ԵԱՏՄ երկրների գյուղատնտեսության ոլորտի միկրոձեռնարկատիրությանը, փոքր և միջին ձեռնարկատիրությանը պետական աջակցություն տրամադրելու հանձնարարականներ։ «Մեր Միության յուրաքանչյուր պետություն այստեղ մեծ ներուժ ունի,- ընդգծել է Գոհար Բարսեղյանը։ - Արդյունաբերության և ԱԱՀ զարգացումը էական ներդրում ունի տնտեսության իրական հատվածի խթանման գործում»։ ԵՏՀ նախարարը բիզնեսի ներկայացուցիչներին կոչ է արել ավելի ակտիվորեն մասնակցել նոր վերազգային գործիքի գործնական իրականացմանը, ստեղծել արդյունավետ կոոպերացիոն նախագծեր, առաջարկել կոոպերացիոն համագործակցության նոր ոլորտներ։
13 Nov 2024 ԵՏՀ-ն քննարկել է արդյունաբերության ոլորտի նոր կոոպերացիոն նախագծեր Նոյեմբերի 13-ին Եվրասիական տնտեսական հանձնաժողովի արդյունաբերության և ագրոարդյունաբերական համալիրի նախարար Գոհար Բարսեղյանի նախագահությամբ կայացել է Արդյունաբերության հարցերով խորհրդատվական կոմիտեի նիստը։ «Նիստում քննարկվել և հավանության է արժանացել երկու հայտ՝ երկաթուղային և գյուղատնտեսական մեքենաշինության ոլորտներում համատեղ կոոպերացիոն նախագծերին ֆինանսական աջակցության տրամադրման մեխանիզմի իրականացման շրջանակներում», - հայտնել է ԵՏՀ նախարարը։ Հավանություն է տրվել նաև ԵՏՀ ակտերի նախագծերին, որոնք երեք տարով (մինչև 2028 թվականի մայիսի 21-ը) երկարաձգում են Եվրասիական տնտեսական միությունում բավարար չափով չարտադրվող ապրանքներին աջակցելուն ուղղված հատուկ սուբսիդիայի թույլատրելիության չափանիշի գործողության ժամկետը։ Սկսվել է ԵԱՏՄ կոոպերացիոն արդյունաբերական արտադրանքի գրանցամատյանի ձևավորման մոտեցումների մշակումը՝ հաշվի առնելով այս ուղղությամբ տեղի ունեցող զարգացումները։ Բացի այդ, նիստի մասնակիցները հավանության են արժանացրել ԵԱՏՄ-ում արդյունաբերական արտադրական հզորությունների ստեղծման նախագծերի տարեկան ակնարկը։ Ակնարկը տեղեկատվություն է պարունակում հնարավոր կոոպերացիոն համագործակցության համար սարքավորումներով, մեքենաներով, շինանյութերով և տեխնոլոգիաներով ապահովման առնչությամբ Միությունում իրականացվող նախագծերի մասին: Փաստաթուղթն ընդգրկում է արդյունաբերության մշակող, արդյունահանող, նավթագազային ոլորտները, էլեկտրաէներգետիկան և ներառում է ավելի քան երկու հազար խոշոր նախագիծ՝ շուրջ 25 տրիլիոն ռուբլի ընդհանուր չափով ներդրումներով։
Ցուցադրել ավելին

Պաշարներ ԵՏՄ