Նորություններ
ԵԱՏՄ տարածքում ռոումինգի սակագների սահմանման կանոնները կընդունվեն մինչև 2024 թվականի վերջ
Եվրասիական տնտեսական միության պետությունների տարածքներում միջազգային ռոումինգում բջջային կապի ծառայությունների արդար սակագների օգտագործման կանոնները նախատեսվում է հաստատել մինչև 2024 թվականի վերջ։ Այս հարցը քննարկվել է Եվրասիական տնտեսական հանձնաժողովի կապի ոլորտում մրցակցության և արգելքների վերացման հարցերով աշխատանքային խմբի նիստում, որը տեղի է ունեցել մարտի 28-ին տեսակոնֆերանսի ձևաչափով՝ ԵԱՏՄ երկրների լիազոր մարմինների և բջջային կապի օպերատորների մասնակցությամբ:
Խորհրդակցության մասնակիցները քննարկել են Հանձնաժողովի կողմից մշակված կանոնների նախագիծը։ Ինչպես ընդգծել է ԵՏՀ հակամենաշնորհային կարգավորման վարչության տնօրեն Ալեքսեյ Սուշկևիչը, արդարը նշանակում է տնային սակագնին մոտ սակագին։
Ներկայումս մնում է ռոումինգային տրաֆիկի հաշվարկին առնչվող մի քանի երկճեղություն։ Նախևառաջ անհրաժեշտ է սահմանել նման տրաֆիկի ծավալը կամ այն ժամանակահատվածը, որի ընթացքում կգործեն արդար սակագները։ Բացի այդ, անհրաժեշտ է հաշվի առնել նաև այն հանգամանքը, որ բջջային օպերատորներն ունեն տարբեր տեխնիկական հնարավորություններ արտոնյալ սակագները կարգավորելու համար։
Նախատեսվում է, որ տեխնիկական հարցերը համաձայնեցնելուց հետո կողմերը կհաստատեն ռոումինգային զանգերի միջազգային փոխկապակցման դրույքաչափերի և միջօպերատորական ռոումինգային սակագների նվազեցման մակարդակները։
«Մենք ձգտում ենք այնպիսի պայմաններ ստեղծել, որպեսզի ԵԱՏՄ պետությունների քաղաքացիները Միության ցանկացած երկրում օգտվեն կապից տնային սակագներով։ Ընկերությունները ինքնուրույն կորոշեն տնային սակագների մակարդակը՝ հաշվի առնելով բջջային օպերատորների և սպառողների շահերի հավասարակշռությունը», - հանդիպման արդյունքներով նշել է Ալեքսեյ Սուշկևիչը։
Տեղեկանք
2021 թվականին Եվրասիական տնտեսական հանձնաժողովի խորհուրդը հաստատել է ԵԱՏՄ պետությունների տարածքներում միջազգային ռոումինգում բջջային կապի ծառայությունների համար արդար սակագներ սահմանելու համար անհրաժեշտ պայմանների ձևավորման միջոցառումների պլանը։ Նախատեսվում է, որ մինչև 2025 թվականի առաջին եռամսյակը կիրականացվեն բոլոր միջոցառումները։
Պլանը ներառում է խարդախության դեմ պայքարի, միջազգային ռոումինգային տրաֆիկի բացթողման ընթացքում կապի օպերատորների ուղղակի փոխգործակցության ապահովման համալիր միջոցներ, ռոումինգում արդար սակագներով մատուցվող կապի ծառայությունների առավելագույն ծավալի (ժամանակահատվածի) սահմանում և այլն:
