Жаңылыктар
Кыргыз Республикасынын чек арасындагы өткөрүү пункттарынын бажы инфраструктурасын комплекстүү модернизациялоо аяктоодо
Евразия экономикалык комиссиясынын эксперттери жана Евразия экономикалык бирлигинин өлкөлөрүнүн ыйгарым укуктуу өкүлдөрү Кыргыз Республикасынын Финансы министрлигине караштуу Мамлекеттик бажы кызматынын өкүлдөрүнүн катышуусунда 13-ноябрдан 17-ноябрга чейин Кыргызстан менен Тажикстандын чек арасында жайгашкан "Кайрагач", "Карамык" жана "Бор-Дөбө" автомобилдик өткөрүү пункттарынын бажы инфраструктурасынын элементтеринин жабдылышына жана материалдык-техникалык жабдылышына мониторинг жүргүзүштү.
Мониторингдин жыйынтыгы боюнча Комиссиянын Бажы инфраструктурасы департаментинин директору Данияр Иманалиев жана Кыргыз Республикасынын бажы кызматынын жетекчисинин орун басары Алмаз Салиев отчетко кол коюшту, анда бул өткөрүү пункттарынын бажы инфраструктурасынын элементтерин жайгаштыруу жана материалдык-техникалык жабдуу боюнча иш-чаралар толук көлөмдө аткарылгандыгы белгиленген.
"Кыргызстан Бирликке кошулуунун алкагында кабыл алынган өткөрүү пункттарын модернизациялоо боюнча бардык милдеттенмелерди толук аткарууга жакындап калды", – деп белгиледи Данияр Иманалиев. – Модернизациялоонун алкагында бир катар бажы инфраструктурасынын объекттери курулганына, өткөрүү пункттары эң заманбап техникалык каражаттар менен жабдылганына, бажы кызматынын кызматкерлери керектүү билимдерге жана көндүмдөргө ээ жана өз милдеттерин аткарууга даяр экендигине ынандык. Жүргүзүлгөн модернизациялоо сооданы жана транзиттик потенциалды өнүктүрүүгө, тышкы экономикалык иштин катышуучуларына товарларды чек арадан өткөрүү үчүн максималдуу жагымдуу шарттарды түзүүгө өбөлгө түзөт жана ошол эле учурда бажы контролунун тиешелүү деңгээлин камсыз кылат".
Данияр Иманалиев ошондой эле Кыргызстандын бажы кызматынын жетекчилиги менен бир катар жумушчу жолугушууларды өткөрүп, анын жүрүшүндө модернизациялоону аяктоо, күнүмдүк иштөөнү андан ары камсыз кылуу маселелери жана өткөрүү пункттарынын бажы инфраструктурасын андан ары жакшыртуу пландары каралды.
Кыргыз Республикасынын бажы кызматынын жаңы инфраструктураны натыйжалуу пайдалануу, анын ичинде бир катар келечектүү милдеттерди жүзөгө ашыруунун алкагында көрүлүп жаткан иш-аракеттери белгиленди. Алардын катарында чек арадагы бардык контролдоочу органдардын байланыштын корголгон каналдары боюнча автоматташтырылган маалыматтык өз ара аракеттенүүсүн киргизүү; товарды коштоочу документтерди электрондук түрдө пайдаланууга өтүү; бажы контролунун техникалык каражаттарын Кыргыз Республикасынын бажы кызматынын бирдиктүү автоматташтырылган тутумуна кошуу сыяктуу иш-аракеттер бар.
