Նորություններ

09.02.2024 (Обновлено: 13.02.2024 09:52)

Գոհար Բարսեղյանը ԵԱՏՄ բիզնեսին հորդորել է ակտիվորեն մասնակցել նոր ֆինանսական մեխանիզմի իրականացմանը

Եվրասիական տնտեսական միությունում կոոպերացիոն նախագծերի ֆինանսական աջակցության մեխանիզմի ներդրումը տնտեսության իրական հատվածին թույլ կտա դուրս գալ եվրասիական ինտեգրման նոր մակարդակ։ Այս մասին հայտարարել է Եվրասիական տնտեսական հանձնաժողովի արդյունաբերության և ագրոարդյունաբերական համալիրի նախարար Գոհար Բարսեղյանը «Ռուսաստան 2030 և նոր համաշխարհային տնտեսական կարգ. առանցքային գործոնները և բիզնեսի դերը» միջազգային համաժողովում։

«Նոր մեխանիզմի իրականացումը կնպաստի արդյունաբերության զարգացման հիմնական խնդիրների լուծմանը, որոնք արտացոլված են մինչև 2030 թվականը և մինչև 2045 թվականն ընկած ժամանակահատվածում ԵԱՏՄ շրջանակներում տնտեսական գործընթացների հետագա զարգացման մասին հռչակագրում», - հայտնել է Գոհար Բարսեղյանը։ - Խոսքը կոոպերացիոն փոխգործակցության և համագործակցության ընդհանուր տարածք ձևավորելու, ինչպես նաև ԵԱՏՄ ընդհանուր շուկան առանցքային ապրանքներով ապահովելու մասին է»։

Նախարարն ընդգծել է, որ կոոպերացիոն նախագծերի ֆինանսական աջակցության նոր ձևը կբարձրացնի Միության երկրների ներդրումային գրավչությունը, և գործարար շրջանակների միավորումներին և բիզնեսի ներկայացուցիչներին հորդորել է ակտիվորեն մասնակցել նոր վերազգային գործիքի գործնական իրականացմանը։

Գոհար Բարսեղյանը նաև նշել է, որ Եվրասիական տնտեսական բարձրագույն խորհրդի նախագահ, Հայաստանի Հանրապետության վարչապետ Նիկոլ Փաշինյանը ԵԱՏՄ անդամ պետությունների ղեկավարներին հղված իր ուղերձում Միության մարմիններում Հայաստանի Հանրապետության նախագահության առանցքային գերակայությունների շարքում հատուկ ուշադրություն են դարձրել պարենային անվտանգության հարցերին և ագրոարդյունաբերական համալիրի զարգացմանը։

«ԵԱՏՄ երկրների պարենի հիմնական տեսակներով ապահովվածության մակարդակը հասել է 93 տոկոսի։ Սա անդամ պետություններին թույլ է տալիս հավաքական հիմունքներով արդյունավետորեն դիմակայել ի հայտ եկող մարտահրավերներին»,- նշել է ԵՏՀ նախարարը։

Եզրափակելով՝ Գոհար Բարսեղյանը կարևորել է այն առավելությունների արդյունավետ օգտագործումը, որոնք անդամ պետությունները ստանում են ինտեգրման շնորհիվ։ Նախարարի խոսքով՝ «հնգյակի» երկրների տնտեսությունների փոխադարձ լրացվելիությունը նրանց թույլ է տալիս ամենահավակնոտ նպատակները դնել՝ ինչպես շարքային քաղաքացիների կենսամակարդակի բարձրացման, այնպես էլ ամբողջ եվրասիական տարածքում գործարար միջավայրի բարելավման համար։

Տեղեկանք

«Ռուսաստան 2030 և նոր համաշխարհային տնտեսական կարգ. հիմնական գործոնները և բիզնեսի դերը» միջազգային համաժողովն անցկացվել է Ռուսաստանի արդյունաբերողների և ձեռնարկատերերի միության հարթակում Ռուսական բիզնեսի շաբաթ 2024-ի շրջանակներում: Միջոցառմանը մասնակցել են Ռուսաստանի Դաշնության կառավարության ղեկավարի տեղակալ Ալեքսեյ Օվերչուկը, Ռուսաստանի Դաշնության տնտեսական զարգացման նախարար Մաքսիմ Ռեշետնիկովը, ԵՏՀ առևտրի նախարար Անդրեյ Սլեպնևը, ինչպես նաև ռուսական բիզնեսի և պետական կառույցների ներկայացուցիչներ։