Жаңалықтар
ЕАЭО елдерінің бірлескен күш-жігері ТМД МАК шеңберінде стандарттауды дамытуға елеулі үлес қосады
Еуразиялық экономикалық комиссияның Техникалық реттеу жөніндегі министрі Виктор Назаренко бұл туралы 14-15 желтоқсанда Минскіде өткен Стандарттау, метрология және сертификаттау саласында келісілген саясат жүргізу туралы келісімге қатысушы мемлекеттердің стандарттау, метрология және сертификаттау жөніндегі ұлттық органдары басшыларының кеңесінде (Тәуелсіз Мемлекеттер Достастығының Стандарттау, метрология және сертификаттау жөніндегі мемлекетаралық кеңесінің (МАК) 64-інші отырысында) мәлімдеді.
Виктор Назаренко атап көрсеткендей, стандарттауды дамыту үшін сарапшылық әлеуетті және басқа ресурстарды бірлесіп пайдалану оның әлеуетін ұлғайтуға ықпал етіп қана қоймайды, сонымен қатар ортақ Одақтық нарық шеңберінде адал бәсекелестікті қалыптастыру, экономика салаларының ғылыми-техникалық даму деңгейін арттыру үшін оң жағдайлар жасайды, өнеркәсіптік кооперацияны кеңейтеді, ЕАЭО елдері мен ТМД-ға қатысушы басқа мемлекеттер арасындағы сауданы дамытуға ықпал етеді.
"Қазіргі заманғы мемлекетаралық стандарттар техникалық регламенттерді дәлелдемелік базамен қамтамасыз етеді, өнімге қойылатын талаптар мен оны зерттеу әдістерін белгілейді және осы талаптар мен зерттеу әдістерін жоғары техникалық деңгейде қолдайды. Биыл ЕЭК Кеңесі бекіткен Одақтағы стандарттау жөніндегі жұмыстарды үйлестіру тәртібі қажетті мемлекетаралық стандарттарды әзірлеуді жоспарлауды үйлестіруге және бұл жұмысты жаңа жүйелік деңгейге қоюға бағытталған. Мұның әсері тек ЕАЭО шеңберінде ғана емес, жалпы ТМД кеңістігінде де оң болатынына сенімдімін", – деп атап өтті ЕЭК министрі.
15 желтоқсанда Минскіде өтіп жатқан іс-шаралар шеңберінде Одақ мемлекеттерінің стандарттау жөніндегі мемлекеттік (ұлттық) органдары басшылары кеңесінің кезекті отырысы болды. Басшылар кеңесінің мүшелері Одақты техникалық реттеу, ЕАЭО техникалық регламенттерінің ғылыми-техникалық деңгейін бағалау практикасын және солармен өзара байланысты стандарттар тізбесін ендіру мақсатында стандарттауды дамыту бойынша өзара іс-қимылдың бірқатар практикалық бағытын талқылады. Виктор Назаренко Басшылар кеңесі мүшелеріне осы мәселе бойынша Комиссияның пайымдауын ұсынды және отырысқа қатысушылардың қолдауына ие болған бірқатар ұсынысын білдіріп, сөз сөйледі. Қабылданған шешімдерді Комиссияның және Одаққа мүше мемлекеттердің стандарттау жөніндегі мемлекеттік (ұлттық) органдарының нақты іс-шараларына енгізу жоспарлануда.
Анықтама
Тәуелсіз Мемлекеттер Достастығының (ТМД) Стандарттау, метрология және сертификаттау жөніндегі мемлекетаралық кеңесі (МАК) стандарттау, метрология және сертификаттау жөніндегі келісілген саясатты қалыптастыру және жүргізу жөніндегі ТМД-ның Үкіметаралық органы болып табылады.
МАК Халықаралық стандарттау ұйымы (ИСО) – EASC Өңірлік стандарттау ұйымы (ИСО Кеңесінің 26/1996 қарары) ретінде танылды.
Еуразиялық экономикалық одаққа мүше мемлекеттердің стандарттау жөніндегі мемлекеттік (ұлттық) органдары басшыларының кеңесі Одақ туралы шартты іске асыру шеңберінде техникалық реттеу саласында стандарттауды дамыту мақсатында Еуразиялық экономикалық одақтың көмекші органы ретінде Жоғары Еуразиялық экономикалық кеңестің 2018 жылғы 14 мамырдағы № 14 шешімімен құрылды. 2023 жылы Кеңесте Ресей Федерациясы төрағалық етті.
